እወ፡ ይምልሶ እዩ። መጽሓፍ ቅዱስ ኰነ ናይ ሓቂ ተመክሮ ሰባት፡ ኣምላኽ ጸሎት ከም ዚምልስ የርኢ እዩ። መጽሓፍ ቅዱስ፡ “[ኣምላኽ] ትምኒት እቶም ዚፈርህዎ የዕግብ፡ ኣውያቶም ይሰምዕ፡ የናግፎም እውን” ይብል እዩ። (መዝሙር 145:19) ኣምላኽ ንጸሎትካ ዚምልሶ ወይ ዘይምልሶ ምዃኑ ግና፡ ብዓብይኡ ኣባኻ እዩ ዚምርኰስ።

ንኣምላኽ ዜገድሶ

•   ናብ ኣምላኽ ምጽላይ፣ ናብ የሱስ፡ ማርያም፡ መላእኽቲ፡ ወይ ምስልታት ከኣ ዘይምጽላይ። የሆዋ ኣምላኽ ጥራይ እዩ “ሰማዕ ጸሎት።”—መዝሙር 65:2።

•   ምስቲ ኣብ መጽሓፍ ቅዱስ ዘሎ ፍቓድ ወይ ስርዓታት ኣምላኽ ተሰማሚዕካ ምጽላይ።—1 ዮሃንስ 5:14።

•   ብስም የሱስ ምጽላይ፡ ማለት ንስልጣኑ ምቕባል። የሱስ፡ “ብዘይካ ብኣይ፡ ሓደ እኳ ናብ ኣቦ ዚመጽእ የልቦን” ኢሉ ኣሎ።—ዮሃንስ 14:6።

•   ብእምነት ምጽላይ፣ እንተ ኣድልዩ እውን ተወሳኺ እምነት ኪውሃበና ምጽላይ።—ማቴዎስ 21:22፣ ሉቃስ 17:5።

•   ትሑትን ቅኑዕን ምዃን። መጽሓፍ ቅዱስ፡ “የሆዋ ልዑል እኳ እንተ ዀነ፡ ንትሑት የስተብህለሉ” ይብል።—መዝሙር 138:6።

•   ዘይምሕላል። የሱስ፡ “ብቐጻሊ ለምኑ እሞ፡ ኪውሃበኩም እዩ” ኢሉ ኣሎ።—ሉቃስ 11:9።

ንኣምላኽ ዘየገድሶ

•   ዓሌትካ ወይ ዜግነትካ። ‘ኣምላኽ ኣየዳሉን እዩ፣ የግዳስ፡ ኣብ ኵሉ ህዝቢ፡ ንኣምላኽ ዚፈርሆን ቅኑዕ ዚገብርን፡ ብእኡ ቕቡል እዩ።’—ግብሪ ሃዋርያት 10:34, 35።

•   ኣቃውማኻ። ኮፍ ኢልካ፡ ተደፊእካ፡ ተምበርኪኽካ፡ ወይ ደው ኢልካ ናብ ኣምላኽ ክትጽሊ ትኽእል ኢኻ።—1 ዜና መዋእል 17:16፣ ነህምያ 8:6፣ ዳንኤል 6:10፣ ማርቆስ 11:25።

•   ዓው ኢልካ ይኹን ወይ ብልብኻ ምጽላይ። ኣምላኽ ካልኦት እውን ዘየስተብህሉሉ ብልቢ ዚጽለ ጸሎት ይምልስ እዩ።—ነህምያ 2:1-6።

•   ዜተሓሳስበካ ነገር ከቢድ ይኹን ወይ ቀሊል። ኣብ መጽሓፍ ቅዱስ፡ “ንሱ [ኣምላኽ] ይሓልየልኩም እዩ እሞ፡ ንዅሉ ጭንቀትኩም ናብኡ ደርብይዎ” ዚብል መተባብዒ ተዋሂቡ ኣሎ።—1 ጴጥሮስ 5:7።