“Ka mea lu vea azende a am kwagh zem iyol ga, nahan ka i taver mo tsung u yan ijende vea mbagenev.”—Mkaanem ma Alan, gumor ugen.

 “M ngu a azende kpuaa tseegh, shi ka kwagh u m soo je la. M keren u lamen a mbagenev mba m biishi a ve ga la ga.”—Mkaanem ma Sara, gumkwase ugen.

 We kpa ka mhen u Alan man Sara la u lu a mi yee? U ngu a azende a u lun vea a imôngo, nahan ka i taver we u yan ijende a mbagenevee?

 Aluer ka nahan yô, ngeren ne una wase u!

•  Mbamzeyol mba sha kwagh u lun vea azende ou tseegh la

•  Kwagh u u er yô

•  Kwagh u mbakwav wou ve ôron yô

 Aluer u ngu a azende a u lun imôngo vea a hanma shighe kpa ka kwaghbo ga. Azende a ou ka aa luun a we kôôsôô yô, u nenge wer u gba kwagh, shi er u lu a mbamshi nahan kpa, u nenge wer u ngu a ior mba ve soo kwagh wou yô.

 “Ior ka vea soo kwagh wou shi wea luun a ve imôngo yô, i saan we iyol kpishi. Ka wea lu iyev yô, i sar u u lun vea mbayev mba lun er we nahan.”—Mkaanem ma Karen, gumkwase u lun anyom 19.

 U fa kpa? Mbaapostoli mba Yesu mba 12 mbara yange ve lu ken ior kpishi mba ve lu azende a Yesu yô, kpa mbaapostoli mba utar mban; Peteru, Yakobu man Yohane hemba lun vea Yesu kôôsôô.—Marku 9:2; Luka 8:51.

 Nahan kpa, aluer u ngu lun imôngo vea azende a ou tseegh, u soo u biishi a ior mbagenev ga yô, kwagh la una fatyô u van we a mbamzeyol. Ikyav i tesen yô:

•   Kwagh la una yange u u yan ijende vea mbagenev mba ve lu a inja i dedoo yô.

   “Ka wea lu a azende a lun er we nahan tseegh yô, u kera za hemen u seer fan akaa agen ken uma ga, shi u seer fan ior mba dedoo mbagenev ga.”—Mkaanem ma Evan, gumor u lun anyom 21.

•   Kwagh ne ka a na ior ve nengen we ér u ngu or u moron iyol.

   “Ka wea luun vea azende a ou tseegh yô, i lu ior inja er u soon u lamen vea ma orgen ga nahan.”—Mkaanem ma Sara, gumkwase u lun anyom 17.

•   Kwagh ne una na u hingir or u hiin mbagenev.

   “U lu or a hiin ayongo ga kpa, aluer azende a ou a u lun imôngo vea a la nga hiin ayongo yô, fese je u hii u nengen wer ka kwaghbo ga—ka di kwaghhômon tsô.”—Mkaanem ma James, gumor u lun anyom 17.

•   Kwagh la una nyôr a we ken zayol—hemban cii je yô aluer u ngu norom wer u ya ijende vea mba ve hiin ayongo la yô.

   “Or u wan ifer môm tseegh ka nan na azende a nan a a lun imôngo vea nan la cii a hingir mbaaferev.”—Mkaanem ma Martina, gumkwase u lun anyom 17.

•   Hen sha akaa a a lu u a inja yô.

   Pine iyol you wer: ‘Ka akaainjaa a nyi nahan m soo u eren ken uma wama? Azende am ka a na i lum ican ga u eren akaa shonoo, shin ka a na i hemba taver mo u erene? Me kange ishima me za hemen u lun vea azende laa?’

   Kwaghwan u Bibilo: “Ujende mba bov mba vihin mbamlu mba dedoo.”—1 Mbakorinte 15:33.

   “Aluer kwagh gba azende a ou a u lun imôngo vea a la sha akaa a a lu u a injaa ken uma la ga yô, u hingir u eren akaa a wea ye ijende a ve ga yô, ma u er ga la.”—Mkaanem ma Ellen, gumkwase u lun anyom 14.

•   Hen sha akaa a u nenge wer hemba ngan hange hange la.

   Pine iyol you wer: ‘M ya ijende vea mbakwav wam kangenaa je yô, ka m gba eren hanma kwagh u ve soo tsô mer ijende yase i za hemene? Aluer ijende yam za er kwaghbo nahan, me er nena?’

   Kwaghwan u Bibilo: “Mba ve doom cii ka M tsaha ve.”—Mpase 3:19.

   “Aluer orgen ken azende a ou a u lun vea a imôngo la nan nyôr ken zayol man u kera na nan jighjigh ga yô, u ôr mbagen kpa a lu inja er u ngu tôôn nan teen nahan.”—Mkaanem ma Melanie, gumkwase u lun anyom 22.

•   Ya ijende vea mbagenev kpaa.

   Pine iyol you wer: ‘Aluer mbagenev mba m biishi a ve ga la kpa m ya ijende a ve yô, a wasemee?’

   Kwaghwan u Bibilo: ‘De waan akaa a ou tseegh ikyo ga, akaa a mbagenev kpa wa a ikyo.’—Mbafilipi 2:4.

   “Mbayev mba u nengen wer i soo kwagh ve ga la alaghga mba yan ican tsung hen uya vev. Ka wea biishi a ve yô, u mase kaven wer ve kpa mba a inja i dedoo.”—Mkaanem ma Brian, gumor u lun anyom 19.

 Jindikwagh: Aluer u ngu a azende a u lun imôngo vea a hanma shighe kpa ka kwaghbo ga. Kpa aluer u ya ijende a mbagenev, u saa sha azende ou a u vande lun a mi la tseegh ga yô, u zua a mtsera. Bibilo kaa ér: “Or u nan ne mngerem ma man yô, nan iyol i nan kpaa á na nan mngerem.”—Anzaakaa 11:25.