మీరు భార్యాభర్తలుగా ఓ కొత్త జీవితాన్ని ఆరంభించినప్పుడు కొన్ని సమస్యలు తలెత్తుతాయి. మీ ఇద్దరి ఆలోచనల్లో, భావాల్లో తేడా ఉండవచ్చు. జీవితం మీద కూడా వేర్వేరు అభిప్రాయాలు ఉండవచ్చు. కొన్నిసార్లు సమస్యలు బయట నుండి రావచ్చు, లేదా ఊహించని సంఘటనల వల్ల తలెత్తవచ్చు.

సమస్యల నుండి పారిపోవాలని మనకు అనిపించవచ్చు. కానీ వాటిని సమర్థంగా ఎదుర్కోవాలని బైబిలు మనకు సలహా ఇస్తోంది. (మత్తయి 5:22, 23) బైబిలు సూత్రాలను పాటిస్తే, మీ సమస్యలకు మంచి పరిష్కారం దొరుకుతుంది.

బైబిలు ఏమి చెబుతోందంటే . . . ‘మాట్లాడడానికి సమయము కలదు.’ (ప్రసంగి 3:1, 7) సమస్య గురించి మాట్లాడడానికి సమయం కేటాయించండి. సమస్య గురించి మీకు ఏమి అనిపిస్తుందో, దానిపై మీ అభిప్రాయం ఏమిటో నిజాయితీగా మీ జీవిత భాగస్వామికి చెప్పండి. తనతో ఎప్పుడూ “సత్యమే” మాట్లాడండి. (ఎఫెసీయులు 4:25) కోపం కట్టలు తెంచుకునే పరిస్థితి వచ్చినాసరే గొడవపడాలనే తపనను అణచుకోండి. ఒక చిన్న చర్చతో పోయేది పెద్ద రణరంగంలా మారకూడదంటే మృదువుగా జవాబివ్వాలి.—సామెతలు 15:4; 26:20.

తన అభిప్రాయం మీకు నచ్చకపోయినా సౌమ్యంగా మాట్లాడండి. మీ జీవిత భాగస్వామిపట్ల ప్రేమాగౌరవాలు చూపించడం ఎన్నడూ మరవకండి. (కొలొస్సయులు 4:6) వీలైనంత త్వరగా సమస్యను పరిష్కరించే ప్రయత్నం చేయండి. మాట్లాడుకోవడం మానకండి.—ఎఫెసీయులు 4:26.

మీరు ఏమి చేయవచ్చంటే . . .

• సమస్య గురించి మాట్లాడడానికి సరైన సమయం ఎంచుకోండి

• తను మాట్లాడుతున్నప్పుడు మధ్యలో మాట్లాడాలనే ఆరాటాన్ని అణచుకోండి. మీకూ మాట్లాడే అవకాశం వస్తుంది

బైబిలు ఏమి చెబుతోందంటే . . . “సహోదర ప్రేమ విషయములో ఒకనియందొకడు అనురాగముగల వారై, ఘనతవిషయములో ఒకనినొకడు గొప్పగా ఎంచుకొనుడి.” (రోమీయులు 12:10) మీరు ఎలా వింటున్నారనేది చాలా ముఖ్యం. సానుభూతితో, ‘వినయంతో’ విషయాన్ని తనవైపు నుండి ఆలోచించడానికి ప్రయత్నించండి. (1 పేతురు 3:8; యాకోబు 1:19) వింటున్నట్టు నటించకండి. వీలైతే, చేస్తున్న పని కాసేపు పక్కనపెట్టి తను చెప్పేదేంటో మనసుపెట్టి వినండి. వీలుకాకపోతే, ఆ విషయం గురించి తర్వాత మాట్లాడవచ్చేమో అడిగి చూడండి. మీ జీవిత భాగస్వామి మీ ప్రత్యర్థి కాదు, తనూ మీ జట్టే అనుకుంటే మీరు ‘ఆత్రపడి కోప్పడరు.’—ప్రసంగి 7:9.

మీరు ఏమి చేయవచ్చంటే . . .

• విశాల హృదయంతో వినండి. తను చెప్పేది మీకు నచ్చకపోయినా సరే వినండి

• మాటల వెనకున్న భావాన్ని వినండి. తన హావభావాలను, స్వరాన్ని గమనించండి

బైబిలు ఏమి చెబుతోందంటే . . . “ఏ కష్టము చేసినను లాభమే కలుగును వట్టి మాటలు లేమిడికి కారణములు.” (సామెతలు 14:23) ఇద్దరూ కలిసి మంచి పరిష్కారాన్ని కనిపెట్టడం ఒక్కటే సరిపోదు, దాన్ని అమలు చేయాలి. దానికోసం ఎంతో కష్టపడాల్సి రావచ్చు, పట్టుదలతో ప్రయత్నించాల్సి రావచ్చు. అయితే మీ శ్రమ వృథా కాదు. (సామెతలు 10:4) మీరిద్దరూ ఒక జట్టుగా పనిచేస్తే, మీ కష్టానికి “మంచిఫలము” పొందుతారు.—ప్రసంగి 4:9.

మీరు ఏమి చేయవచ్చంటే . . .

• మీ సమస్యను పరిష్కరించుకోవడానికి ఒక్కొక్కరు ఏమేమి చేయాలనుకుంటున్నారో నిర్ణయించుకోండి

• వాటిని ఎంతవరకు సాధించారో ఎప్పటికప్పుడు పరిశీలించుకుంటూ ఉండండి