Shighe u gumor nan lu vesen a vese la ka nan lu gbon gbon shi i lu inja er nana lu a tahav iyol gbem sha won nahan. Nahan kpa, icôronuange ka i pande agumaior agen tahav ken iyol. We kpa kape i lu laa? Aluer ka nahan yô, kwagh u er V’loria man Justin kua Nisa, Mbashiada mba Yehova mba utar mban la una taver we ishima. Nenge kwagh u a wase ve u nôngon a iangev mbi mbi lu panden ve agee ken iyol kure kure ne yô.

•  V’loria

•  Justin

•  Nisa

 Shighe u m lu anyom 14 la je, alegh a iyolough am agen wa amôndo. M va nyer anyom 20 yô, m gba akpiti shi angev mbu kpen alegh mbu i yer ér lupus la kôrom kua angev mbu Lyme mbu ka mbu na or fiva kua ityough ki nandem kpoghuloo la. Ka a doon we iyol ga hanma shighe yô, i lu ican kpishi u eren hanma kwagh u u soo yô. Ashighe agen yô, alegh a iyolough am yange a kpe, hii hen iwenge zan zan due shin angahar, nahan i gba u me zende shin ikyekye i mbaawanev.

 Kwagh u vihin hemban iangev av mbin yô, yange m kera faantyô u eren akaa a kiriki kpaa ga, er u ngeren kwagh shin u bughun ikpe shin ishegh nahan. Kwagh ne na yô, ishima i zam iyol kpishi. Yange mea nenge mbayev vea zenden nahan, i taver mo er i hii ve mo m lu fantyô u zenden ga la kpishi. Nahan lum er kwagh hemban a hemba je nahan.

 Kwagh ka a er i doo yô, yange m zua a iwasen. Lu ior mba hen tsombor wam tseegh wasem ga, tiônnongo u Mbashiada mba Yehova u m zaan mbamkombo her la kpa nam iwasen. Hanma shighe yô, ior mba ken tiônnongo wam ve va nengem, nahan kera huan mo kpishi ga. Mbagenev yange ve lôhôm iniongo shin mtem, shin er yange i lu ican kpishi u dughun mo shin ikyekye yam i mbaawanev la wan mo shin mato, shi dughun mo shin mato nahan kpaa.

 Mbabeenyol mba ken tiônnongo wam yange ve hemba wasen mo cii sha ci u ve vande tagher a iangev, nahan ve fa er ka i lu oruange ken iyol yô. Yange ve wasem m hingir u nengen mer gba u akaa agen aa hemban u eren shi ishima kera nam ibo sha ci u tahav yinam u eren tom kpishi er mbagenev nahan yum ga. Ka mea za mbamkombo shi mea due kwaghpasen nahan i hemba saan mo iyol cii. (Mbaheberu 10:25) Ashighe ngara nahan ka a na yô, m nenge mer er m lu uange nahan kpa, m ngu kposo a mbagenev ga.

 Ka m umbur er Yehova a lu nan se kwagh u i gbe u se lu a mi ve se wa ishima a iangev la yô. U tesen ikyav yô, Bibilo kaa ér, aluer or wase u ken won ne ngu vihin kera kpa, or wase u kimi la “mba gem un hegh ayange ayange.” (2 Mbakorinte 4:16) Nahan kape i lum vough je la!

 Mpin u henen sha mi: Shighe u u gbe icôronuange yô, gba hange hange u u ker iwasen hen mbagenev sha ci u nyi? Aluer u ngu gbon gbon yô, u wase oruange nena?—Anzaakaa 17:17.

 Yange m gba yemen yieer tsô m gba, maa m kera fatyô u moughon sha ga. Iyav tsulem sha ishima je m lu fantyô u tenger ga. I tôôm fese i yem a mo ken iyouci, i za verem ken iyou i sôron iangev mbi ka i gba u a nenge sha mi fese la. Sha hiihii la yô, mbatwerev fatyô u fan kwagh u lu zan mo iyol ga. Kpa kwagh ne kimbir eren mo acin imôngo yô, ve mase zuan mo a angev mbu i yer ér Lyme la.

 Yange angev mbu Lyme na igbila yam kera lu eren tom tsembelee ga. Jighilii yô, iyol ka i kunden mo, ashighe agen ka i kunde je i fatyô u den fele ga, shin er i zoughom a angev mbun anyom a kar imôngo hegen nahan je kpaa. Iyol ka i nyoon mo ayange agen shin ahôaveegh a nyoon mo je m fatyô u tenger a a ga. Ka inja er uijuan av cii vihi nahan.

