Ei, mayange a va tim Tar ne shin a nande u gayô a gba ugen ga. Bibilo tese ér Aôndo yange gba tar ne ér ior ve lu sha u gbem sha won.

• “Mbaperapera vea ya dyako u tar, vea lu ken u gbem.”—Pasalmi 37:29.

• “[Aôndo] tim tar sha amagh a u, sha er u̱ de tenger mayange ga yô.”—Pasalmi 104:5.

• “Tar yô, ngu gbem sha won.”—Orpasenkwagh 1:4.

• “U A maa tar man A er u kpaa la, ka Un A ver u ye; A gba u er u̱ lu gbilin dang ga, A maa u sha er ior ve̱ tema sha u: Ka Mo M lu TER ye, mô ugen ngu ga.”—Yesaia 45:18.

Aôndo una na uumace ian ér ve vihi tar ne gburu gburu, sha u vihin ahumbe man sha uitya gayô sha igbenda igen ga. Kpa una va “tim mba ve lu vihin tar la.” (Mpase 11:18) Una va er kwagh ne nena?

Aôndo una ver Tartor u sha u lun vough la, sha ityough ki ugomoti mba uumace, mba ve fetyô u kuran tar ga ne. (Daniel 2:44; Mateu 6:9, 10) Ka Wan u Aôndo, Yesu Kristu una va hemen Tartor ne ye. (Yesaia 9:6, 7) Shighe u Yesu lu shin tar ne la, a er uivande mba tesen ér un ngu a tahav sha akaa a Aôndo a gbe, a eren tahav la. (Marku 4:35-41) Er a lu Tor u Tartor u Aôndo yô, Yesu una va tese ér un ngu a tahav tsung sha tar ne man akaa a i gbe shin u a eren tahav la. Una va hide a gba akaa a hingir hegh shin tar ne, aa nôngo u lun vough er aa yange lu ken sule u Eden la nahan.—Mateu 19:28; Luka 23:43.

Ei, Bibilo tese nahan ga. Ior mba pinen mpin ne sha ci u ve kav kwagh u i ôr ken 2 Peteru 3:7 la ga, a kaa ér: ‘Usha mba ve lu hegen kua tar cii i ver ve sha ci u usu.’ Nenge ase akaa a vesen ahar a a wase se u kaven inja i asember ne yô:

1. Bibilo ka i er tom a “usha” man “tar” kua “usu” sha u ôron kwaghmôm tseegh ga. Ikyev i tesen yô, Genese 11:1 kaa ér: “Tar cii lu zwa môm.” Tar u i ter heen ne ngu ôron kwagh u uumace.

2. Avur a akase 2 Peteru 3:7 la pase inja i usha man tar kua usu u i ter her la. Ivur i sha 5 man 6 la tôô kwagh ne zua sha Mngerem ma Deemee ma sha ayange a Noa la. Sha shighe la, i tim tar u tsuaa la, kpa tar u inya man ikyon i lu sha mi ne yô, yange u za mape ga. Nahan kpa, Mngerem ma Deemee mara kar a “tar” shin uumace mba ve mgbough a a pera la kera. (Genese 6:11) Shi yange ma tim “usha” ugen kera, ka ior mba ve hemen uumace mba ve mgbough a apera la je la. Sha nahan yô, yange i tim aferaior, lu tar u inyaagh man ikyon ne ga. Noa vea tsombor na, yange ve war mtim ne, nahan Mngerem ma Deemee mara ma karen kera yô, ve hide ve za hemen u lun shin tar.—Genese 8:15-18.

Mtim, shin “usu” u i er kwagh u ú ken 2 Peteru 3:7 la, ua va kar a mbaaferev kera, a lu Tar u inyaagh man ikyon ne ga, er Mngerem ma Deemee mara nahan. Aôndo tôndo zwa ér una va a “usha mba hev je man tar u he u perapera una tema ker yô.” (2 Peteru 3:13) “Tar u he” shin uumace mbahev la, a lu “usha mba hev” shin hemen u he la ua hemen ve ye, ka Tartor u Aôndo je la. Sha ikyev i hemen u Tartor la yô, tar ua hingir paradiso shi bem una mgbough ker.—Mpase 21:1-4.