1. Inogne ty vavake malaza hodinehentikagne?

MARO ty ndaty amy ty tane toy mahay i vavake manao tihoey tie Rae’ay amy i Lagnitsey ao ndra ty Vavake Nampianare i Andriatompo. I Jesosy Kirisity ty nagnomey aze ho tsikombegne sady misy dika’e laleke o vavake iohoe. Hahafantatse soa ty raha ampianare ty Baiboly rehe naho fa mandineke ty raha telo voaloha’e nampangatahe’e agnate’e ao.

2. Inogne iaby ty raha telo nampangatahe i Jesosy i mpiana’e rey?

² Hoe ty Jesosy naho fa nanomboke i vavakey: “Le mivavaha hoe izao nareo: ‘Rae’ay amy i lagnitsey ao, homasinegne abey ty tahina’o! Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne.’ ” (Matio 6:9-13) Inogne ty dika o fangatahagne telo rehoe?

3. Inogne iaby ty raha toko’e ho fantarentikagne miomba ty Fanjakàn’Andrianagnahare?

³ Fa maro ty raha nianarantikagne miomba ty tahinan’Andrianagnahare atao tihoe Jehovah. Fa nisy nidinehentikagne ty miomba ze zoton’arofo’e, agnisa izay ty raha fa nanoe’e naho mbe hanoe’e hoahy o ndatio. Inogne ty teà i Jesosy ho rehafegne naho fa nampangatake antikagne reke tie: “Ho avy abey i Fanjakà’oy”? Inogne o Fanjakàn’Andrianagnahare  zao? Akore ty hagnamasina’e ty tahinan’Andrianagnahare? Sady inogne ty ifandrambesa ty fanoagne ty zoton’arofon’Andrianagnahare naho ty fahavia i Fanjakagney?

4. Inogne o Fanjakàn’Andrianagnahare zao sady ia ty agnara ty Mpanjaka’e?

⁴ O Fanjakàn’Andrianagnahare zao fitondragne naore i Jehovah, le ty Mpanjaka jinobo’e ty mitondra aze. Ia ty agnara o Mpanjaka iohoe? I Jesosy Kirisity. Tsy misy ndaty mpitondra mitovy amy i Jesosy Kirisity fa ‘Mpanjaka ze manjaka naho Andriatompo ze tompo’ reke. (1 Timoty 6:15) Managne hery hanoagne ze raha fanjaka ambone ze raha nivita o ndaty mpitondrao iaby reke, ndra ia ndra ia mpitondra fara izay mahay mitondra.

5. Aia i Fanjakàn’Andrianagnaharey ro hifehe ty mpanompo’e, le hatrake aia iaby ty ho fehe’e?

⁵ Aia i Fanjakàn’Andrianagnaharey ro hifehe ty mpanompo’e? Aia ty Jesosy amy hinane zao? Ko haligno fa vinono tamy i hatae mampijaley eo reke, vaho izay nivelomegne indraike. Nimban-dagnitse mbeo reke tafara izay. (Asan’ny Apostoly 2:33) Naho izay areke, le an-dagnitse agne ty misy i Fanjakàn’Andrianagnaharey. Izay ty mahavy ty Baiboly mirehake aze tie ‘Fanjakagne an-dagnitse agne.’ (2 Timoty 4:18) Faie hifehe ty tane toy iaby o fanjakagne iohoe.—Vakio Apokalypsy 11:15.

6, 7. Inogne ty mampiambake ty maha Mpanjaka i Jesosy?

⁶ Inogne ty mampiambake ty maha mpanjaka i Jesosy? Miambake reke fa le lia’e tsy ho mate sasa. Izao ty rehafe ty Baiboly naho fa nampitovy aze amy ty ndaty mpitondra: “Ie raike avao ty tsy mete mate, sady mitoboke amy ty hazavàgne tsy hay iharineagne.” (1 Timoty 6:16) Ty dika izay tsy mitsibaogne avao ze raha soa hanoe i Jesosy, fa haharetse. Hinday raha soa maro vata’e reke.

