Tamy ty Lahady hariva ty 24 Fevrie 1924, ty nanomboke nampiasagne voaloha’e ty radio ty Mpianatse Baiboly a atao tihoe WBBR. Ino ty raha nalefa iareo tao tamy izay? Le ia iaby ty naharey aze? Le akore ka ty nampiasà o Vavolombelo i Jehovah-o ty teknolojia niboake fara’e mba hitoriagne ty “talily soa i Fanjakagney magneran-tane”?​—Matio 24:14.

 Tamy 8:30 hariva ty nanomboha i fandaharagne tamy i radio WBBR-ay aoy sady naharetse roe lera. Nalefa mivantagne boake amy ty tragno fangalam-peo vaovao ta Staten Island a New York agne i fandaharagney. I rahalahy Ralph Leffler ty niandraikitse i fangalam-peoy, le nila natao’e azo antoke soa tie tena mete soa i feoy. Hoe reke: “Tena nifale zahay tsikiraidraike naho fa handefa i fandaharagney faie natahotse avao ka. Ninekoneko ka raho tie haharey i fandaharagney soa vao koahe o ndatio. Faie vineloko i radioy, le nalefa’ay i fandaharagney sady nitamà zahay tie handeha soa ty raha iaby.”

 I rahalahy Victor Schmidt ty nanolotse i fandaharagne miambake ignehoe sady toe ireke ka ty mpiandraikitse i radioy. Ty mozike naho ty hira natao o Mpianatse Baibolio ty nanombohagne i fandaharagney. Misy ndaty raike heike nitendre piano, le tafara izay ty Cora Wellman nihira ty hira tihoe “I Sive Amby Sivampoloy”, mioregne amy ty fagnoharagne natao i Jesosy miomba i agnondry nimontsoy. (Lioka 15:4-7) Tafara izay le nisy ndaty hafa nihira ty hira tihoe ‘I Anake Nibebakey’, agnisa izay ty Frederick W. Franz. Atoro amo o hira iohoe ao ty miomba i anake nimontso nibebakey.​—Lioka 15:11-25.

 I Joseph F. Rutherford ty mpitarike ty asa natao o Mpianatse Baibolio tamy ze fotoagne zay. Naho fa nitokanegne i tragno fangalagne feoy, le nisy lahajaka natao i rahalahy Rutherford. Nasongadi’e tamy i lahajakay fa mba “ho tombotsoa i fanjakà i Mesiay” i tragno fangalagne feoy. Hoe reke: “Zoton’arofo i Jehovah ty nagnenga’e o ndatio hamboatse radio. Amy izay o ndatio afake mianatse ty fahatanteraha ty faminania’e.”

 Ndaty maro boake avaratse atignana i Etazonia agne ty naharey i fandaharagne nalefa voaloha’ey. Nisy ndaty raike zay toboke a Morrisville agne. Mihoatse ty 320 kilometatse ty halavira o toeragne iohoe. Naho fa boake naharey i fandaharagney reke, le nirehake tie: “Tena fale raho fa naharey soa i fandaharagney. ... Tena nazava soa ty feo i rahalahy Rutherford. ... Rey soa iaby ze raha nirehafe’e.” Ndra ty ndaty ta Monticello, a Florida agne aza le naharey i fandaharagney. Nandeha soa i fandaharagne nalefa tamy i radioy, le ndaty maro ty nandefa taratasy fankasitrahagne.

 Nandefa i fandaharagne magnambara i hafatse miomba i Fanjakagney avao tagnate ty 33 taogne b i radioy, lohotsie fa ta avaratse atignana i Etazonia agne. Faie nisy fotoagne i radiontikagney niara-niasa tamy ty radio hafa. Nisy voka’e soa zay satria ndaty an-tapetrisa’e ty nanjare naharey i fandaharagne nalefa tan-dradio aoy, agnisa izay ty ndaty ta Etazonia agne, ta Kanada agne naho tamy ty faritse fara izay ty lavitse. Izao ty rehafe ty boke Diarin’ny Vavolombelon’i Jehovah 1975: “Nanomboke tamy 1933, le radio miiake 408 ty nampiasaegne mba handefa i fandaharagney amy ty kontinanta enegne, le nisy lahajaka ara-baiboly miiake 23 783 ty nalefa tao. ... Tagnate ze fotoagne zay, le fandaharagne raike iaby avao ty alefa i radio maro rey agnate ty fotoagne raike. Ndra aia ndra aia ty nisy o ndatio, le mbe afake naharey i hamarenagne magnomey voninahitse an’Andrianagnaharey avao iareo.”

