Nakigne i Jehovah tamy ty rae amy ty rene ty fikolokoloagne ty ajaja naho fa namboatse ty keleiagne reke. (Kolosianina 3:20) Andraiki’o ty magnanatse ty ana’o mba ho tea i Jehovah naho ho ndaty bey mahilala. (2 Timoty 1:5; 3:15) Toko’e hamantatse ty am-pò’ao ka rehe sady ihe ty ho tsikombe’e. Tsy hahay hagnanatse ty ana’o ty Saontsy i Jehovah rehe naho tsy manjilike izay am-pò’o ao heike.—Salamo 40:8.

INOGNE TY RAHA REHAFE TY BAIBOLY? “Lonike [rehe] himane fitsanogne, tsy ho meke hirehake.” (Jakoba 1:19) Anò ze hahafantara i ana’oy fa tsy misy mikalagne aze naho fa mirehake ama’o reke. Anò fanta’e tie hitsanogne aze avao rehe naho fa te hirehake reke. Anò ze hampiragnetse anareo mirofoko, soa tie tsy sarotse amy ty ajaja ty hirehake ty heve’e. (Jakoba 3:18) Va’e tsy hirehake ty am-pò ao reke naho fa matahotse tie hasiake ndra ho tsaratsaraegne reke. Mahalignisa raha amy ty ana’o sady aherekeregno ama’e tie teà’o reke.—Matio 3:17; 1 Korintianina 8:1.

INOGNE TY TOKO’E HATAO’O?

• Mivognona hitsanogne naho fa te hirehake ty ana’o

• Ko aligne tie misy raha manahiragne vaho hirehake amy ty ana’o fa mirehafa ama’e lognandro

INOGNE TY RAHA REHAFE TY BAIBOLY? “Hoe rano laleke ty hevetse agnate fo o ndatio ao, fa ze mahay magnalalagne avao ro mahay manovy aze.” (Ohabolana 20:5) Naho te hahafantatse ty agnate fo ty ana’o ao rehe, le mandineha soa naho fa mirehake reke. Manovogne o ajajao naho fa mirehake, ndra tsy le avy le mirehake ty agnate fo’e ao. “Ze mamale faie mbe tsy nitsanogne, le hagegeagne naho hegnatse ho aze zay.” (Ohabolana 18:13) Ko tsiela boseke.—Ohabolana 19:11.

INOGNE TY TOKO’E HATAO’O?

• Ko mivoalatse ndra manapake ty reha ty ana’o ndra ino ndra ino rehafe’e

• Kezaho ty hahatiahy tie nanao akore rehe tamy ihe nihoe’e sady inogne ty raha nilahibey tama’o

INOGNE TY RAHA REHAFE TY BAIBOLY? “Tsanogno, anake, ty fagnanaran-drae’o sady ko ambanembanegne ty fanoroan-drene’o.” (Ohabolana 1:8) Sambe nimea i Jehovah fahefagne amy ty ana’e ty rae naho ty rene. Tsy mahaintsy magnanatse ty ana’areo hiasy naho ho mete anaragne nareo. (Efesianina 6:1-3) Fanta o ajajao avao tie tsy ‘miharo hevetse’ ty rae’e naho i rene’e. (1 Korintianina 1:10) Va’e tsy hiharo hevetse nareo, faie tsy soa naho miatreke ty ana’areo ty irehafa’areo izay. Va’e izay ty hahavy aze tsy hiasy anareo.

INOGNE TY TOKO’E HATAO’O?

• Iharò lahatse ty hagnòhagne i ajajay sady mifandamina soa nareo

• Fantaro soa ty heve i vali’o naho misy tsy mampira ty heve’areo amy ty fitezàgne anake

INOGNE TY RAHA REHAFE TY BAIBOLY? “Aòho amy ze lalagne toko’e handehana’e o ajajao.” (Ohabolana 22:6) Tsy tihoe hahasoa oke ty ajaja ze raha natao’o hitezàgne aze. Toko’e handineke miaolo ty hiteza’o aze rehe, agnate izay ty raha hagnohagne ty ajaja. (Salamo 127:4; Ohabolana 29:17) Tsy mandilo avao o magnòke zao fa magnampe ty ajaja hahafantatse ty anto’e agnanaragne aze. (Ohabolana 28:7) Ampianaro ho tea ty Saontsy i Jehovah naho ty fanoroagne agnate’ao ka ty ana’o. (Salamo 1:2) Izay ty hahasoa oke ty vetsevetse’e.—Hebreo 5:14.

INOGNE TY TOKO’E HATAO’O?

• Torò ty ana’o hino fa misy vata’e ty Andrianagnahare sady hay tavandraegne

• Ampeo hahafantatse naho hihalavitse ze raha hahavy aze hanao raty reke. Agnate izay ze raha magnoho-doza amy Internet naho ty tragno-porarotse fiharoharoagne. Atorò aze ka ty raha toko’e hatao’e tsy ho azo o mpanimba ajajao