⁷ Izao ty raha nitokie ty Baiboly miomba i Jesosy: “Hitoboke ama’e ao ty fagnahy i Jehovah, le ty fagnahy mampahilala,  mampahira-tsaigne, manoro hevetse, mampaozatse, mampahay raha sady manao ze hatahoragne i Jehovah. Hafaleagne ama’e ty tahotse i Jehovah. Tsy ze trea’e maso avao ro itsarà’e ndra ze rey ty sofi’e avao ro agnanara’e, fa amy ty raha vantagne avao ty hitsarà’e ty rarake, amy ty hamarenagne avao ty agnanara’e o ndatio mba hagnomeagne tombotsoa ze mpandefetse an-tane etoy.” (Isaia 11:2-4) Ty dika izay, hanao ty maregne naho hiferenaigne ty ndaty an-tane etoy ty Jesosy Mpanjaka. Tsy irie’o vao ty hanagne mpitondra manahake izay?

8. Ia ty hiharo fitondragne amy i Jesosy?

⁸ Tsy i Jesosy raike avao ty ho mpitondra fa hisy ndaty ila’e hiharo fitondragne ama’e. Nirehake tamy i Timoty ty apositoly Paoly tie: “Naho maharetse avao tikagne, le ho mpanjaka hiharo fitondragne ama’e.” (2 Timoty 2:12) Hiharo fitondragne amy i Jesosy an-dagnitse agne vata’e ty ry Paoly naho i Timoty vaho ty ndaty ila’e tsy mivalike jinobon’Andrianagnahare. Fire ty hanagne i voninahitse zay?

9. Fire ty isa ty ndaty hiharo fitondragne amy i Jesosy, sady nanomboke ombia ty nijobognan’Andrianagnahare iareo?

⁹ Nianarantikagne tamy Toko faha-7 ao fa nahatrea elognelon-draha ty apositoly Jaona. Trea’e “i Anak’agnondrỳ [Jesosy Kirisity] nitsangagne amy i Vohitse Ziona [toeragne maha mpanjaka misy aze an-dagnitse agne] eo, le niharo ama’e ty ndaty efatse arivo tsy efatse ale tsy ray hetse ninday ty agnara i Anak’agnondrỳ naho ty tahinan-dRae’e sinoratse an-kandry iareo eo.” Ia o 144 000 reo? Le mbe nanohy ty reha’e ty Jaona tie: “Nagnorike ze nombà i Anak’agnondrỳ avao iareo. Vinily boake amo o ndatio eo iareo ho lohavoa ho an’Andrianagnahare naho hoahy i Anak’agnondrỳ.” (Apokalypsy 14:1, 4) Mpiana i Jesosy Kirisity tsy mivalike jinobogne ambata’e hiharo fitondragne ama’e an-dagnitse agne iareo. “Ho mpanjaka hifehe ty tane toy” hiharo amy i Jesosy iareo naho fa hovelomegne ho an-dagnitse agne. (Apokalypsy 5:10) Fa tamy ty andro i apositoly rey ty nijobognan’Andrianagnahare  o Kirisitianagne tsy mivalike reo, mba hamenoagne ty isake 144 000.

10. Nagnino ty nijobognagne i Jesosy naho o ndaty 144 000 reo ho mpitondra ro hatea tsy misy hoe’e?

¹⁰ Hatea tsy misy hoe’e ty nijobognagne i Jesosy naho o ndaty 144 000 reo hifehe o ndatio. Fa ni-ndaty ty Jesosy tie taolo, le mahafantatse soa ty fijaleagne mahazo o ndatio. Izao ty raha nirehafe i Paoly miomba i Jesosy: “Fa tsy raha mpisorom-bey tsy mahay mitrétré amy ty fanagnantikagne handra ro anagnantikagne, fa manahake antikagne nitsapaegne hevetse amy ze kila raha, faie tsy nivalike.” (Hebreo 4:15; 5:8) Fa nijale, naho fa naharey ty mangirifiry ka o ndaty hiharo fitondragne ama’e reo. Fa nialy mafe tamy ty tahigne naho ty aretegne maro ka iareo. Izay ty mahavy antikagne matoky fa mahafantatse soa ty hasahiragne mahazo o ndatio iareo!

