Nuabu Yesu Kiswama

Anyoika bo Nuisisiauni Oni Kaneejai Yesu?

2. Ekoto oni atitingikinit itunga naarai ice eyangaikinete apak naeoja acamun akiro nukajokak itia luce.

 Koputo Yesu

3. Kotam aitwasam ecepone. Arai mam itunganan erasakini acamun aisisia Ebaibuli, mam itingaikini ngesi. Kotoma apak naibecokina, kitwasam ebidio arai bo adioisisiaet aingarakinia nges amisiikin epone loisisiaere Ebaibuli keda itunga ka epone loepedoria ngesi aimedaun.

4. Mam itiiriani. Egelegela itunga. Arai epalunit itunganan yenikokalekon aisisia Ebaibuli arai bo nat engerit ngesi nuisisianakini Ebaibuli, koomoom nueinakinitos nges ikoni nen. Ejaasi kereka aiyuuneta nuka ediodiini nuemina ngesi? Ekuriana kereka ngesi ipajanake arai bo iidunyetake? Kocamak nges apak aomoom nuidautu aimor tetere nges epedori aseun arai iyuuni nuebala Ebaibuli.

5. Kilip kanuka itunganan yenitodunit eipud loka aisisia. Kilip Yawe kingarak ijo asalakinit imunokina nuejok nuikamunitos itunganan ngin ido kinyikok einer keda nges kitodunite asianut. Kilip apirianut tetere ijenuni apak naibusakinitor ijo apalar alosenen neejai itunganan yenimam epodokinit nuka aisisia.​—1 Kor. 9:26.