Doo u Me Er Msen hen mbajighjighi?
Mlumun u Bibilo i ne yô
Ei. Bibilo tese ér gba u se eren msen hen Aôndo tseegh, shi a lu ken iti i Yesu. Yesu yange kaa a mbahenen nav ér: “Eren nen msen nahan, ner: Ter wase u Sha, i̱ tsegha iti You.” (Mateu 6:9) Mayange Yesu kaa a mbahenen nav ér ve er msen hen mbajighjigh shin mbatyomov shin ma orgen ga, kpa yange kaa ér ve eren hen Aôndo tseegh.
Yesu shi yange kaa a mbadondon un ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” (Yohane 14:6) Ka Yesu tseegh Aôndo a ne un ian i zamber sha ci wase ye.—Mbaheberu 7:25.
Aluer m ngu eren msen hen Aôndo kua mbajighjigh di ye?
Aôndo yange ôr ken tindi ugen ken Atindi a pue la ér: “Mo TER, Aôndo wou, M ngu Aôndo u gban iwuhe.” (Ekesodu 20:5) Aôndo ka u “gban iwuhe” sha nyi gbenda? Ngeren u shin kpe u Bibilo i New American Bible la kaa ér, ka a “soo ér i civir un tseegh.” Aôndo soo ér i civir un tseegh, man er msen kpa a lu gbenda ugen u civir un yô, a soo ér se er msen hen a na tseegh.—Yesaia 48:11.
Ka sea er msen hen ma orgen kposo yô, ishima i vihi Aôndo ker, ka a̱ lu hen mbajighjigh shin mbatyomov je kpaa. Zum u apostoli Yohane soo u civir ortyom ugen yô, ortyom la venda a na ér: “De eren nahan ga! M ngu ortom a we imôngo kua anmgbianev ou mba ve lu a shiada sha kwagh u Yesu la kpaa. Civir Aôndo.”—Mpase 19:10.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Er Nan i Gbe u Se Er Msen ken Iti i Yesu?
Nenge er u eren msen ken iti i Yesu la ka a va Aôndo man Yesu a icivir yô.