11. Nagnino i mpiana i Jesosy rey ie nampangatahe’e ty hanoagne ty zoton’arofon’Andrianagnahare an-dagnitse agneo?

¹¹ Tsy ty hahavia i Fanjakàn’Andrianagnaharey avao ty nampangatahe i Jesosy i mpiana’e rey fa ty hanoagne ty zoton’arofo’e ‘an-tane etoy hambagne amy ty an-dagnitse agne’ ka. An-dagnitse agne ty misy an’Andrianagnahare sady fa manao ze zoton’arofo’e ze anjely tsy mivalike. Nianarantikagne tamy Toko faha-3 ao fa nisy anjely raty raike tsy nanao ty zoton’arofo’e sasa. I Satana Devoly ty agnara’e. Ie ty nitarike i Adama naho i Eva hanan-tahigne. Amy Toko faha-10 ao tikagne vaho hianatse aze soa. Nengàgne hijanogne kedekedeke an-dagnitse agne hey ty Satana naho ty anjely raty ila’e nagnorike aze atao tihoe demonia. Mbe tsy nanao ty zoton’arofon’Andrianagnahare iaby ze tan-dagnitse agne tamy izay. Faie niova zay naho fa nanomboke nitondra ty Fanjakàn’Andrianagnahare. Nialy tamy i Satana ty Jesosy Kirisity naho fa tinendre ho Mpanjaka.—Vakio Apokalypsy 12:7-9.

12. Inogne iaby ty raha lahibey roe niseho rehafe ty Apokalypsy 12:10?

 ¹² Izao ty raha rehafe ty Baiboly: “Naharey fiaragnanagne tamy i lagnitsey ao raho nanao tihoe tie: ‘Avy hinane zao ty fandrombaha i Andrianagnaharentikagney antikagne naho ty heri’e naho ty Fanjakà’e vaho ty fahefà i Kirisiti’ey, fa navokovoko i mpanao kitomboke [Satana] o rahalahintikagneoy, le i mpanao kitomboke iareo handro halegne aman’Andrianagnaharentikagney.’ ” (Apokalypsy 12:10) Inogne iaby ty raha lahibey roe niseho rehafe o andalan-teny iohoe. Voaloha’e, nanomboke nanjaka ty Fanjakàn’Andrianagnahare, le i Jesosy Kirisity ty Mpanjaka’e. Faharoe, niroahegne boake an-dagnitse agne ty Satana, le navokovoko an-tane etoy.

13. Inogne ty voka’e naho fa niroahegne boake an-dagnitse agne ty Satana?

¹³ Inogne ty voka o raha rehoe? Izao ty raha niseho tan-dagnitse agne: “Naho izay areke, le mifalea ry lagnitse naho i nareo toboke ama’e ao!” (Apokalypsy 12:12) Fale ze anjely tsy mivalike an-dagnitse agne fa tsy agne sasa ty Satana naho i demonia’e rey. Milamigne naho miadagne hinane zao ty an-dagnitse agne fa tsy mivalike amy i Jehovah iaby ze agne. Fa anoegne an-dagnitse agne ty zoton’arofo i Jehovah amy izao.

14. Inogne ty raha niseho naho fa navokovoko an-tane etoy ty Satana?

¹⁴ Hanao akore ka ty amy ty tane toy? Hoe ty Baiboly: “Loza hoahy i taney naho i riakey fa nizotso ama’areo agne ty Devoly sady boseke, fa fanta’e fa fohe ty fotoagne anagna’e.” (Apokalypsy 12:12) Lako haboseke ty Satana naho fa rinoake boake an-dagnitse agne fa fohe ty andro’e. Magnoho-doza an-tane etoy reke. Hianatse ty miomba izay tikagne amy ty toko afara itoy. A naho izay areke ty raha anoe i Satana, akore ty hanoa i Fanjakagney ty zoton’arofon’Andrianagnahare an-tane etoy?

