Talily Soa Nisorate i Matio 6:1-34
6 “Mitaoa nareo tsy mone ty mba hotrea o ndatio avao ro mahavy anareo manao soa. Naho izay ty atao’areo, le tsy hahazo valesoa amy i Rae’areo an-dagnitse agney nareo.
2 Naho fa manao fagnomezagne mba ho fiferegnesagne ty hafa areke nareo, le ko taliliegne mbaombao* manahake ty atao o mpanao soa miatrekeo. Ty anto’e, manao izay iareo amo o sinagogao ao naho an-dalagne ey amy izay derae o ndatio. Volagneko ama’areo, fa tsy hahazo valesoa hafa ankoatse izay iareo.
3 Fa naho fa ihe manao fagnomezagne mba ho fiferegnesagne ty hafa, le ko atao fanta i tagna’o haviay ze atao i tagna’o havanay.
4 Amy izay mba tsy misy ndaty mahafantatse tie manao raha mba hiferegnesagne ty hafa rehe. Le i Rae’o mahavazoho ze kila rahay ro hamale soa azo.
5 “Naho fa mivavake ka nareo, le ko manao manahake o mpanao soa miatrekeo. Fatao iareo ty mivavake mitsangagne amo o sinagogao ao naho amy ty toeragne maro ndaty* amy izay trea o ndatio. Volagneko ama’areo, fa tsy hahazo valesoa hafa ankoatse izay iareo.
6 Fa naho fa ihe hivavake, le miziliha an-tragno’o ao. Ie vita hily i lala’oy, le mivavaha amy i Rae’oy rehe. Amy izay i Rae’o tsy trea maso faie mahavazoho ze kila rahay ro hamale soa azo.
7 Naho fa mivavake nareo, le ko magnerenkeregne rehake mitovy avao manahake ty atao o ndaty firenena hafao. Ty anto’e, mieretseretse iareo tie hojanjignen’Agnahare naho manao vavake lava bey.
8 Ko mitsikombe iareo areke, satria fa hay i Rae’areoy ty raha paliae’areo ndra tie mbe tsy mangatake ama’e aza nareo.
9 “Hoe izao areke ty raha toko’e hangatahe’areo naho fa mivavake:
“‘Rae’ay amy i lagnitsey ao. Hohamasignegne abey ty tahina’o.
10 Lonike abey mba ho avy i Fanjakà’oy. Lonike abey mba hatao an-tane etoy ty zoton’arofo’o, manahake ty an-dagnitse agne.
11 Omeo anay ze hanegne tsahatse anay androany.
12 Le mamelà ty fahota’ay, manahake ty namelà’ay ze nanao raha tsy mete tama’ay.
13 Mba ampeo zahay tsy hagneke horese ty tsapa hevetse sady arovo amy i ratỳ zahay.’
14 “Naho tsy mitagne am-po amy ze ndaty nanao fahadisoagne ama’areo nareo, le hamela ty fahota’areo* i Rae’areo an-dagnitse agney.
15 Fa naho ohatse nareo mitagne am-po amy ze ndaty nanao fahadisoagne ama’areo, le tsy hamela anareo i Rae’areoy.
16 “Naho fa mifaly hanegne nareo, le ko manao tarehe o ndaty mahaferenaigne manahake ty atao o mpanao soa miatrekeo. Satria sare manao mahaferenaigne iareo, amy izay trea o ndatio tie mifaly hanegne. Volagneko ama’areo, fa tsy hahazo valesoa ankoatse izay iareo.
17 Fa naho fa inareo mifaly hanegne, le hosoro menake ty loha’areo sady sasao ty tarehe’areo,
18 amy izay tsy hotrea o ndatio tie mifaly hanegne nareo, fa i Rae’areo an-dagnitse agney* avao ro hahavazoho izay. Le i Rae’areo mahavazoho ze kila rahay ro hamale soa anareo.