 Yange m hen mer, ‘Doo u mo gumor nahan me gba angev ga,’ nahan kwagh la a na ishima i vihim. Yange m vaa a Aôndo hanma iyange, m pine un mer, “Er nan ve imba kwagh ne i ereme?” Kwagh ne zam iyol je m va hii u henen mer Aôndo tam kera. Kpa m hen sha kwagh u Yobu u i er kwagh na ken Bibilo la. Yobu yange fa kwagh u na ve tagher a mbamtaver kpishi nahan ga, kpa za hemen u suur sha Aôndo sha mimi. Er Yobu yange wa ishima a mbamzeyol kpishi mba tagher a mi la yô, mo kpa me fatyô u wan ishima.

 Mbatamen mba ken tiônnongo wam mba wasen mo kpishi je. Hanma shighe ka ve va hen ya wam ve va pinem er i lum iyol yô. Ortamen ugen la kaa a mo ér mo m yilan un hanma shighe u i sarem u lamen a na cii. Hanma iyange ka m sugh Yehova sha azende a m zough a mi ne!—Anzaakaa 17:17.

 Ashighe agen ka sea gba icôronuange yô, i hungur se er Yehova fa ican i se lu yan ga nahan. Bibilo kaa ér: “Haa akaa a zan we iyol cii sha TER.” (Pasalmi 55:22) Ka kwagh u ka m nôngo u eren hanma iyange je la.

 Mpin u henen sha mi: Ior mba u doo ve ishima la vea wase u u wan ishima a zayol u uange nena?—Anzaakaa 24:10; 1 Mbatesalonika 5:11.

 Shighe u m lu anyom pue kar ataan la, m gba angev mbu sha uijuan, mbu i yer ér Marfan la. Angev mbun na uijuan av kera taver ga. Angev mbun mbua na ishima i or ia kera er tom tsembelee ga shi ashe a nan kua alegh ayolough a nan agen aa vihi. Iyol ngi nyoon mo ayange ayange ga, kpa ka ia nyoon mo yô, i nyoon mo je vaa u kaa.

 Shighe u i hii zuan mo a angev mbun la, m vaa kpishi. Ishima zam iyol sha ci u lu u me kera fatyô u eren akaa a yange i doom u eren la ga. U tesen ikyav yô, m soo amar a vinen, nahan yange mea hen er iyange igen iyol a nyoon mo a gandem u vinen amar, shi alaghga zende je kpa me fatyô u zenden ga yô, ishima i nyian mo er a va lum ken hemen la.

 Anmgbian wam u kwase u vesen yange wasem kpishi. Yange na m kera nengen iyol yam mer ikyaa tserem ga. A kaa a mo ér, ishima i de zem iyol ga, sha ci u kwagh la una na a kera saan mo iyol ken uma wam ga. Shi yange taver mo ishima ér mo m eren msen gbem, sha ci u ka Yehova tseegh a fe kwagh u a lu zan mo iyol jighilii la ye.—1 Peteru 5:7.

 Ivur Bibilo i yange i taver mo ishima jighilii yô, ka Pasalmi 18:6, i kaa ér: “Ken mkighir u i kighir mo ne, m yila TER, m genger imo, m yila Aôndo wam. A ungwa imo yam ken tempel Na, mliam am ma m vaa a Na la nyôr ken ato Na.” Ivur Bibilo ne wasem u nengen mer aluer m er msen hen Yehova shi m sôn un mer a wasem u wan ishima a angev av mbun yô, una ungwa msen wam shi una wasem. A kegh a kegh iyol u wasen mo.

 M nenge mer kwagh vihin or. Nahan ishima ia vihi se sha akaa a vihin tsung a a tser se la kpa ka kwaghbo ga, aluer se de ishimavihin la ya tor ken a vese ga shi i pav se a Aôndo ga yô. Ka Aôndo a ne ve se nyer ken mbamzeyol mba se lu ker la ga, shi una undu se mayange ga, aluer se mba suur sha na tseegh ken uma wase yô.—Yakobu 4:8.

 Mpin u henen sha mi: Doo u se na Aôndo ibo sha ican i se lu yan nee?—Yakobu 1:13.