15. Inogne ty zoton’arofon’Andrianagnahare amy ty tane toy?

¹⁵ Tsiaro’o vao ty zoton’arofon’Andrianagnahare amy ty tane toy? Fa nianara’o tamy Toko faha-3 ao zay. Trea tamy ty raha nisy ta Edena ao fa irien’Andrianagnahare ho paradisa  ty tane toy sady ho feno ndaty maren-tane tsy ho mate sasa. Faie nitaone i Satana hanao hakeo ty Adama naho i Eva, le nisy voka’e tamy ty fiavy ty raha nisafirien’Andrianagnahare tamy ty tane toy zay. Faie tsy niova ty raha nisafirie i Jehovah. Hoe reke: “Ze ndaty maren-tane ro handova ty tane toy, sady ho velogne nainai’e etoy.” (Salamo 37:29) Ty Fanjakàn’Andrianagnahare ty hanao izay. Akore ty hanoa’e aze?

16, 17. Inogne ty raha rehafe ty Daniela 2:44 amantikagne miomba ty Fanjakàn’Andrianagnahare?

¹⁶ Dineho hey ty raha nitokiegne amy Daniela 2:44 ao toy: “Amy ty andro o mpanjaka rehoe, le hagnoregne fanjakagne tsy ho rava sasa i Andrianagnahare i lagnitseỳ, tsy ho azo o ndaty hafa i fanjakagne zay. Hopotepotehe’e naho hofoagna i fanjakà’ey o fanjakagne rehoe iaby, fa i azey avao ro haharetse nainai’e.” Inogne ty teà izay ho rehafegne?

¹⁷ Voaloha’e, haoregne “amy ty andro o mpanjaka rehoe” ndra amy ty andro mbe mampisy ty fitondràm-panjakà o ndaty ty Fanjakàn’Andrianagnahare. Faharoe, haharetse nainai’e i Fanjakagney. Tsy ho rese naho tsy ho soloagne fitondragne hafa reke. Fahatelo, hialy ty Fanjakàn’Andrianagnahare naho ze fanjakagne ambone tane etoy. Faie ty Fanjakàn’Andrianagnahare ro haharese sady hifehe ty tane toy iaby. Mbe lia o ndatio tsy niaigne tagnate ty fitondragne fanjaka hoe izay amparake izay!

18. Inogne ty agnaragne irehafagne ty aly hifanoa ty Fanjakàn’Andrianagnahare naho ty fanjakà o ndaty?

¹⁸ Maro ty raha rehafe ty Baiboly miomba ty aly hifanoa ty Fanjakàn’Andrianagnahare naho ty fanjakà o ndaty. Rehafe’e fa naho fa mihamarine i fara androy, le hisy anjely hitsey vande hamitahagne “ty mpanjaka ty tane toy.” Inogne ty anto’e? “Soa tie hamoria’e iareo [ty mpanjaka] ho amy i aly ty andro lahibein’Andrianagnahare Tompo ty Herỳ.” Havory “ho amy ty toeragne atao tihoe Hara-magedona amy ty rehake hebereo” o mpanjaka rehoe. (Apokalypsy 16:14, 16) Hara-magedona ty irehafagne ty aly hifanoa ty fitondràm-panjakà o ndaty naho ty Fanjakàn’Andrianagnahare.

19, 20. Inogne ty mbe tsy anoagne ty zoton’arofon’Andrianagnahare ambone tane etoy?

 ¹⁹ Inogne ka ty raha ho vitae i Fanjakàn’Andrianagnaharey amy i Hara-magedonay ao? Dineho indraike ty zoton’arofon’Andrianagnahare amy ty tane toy. Teà i Jehovah Andrianagnahare ho feno ndaty maren-tane naho manompo aze sady voririke ty tane toy naho fa Paradisa. Inogne ty mahavy izay mbe tsy avy eo? Voaloha’e, mbe manan-tahigne naho marare sady mate tikagne. Faie nianarantikagne tamy Toko faha-5 ao fa mate ho antikagne ty Jesosy hahazoagne i havelogne nainai’ey. Tsiaro’o vao ty rehafe ty Fitaliliantsoa i Jaona? Hoe reke: “Lako loatse ty hatean’Andrianagnahare ty tontolo toy, kanao nimei’e i Ana-dahi’e bakotokagney, soa tie tsy ho mate ze manoro ty finoa’e aze, fa ho velogne tsy misy fara’e.”—Jaona 3:16.

