Bibilo ôr akaa a a tese wang ér Aôndo ngu yô. Bibilo kaa a vese ér se er tom a “mhen” kua “mfe” wase man se na Aôndo jighjigh ye, se de gbe nan jighjigh a atesen a ukwaghaôndo ve tesen la tsô ga. (Mbaroma 12:1; 1 Yohane 5:20) Nenge ase er i hen sha akaa a a dondo ne ken Bibilo yô:

•   Akaa a a lu sha tar sha inja vough vough la kua akaauma cii, tese ér i gba a gba hanma kwagh. Bibilo kaa ér: “Jighilii yô, hanma ya cii ka or ka nan maa ye, kpa un u a maa akaa cii la ka Aôndo.” (Mbaheberu 3:4) Er kwagh u Bibilo i ôr sha inja ne a lihe ga nahan kpa, mba ve fe takeda kpishi yô ve nenge ér ka beerkwagh ga. *

•   Se uumace cii ka i sar se u fan ityôkyaa i se lu uma la, kua awashima u uma shon kpaa. Ka sea zua a akaa a iyolough a kwagh a gbe se a mi la cii kpa, isharen ngin yô i been ga. Bibilo ôr kwagh u isharen yase ne ér, ka isharen i mba i “sar ve tsung u fan Aôndo,” inja na yô, ka isharen i fan Aôndo shi civir un. (Mateu 5:3; Mpase 4:11) Isharen i fan Aôndo ne ka ikyav i tesen ér Aôndo ngu tseegh tsô ga, shi ngi tesen er a lu Aôndo u a gbe se shi se doo un ishima, shi a soo ér se fa un shi se civir un yô.—Mateu 4:4.

•   Yange i ôr akaaôron a profeti vighe vighe, i nger a ken Bibilo anyom kar uderi imôngo cii ve akaa shon va masen eren vough er i tsengaôron la ye. Er akaaôron a profeti a i ôr vighe vighe la va kure sha mi er i tsenga ôron la vough yô, tese ér loho la yange u due hen tahav mbu mbu gande uumace cii yô.—2 Peteru 1:⁠21.

•   Mba ve nger Bibilo la yange ve fa akaa a sha kwagh u sainsi a ior mba sha ayange a ve la fa ga yô. U tesen ikyav yô, sha ayange a tsuaa la, ior kpishi na jighjigh ér tar tema ityô sha nortar, gayô igyo-toho, gayô bua-toho. Kpa Bibilo gema kaa ér Aôndo “har tar sha ma kwagh ga.” (Yobu 26:7) Shi er tar u lu la kpa Bibilo pase vough, ér ngu “kpighikiki” shin “gbilititi,” er bol nahan. (Yesaia 40:22) Ior kpishi nenge ér, aluer i kaa ér ka Aôndo yange pase mbangeren Bibilo kwagh u orgen môm lu a fa ga ne yô, a hemba lun sha inja.

•   Bibilo na mlumun sha mbampin kpishi mba ka i taver ior u zuan a mlumun sha mi yô. Mbampin mbara nahan, ka a na or mlumun sha mi a wanger nan ga yô, nan hingir u nan jighjigh ér Aôndo ngu ga. Ikyav i tesen yô: Aluer se doo Aôndo ishima shi ngu a tahav mbu eren hanma kwagh cii yô, er nan ve a de ior ve lu yan ican shi ifer i lu sha tar nahana? Er nan ve kwaghaôndo a ne ior ve eren aferakaa, i lu akaa a dedoo ga?—Titu 1:16.