 Tamy i Mpianatse Baiboly rey nampiasa i radiontikagney, le nisy 1 064 ty mpitory i Fanjakagney ta Etazonia agne. Nanohagne i mpitory rey i fandaharagne tan-dradio aoy. Tamy 1957, le nanjare 187 762 ty mpitory i Fanjakagney ta Etazonia agne, le niiake 653 273 ty mpitory magneran-tane. Ankoatse izay ka, le nahazo fampiofagnagne o rahalahy naho rahavave tena mazoto reo naho fa tam-pivoriagne agne, le nanjare nihasoa ty fahaia iareo mitory isan-tragno naho ty fanoa iareo karazam-panompoagne sambe hafa.

 Noho ze raha zay ty nahavy o rahalahy mpiandraikitseo nandineke soa tie ty aia ty tena ahitam-bokatse, i fandaharagne alefa an-dradio aoy vao sa ty fitoriagne isan-tragno. Ino hoe rehe ty nivoka izay? Nanapa-kevetse iareo fa havarotse i radiontikagne manokagney. Navarotse areke i radioy tamy 15 Avrily 1957. Tamy ty fandaharagne fara’e nalefa tamy i radioy ao, andro raike taloha ty hamarotagne aze, le nisy nagnontane ty anto’e hamarotagne i radioy ty Rahalahy Nathan H. Knorr. Nihazavae’e fa noho i fitoriagne isan-tragnoy, le nitombo bey ty isa o Vavolombelo i Jehovah-o. Hoe reke: “Maro ty ndaty nandrambe soa boake amy i fandaharagne nalefa tan-dradio aoy. Faie naho ampitahaegne ty fitomboagne misy le amy ty toeragne tsy maharey i radioy agne ty tena misy fitomboagne ta tie amy i toeragne maharey i radioy.” Nitrea o rahalahio areke fa ty fitoriagne isan-tragno ro tena magnampe ndaty maro haharey i talily soay, ta tie i an-dradio aoy. Faie ndra tie teo zay, le tsy nitapetse teo i fandaharagne nalefa tan-dradio aoy. Ampolo’e taogne tafara tatoy, le mbe nanohy nanao izay avao tika faie tamy ty fomba hafa.

 Nisy raha tena nahafale ka natao i fandaminagne tamy 6 Oktobra 2014. Tamy io ty voaloha’e nampiboahagne ty Tele JW. Afake magnente aze amy internet ao ndra amy i JW Library ao, ndra magnente aze mivantagne amy ty alala ty satelita o Vavolombelo i Jehovah-o naho ty ndaty hafa. c Faie amy ty toeragne ila’e, le mbe mampiasa radio naho tele o vahoa i Jehovah-o mba hagnambaragne i talily soay. Akore ty anoa iareo izay?

 Taogne maromaro tafara tatoy, le nampiasa radio naho tele tsy aze ty fandaminagne mba hagnampeagne ty ndaty amy toeragne tsy mahazo internet soa mba hahatreava iareo ty fivoriagne isan-keregnandro naho ty havoriambey. Maro areke ty ndaty tsy Vavolombelogne nanjare nahatrea i fandaharagney, agnisa izay ty ndaty liagne amo o Baibolio. Tam-pagnivoa ty taogne 2021 naho 2022, le nirehake tamy ty birò ty sampa ty Vavolombelo i Jehovah ta Afrika Atignanagne agne, ty ankamaroa ty tompo i radio nampiasaegne rey. Maro hoe iareo ty ndaty tsy Vavolombelogne tena nankasitrake i fandaharam-pivoriagne nalefa tan-dradio aoy. Nangatake hianatse Baiboly ty ankamaroa ze nitsanogne i fandaharagney ta Kenia, Soudan Atimo, naho ta Tanzania agne.

 Fa ty fomba lahibey atao o Vavolombelo i Jehovah-o mba hagnambaragne i hafatse miomba i Fanjakagney magneran-tane, le ty fitoriagne isan-tragno, ty fampiasagne kalesy fampirantiagne vaho ty fampiasagne ty tragnom-porarotse jw.org. Magnampe o ndaty liagneo i tragnom-poraro’aỳ mba ho afake hamaky Baiboly naho boke aman-gazete ara-baiboly amy ty firehake losotse ty 1 080 sady maimaim-poagne. Afake mahatrea ze valem-pagnonteneagne ara-baiboly ka iareo sady afake mahatrea ty toeragne naho ty fotoagne hanoagne fivoriagne. Noho ze kezake mafe natao o Vavolombelo i Jehovah-o zay, le nanjare mora amo o ndatio ty naharey i talily soa i Fanjakagney fa tsy nanahake ty taloha. Sady toe fa rineha ty Baiboly mialoha fa hotoriegne “amy ty tane toy iaby i talily soay.”​—Matio 24:14.