²⁰ Fagnampe izay ka mbe mihamaro ty ndaty mpanao raty. Mavande naho mamitake sady tsy vokatse iareo. Tsy te hanao ty zoton’arofon’Andrianagnahare iareo, hafara’e ho mate naho avy ty aly Hara-magedona. (Vakio Salamo 37:10.) Mbe tsy anoegne an-tane etoy ka ty zoton’arofon’Andrianagnahare, fa tsy mandrisike ty fehe’e hanao izay ty fitondràm-panjakà o ndaty. Maro ty fitondràm-panjakagne tsy mahay mitamiry fanagnagne, tsy miferenaigne sady manao aferafera. Tsy miolakolake ty Baiboly naho fa mirehake tie: “Nikomandikomandy ty ragne’e iaby o ndatio le nagnoho-doza tama’e.”—Mpitoriteny 8:9.

21. Akore ty hanoa i Fanjakagney ty zoton’arofon’Andrianagnahare ambone tane etoy?

²¹ Ty Fanjakàn’Andrianagnahare avao ty sisa hifehe o ndatio naho fa vita i Hara-magedonay. Hanao ty zoton’arofon’Andrianagnahare o Fanjakagne iohoe sady hinday fitahiagne lahibey. Tsy hisia’e dika’e sasa ty Satana naho o demonia’eo. (Apokalypsy 20:1-3) Hinday fitahiagne ka ty sorogne nanoe i Jesosy, le tsy harare naho tsy ho mate sasa ze ndaty tsy mivalike. Ho velogne nainai’e iareo. (Vakio Apokalypsy 22:1-3.) Ho paradisa ty tane toy. Hanao ty  zoton’arofon’Andrianagnahare an-tane etoy i Fanjakagney sady hagnamasigne ty tahina’e. Inogne ty teà izay ho rehafegne? Hagnomey voninahitse ty tahinagne atao tihoe Jehovah ze fehe ty Fanjakàn’Andrianagnahare.

22. Akore ty ahafantarantikagne fa mbe tsy teo hey i Fanjakàn’Andrianagnaharey tamy i Jesosy mbe tambone tane etoy ndra tafara ty namelomagne aze?

²² Kanao ty Jesosy nampangatake i mpiana’e rey hivavake tie: “Ho avy abey i Fanjakà’oy”, le mbe tsy teo i Fanjakagney tamy izay. Niavy vao i Fanjakagney naho fa niavy an-dagnitse agne ty Jesosy? Tsy izay. Nirehake ty Petera naho i Paoly tie naho fa vinelogne ty Jesosy, le niavy eo ty raha nitokiegne amy Salamo 110:1 manao tihoe tie: “Hoe ty Jehovah tamy i Andriatompoko: ‘Mitoboha ankavanako etoa amparake ty hanoako i fahavalo’oy ho fandià ty tombo’o.’ ” (Asan’ny Apostoly 2:32-35; Hebreo 10:12, 13) Ty dika izay mbe hisy andro handignisagne hey.

23. a) Ombia ty nioregna ty Fanjakàn’Andrianagnahare? b) Inogne ty hianarantikagne amy ty toko manonjohy itoy?

²³ Ombia ty nitapera i andro fandignisagney? Naho fa nikonte o mpianatse Baibolio tampagnivoa ty taogne 1800 naho ty taogne 1900, le nifanta iareo fa ty taogne 1914 ty hiafarà i andro fandignisagney. (Henteo ty Fagnazavagne Fagnampe’e, peje 215-218, miomba o date iohoe.) Magnamaregne  izay ty raha niseho nanomboke tamy ty taogne 1914. Ty fiavia ze raha nitokie ty Baiboly ty magnamaregne fa nanomboke tamy ty taogne 1914 ty naha Mpanjaka i Kirisity sady tamo o date iohoe ka ty nioregna i Fanjakàn’Andrianagnaharey an-dagnitse agne. Fa agnate ty andro fohe anagna i Satana itikagne hinane zao. (Apokalypsy 12:12; Salamo 110:2) Matoky tikagne fa marine hanao raha i Fanjakagney, hiavia ty zoton’arofon’Andrianagnahare an-tane etoy. Tsy talily soa vao zay? Mino vao rehe fa maregne zay? Hianara’o amy ty toko manonjohy itoy fa izay vata’e ty raha ampianare ty Baiboly.