యోబు 7:1-21
7 “భూమ్మీద మనిషి జీవితం బలవంతపు సేవ లాంటిది.అతని రోజులు కూలివాడి రోజుల లాంటివి.+
2 దాసునిలా అతను నీడ కోసం తపిస్తాడు,కూలివాడిలా తన జీతం కోసం ఎదురుచూస్తాడు.+
3 కొన్ని నెలలపాటు వ్యర్థమైన జీవితం నాకు నియమించబడింది,కష్టాలతో నిండిన రాత్రులు నాకోసం లెక్కించబడ్డాయి.+
4 నేను పడుకున్నప్పుడు, ‘ఎప్పుడు లేస్తానో?’ అని అనుకుంటాను,+
అయితే రాత్రి గడిచేకొద్దీ, తెల్లారే* వరకు నిద్రపట్టక అటూఇటూ దొర్లుతుంటాను.
5 నా ఒంటి నిండా పురుగులు, మట్టిపెళ్లలే ఉన్నాయి;+నా చర్మమంతా పక్కులతో నిండిపోయి చీము కారుతోంది.+
6 నా రోజులు నేతగాడి నాడె కన్నా త్వరగా గడిచిపోతున్నాయి,+ఎలాంటి ఆశాభావం లేకుండానే ముగిసిపోతున్నాయి.+
7 దేవా, నా జీవితం గాలి లాంటిదని,+నా కన్ను ఇంకెప్పుడూ సంతోషాన్ని* చూడదని గుర్తుచేసుకో.
8 ఇప్పుడు నన్ను చూసే కళ్లు ఇంకెప్పుడూ నన్ను చూడవు;నీ కళ్లు నా కోసం చూస్తాయి, కానీ నేను ఉండను.+
9 విడిపోయి కనుమరుగయ్యే మేఘంలాగే,సమాధిలోకి* వెళ్లే వ్యక్తి మళ్లీ పైకి రాడు.+
10 అతను మళ్లీ తన ఇంటికి తిరిగెళ్లడు,అతని స్థలం ఇక అతన్ని గుర్తుపట్టదు.+
11 అందుకే నేను మౌనంగా ఉండను.
నా హృదయంలోని* వేదనను బట్టి మాట్లాడతాను;తీవ్రమైన మనోవేదనతో+ ఫిర్యాదు చేస్తాను.
12 నువ్వు నా మీద కాపలా ఉంచడానికినేను సముద్రాన్నా? భారీ సముద్రప్రాణినా?
13 నేను, ‘నా మంచం నన్ను ఓదారుస్తుంది;నా పరుపు నాకు ఉపశమనాన్ని ఇస్తుంది’ అని అనుకున్నప్పుడు
14 నువ్వు కలలతో నన్ను భయపెడతావు,దర్శనాలతో నన్ను బెదరగొడతావు,
15 ఇంతకన్నా ఊపిరాడక చావడమే నాకు మేలు,అవును, ఈ శరీరంతో బ్రతకడం కన్నా చావడమే నయం.+
16 నా జీవితం మీద నాకు విరక్తి కలిగింది;+ ఇక బ్రతకాలని లేదు.
నన్నిలా వదిలేయి, ఎందుకంటే నా రోజులు ఊపిరిలాంటివి.+
17 నువ్వు మనిషి గురించి ఇంతగా పట్టించుకోవడానికి,అతని మీద దృష్టి నిలపడానికి అతను ఏపాటివాడు?+
18 నువ్వు ప్రతీ ఉదయం అతని మీద ఎందుకు దృష్టిపెడుతున్నావు?ప్రతీక్షణం అతన్ని ఎందుకు పరీక్షిస్తున్నావు?+
19 నువ్వు నా మీద నుండి నీ దృష్టి పక్కకు తిప్పుకోవా?కనీసం గుటక వేసేంత సేపైనా నన్ను విడిచివెళ్లవా?+
20 మనుషులు చేసే ప్రతీది గమనించే దేవా,+
ఒకవేళ నేను పాపం చేసినా, నీకెలా హాని చేయగలను?
నన్నెందుకు గురిగా చేసుకున్నావు?
నేను నీకు భారంగా తయారయ్యానా?
21 నువ్వు నా అపరాధాన్ని ఎందుకు మన్నించవు?నా తప్పును ఎందుకు క్షమించవు?
త్వరలోనే నేను మట్టిలో నిద్రిస్తాను,+నువ్వు నాకోసం చూస్తావు, కానీ నేను ఉండను.”