19 “Ko mamory harena ho anareo an-tane etoy sasa, satria misy biby kidikidy homagne aze naho harefesegne manimba aze vaho mpangalatse mamaky tragno ty etoy.
20 Fa an-dagnitse agne ro amorio’areo harena, satria tsy misy biby kidikidy homagne aze naho harefesegne manimba aze vaho mpangalatse mamaky tragno ty agne.
21 Ty anto’e, ze raha tena sarobily ama’o ro andrea ty fo’o.
22 “O masò ty jiro o vatagneo. Naho ohatse areke ty maso’o mifantoke amy ty raha raike avao, le hazava ty vata’o iaby.
23 Fa naho tsy mete afa-po* ty maso’o, le haiegne ty vata’o iaby. A naho i hazavagne ama’o aoy ro manjare maiegne, le vata’e himoromorogne an’izay!
24 “Tsy misy mahavita manompo tompo roe; fa ty raike tsy maintsy hoheje’e, le ty raike hotea’e. Ndra ty raike hipiteha’e, le ty raike hambanémbané’e. Tsy hovita’areo ty hanompo an’Andrianagnahare naho o Harenao.
25 “Izay ty anto’e irehafako ama’areo tie: Ko minekoneko sasa amy ty fiai’areo nareo le hanao tihoe, ino ty raha hohane’ay ndra ino ty hinome’ay? Ko minekoneko amy ty vata’areo ka le hanao tihoe, ino ty hisikina’ay? Ty aia ty tena sarobily, ty hanegne vao sa ty fiaigne? Le ty vatagne vao sa ty akanjo?
26 Mba dineho’areo soa moa o vorogneo: Tsy mitongy ndra mandrofotse ndra mamory an-driha iareo, faie mea i Rae’areo an-dagnitse agney hanegne. Tsy mihoatse irey vao ty hasarobili’areo?
27 Ia ama’areo ty mitombo minitra raike ty andro iaigna’e naho minekoneko?
28 Nagnino ka nareo ro minekoneko miomba ty akanjo hisikina’areo? Dineho’areo soa o folera* an-teteke ey io. Tsy mba miasa mafe ndra manjaitse akanjo zao iareo,
29 faie volagneko ama’areo, fa ndra i Solomona mbe tamy ty voninahi’ey aza, tsy niakanjo fanjaka mitovy amy ty raike amy i folera rey.
30 I raha mitiry an-teteke ey rey aza ampisikinen’Agnahare akanjo fanjaka hoe rey, tsy somandrake vao nareo ry kele finoagne? I raha rey amy izaò androany avao ty iveloma’e fa naho fa hamaray hatorake agnate afo ao.
31 Ko minekoneko sasa areke nareo tie: ‘Inogne ty raha hohane’ay?’ ndra ‘Inogne ty hinome’ay?’ ndra ‘Inogne ty hisikina’ay?’
32 O ndaty tsy mahafantatse* an’Andrianagnahareo ro mipay mafe o raha rehoe. Fa hay i Rae’areo an-dagnitse agney tie mipay o raha rehoe nareo.
33 “Anò voalohan-draha amy ty fiaigna’areo avao areke i Fanjakagney naho ty hamaregnan’Andrianagnahare, le homeigne anareo iaby ka o raha rehoe.
34 Ko minekoneko amy ty hamaray, fa aleo hamaray mbe hinekoneko amy ze raha hiseho hamaray. Fa tsahatse ty andro tsikiraidraike ty haratiagne misy amy i andro igne.
Fagnamarehagne ambane peje
^ Abt: “mitioke trompetra aloha’areo eo.”
^ Abt: “anjoron-dalagne ey.”
^ Abt: “trosa’o.”
^ Abt: “amy i mietakey aoy.”
^ Ndra: “tea mena.”
^ Ndra: “folera lisy.”
^ Abt: “ndaty boake amy ty firenena hafa.”
