1 Mbakorinte 16:1-24
16 Nahan sha kwagh u kohol inyaregh sha ci u uicighanmbaiorov la yô, ne fatyô u dondon kwagh u yange m tese atôônanongo a ken Galatia la.
2 Sha hanma iyange i hiihii ken kasua* yô, hanmô wen nana̱ ver kwagh er tahav mbu nan mbu kom la, sha er shighe u me va la ne lu kohol a kohol inyaregh ga yô.
3 Kpa zum u me va yô, me tindi ior mba yange ne ôr ken washika wen ner mba a mimi iyol la, ve̱ tôô iyua i ne ne sha asema a en la, ve̱ yem a mi ken Yerusalem.
4 Nahan kpa, aluer m nenge doo u mo kpa me za ker yô, vea za ker vea mo.
5 Kpa me kar ken Masedonia cii man me va hen a ven ye, gadia m wa ishima u karen ken Masedonia,
6 man alaghga me va tsa gbem, je yô me lu vea ven zan zan shighe u wuhee* la una kar been, sha er ne verem gbenda zum u me mough u yemen pe me lu zan la yô.
7 Gadia m soo u nengen a ven di tsô maa karen yemen ga, sha ci u m ngu veren ishima u va lun vea ven shighe a̱ wa karen, aluer Yehova* lumun yô.
8 Kpa ka u me lu ken Efese zan zan shighe u Iniongo i Pentikôsti,
9 gadia i bughum hunda gbangesaa u eren ityom kpishi, kpa mbaahendanev gema ngee.
10 Nahan zum u Timoteu una va yô, nôngo nen a̱ de cian u eren ma kwagh hen atô wen ga, gadia ngu eren ka tom u Yehova,* vough er m lu eren nahan.
11 Sha nahan yô, or môm nana̱ de lahan un ga. Na un nen gbenda bem bem, sha er una va kohol mo yô, gadia m ngu keghen un vea anmgbianev.
12 Nahan gema sha kwagh u anmgbian wase Apolo yô, m taver un ishima mer a̱ va hen a ven vea anmgbianev keng keng. Gadia a wa ishima u van hen a ven hen shighe ne ga, kpa ian a va due tsô una va.
13 Lu nen per, tile nen dông sha jighjigh u nan, eren nen kwagh sha inja i nomsombaiorov,* hingir nen mbatseen asema.
14 Eren nen hanma kwagh cii sha dooshima.
15 Anmgbianev, ne fa er mba hen ya u Sefana ve lu iyiagh ki i hii sundan* ken Akaya, shi ve ne ayol a ve u eren uicighanmbaiorov tom kpaa yô. Nahan m ngu taver ne ishima mer,
16 ne kpa ma̱ ne ze hemen u ungwan imo i ambaaior la, kua mba ve lu eren tom ken ijoughave vea ve sha gbashima la cii.
17 Kpa doom kpishi er Sefana man Fotunatu kua Akaiku ve lu heen yô, sha ci u mba nan mo iwasen kpishi sha akaa a nea lu heen ve ma ne lu eren la.
18 Gadia ve taver mo ishima, kua ne cii. Sha nahan yô, naan nen ambaaior la icivir.
19 Atôônanongo a ken Ashia nga sughun ne. Akwila man Prisika kua tiônnongo u a kohol hen ya ve la, mba sughun ne kigh kigh.
20 Anmgbianev cii mba sughun ne. Sugh nen hanma wen, kuve nen ayol.*
21 Mo Paulu, m ngu ngeren ishughun yam sha uwegh agh.
22 Hanma or u Ter a doo nan ishima ga cii yô, ifyan i kôr nan. Ma u ve, Ter wase!
23 Ter Yesu a̱ za hemen u tesen ne erdoo na u sha mhôôn la.
24 Ne za hemen u doon mo ishima, ne mba ne lu ken mzough vea Kristu Yesu la cii.
Ngeren mba shin kpe
^ Ka iyange i se yer hegen ser Lahadi la. Hen Mbayuda yô, lu iyange i hiihii ken kasua je la.
^ Ura ka u nôôn shi i ndôhôr hen shighe ne.
^ Nenge Ngeren u Pasen Asember.
^ Nenge Ngeren u Pasen Asember.
^ Shin “taver nen ishima.”
^ Shin “mbahenen mba hiihii.”
^ Zwa Grika, “suse nen zwa sha gbenda u wang.”
