Tena Lahibey vao ty Fanagnagne Fanantenagne?

NIALY mafe tamy ty kansera ty Daniel tamy tie reke ni-10 taogne. Tsy nanagne fanantenagne sasa i dokoteray naho ty ndaty maifitse aze. Faie, le mbe nanagne fanantenagne avao reke. Nino reke fa hanjare mpikaroke naho fa bey, le handrambe anjara amy ty fipaliagne ty fagnafoly o kanserao. Niavy mba hagnente aze ty dokotera raike manam-pahaiagne manokagne miomba i karazan-kansera nahazo azey, le tena nagnamafe i fanantena’ey zay. Faie tsy afake nandeha amy i Daniel agne i dokoteray naho fa niavy i fotoagney satria niraty i androy. Tena kivy ty Daniel. Samba’e reke tie tamy izay ro tsy navitribitrike. Andro tsy ampeampe tafara izay, le nimate reke.

Dokotera nagnadihady miomba ty vokatse ty fanagnagne fanantenagne naho ty tsy fanagnagne fanantenagne amy ty fahasalamagne ty nirehake o tantara iohoe. Va’e fa naharey tantara mitovy amy io ka rehe. Misy ndaty fa antetse fa ho mate zao ohatse, faie le mbe mitamà ty hiavia ty fotoagne lahibey raike lignisa’e fa ela avao reke. Va’e ho tilihe ty longo’e maifitse aze reke ndra va’e indraike isan-taogne avao ty isia izay. Naho fa mandeha kedekede i fotoagney, le mate reke. Ino ty nahavy aze hahatratse i fotoagne lahibeỳ? Tena misy heri’e lahibey manahake ty fihevera ty ndaty ila’e aze vao ty fanagnagne fanantenagne?

Mihamaro ty mpikaroke miomba o fahasalamagneo mirehake tie, tena misy heri’e lahibey amy ty fiaigna ty ndaty raike naho ty fahasalama’e, ty fanagna’e fanantenagne naho ty toe-tsaigne hafa mitovy amy izay. Faie tsy ze kila ndaty le hagneke o heve iareo rehoe. Rehafe ty mpikaroke ila’e fa tsy azo porofoegne ara-tsiansa zay. Mihevetse iareo fa kanao ty ndaty raike marare, le misy raha tsy mete zay ty amy ty vata’e ao.

Fa ela ty nisia ty ndaty tsy mino fa tena lahibey ty fanagnagne fanantenagne. Agn’arivo’e taogne lasa zay, le nampamaritegne ty atao tihoe fanantenagne ty Aristote, filozofa grike, le hoe reke: “Ty atao tihoe fanantenagne, le nofinofy atoandro.” Mbe tsy ela zay, le nanao fagnamarehagne zao ty Benzamin Franklin, mpitondra fanjakagne amerikana: “Ho diso fanantenagne ze miantehetse amy ty fanantenagne.”

Ino areke ty maregne miomba ty fanantenagne? Nofinofy ampionogna o ndatio ty vata’e vao? Sa tena afake matoky tika fa tsy nofinofy avao io fa raha marem-pototse sady tena mahasoa vaho ilaentikagne iaby mba hahasalama naho hahasambatse antikagne?