Luka 22:1-71
-
Upristi er mhen u wuan Yesu (1-6)
-
I wa ago iyol sha ci u Paseka u masetyô (7-13)
-
I hii kwagh u Kwaghyan u Ter u Aikighe (14-20)
-
“Or u a teem la ngu yan kwagh vea mo sha tebul” (21-23)
-
Ve gba anyiman sha kwagh u or u i nenge ér nan hemba ken a ve yô (24-27)
-
Yesu ya ikyur i Tartor (28-30)
-
Yesu tsengaôron er Peteru una venda un yô (31-34)
-
Gba u a wa iyol a keghen a kegh; usanker uhar (35-38)
-
Yesu er msen sha Uwo u Olev (39-46)
-
I kôr Yesu (47-53)
-
Peteru venda Yesu (54-62)
-
I naha Yesu tar (63-65)
-
I ôr Yesu ijir sha ishigh ki Sanhederin (66-71)
22 Hen shighe ne, Iniongo i Beredi u I We Kwa sha Mi Ga, i i yilan ér Paseka la, zurum.
2 Nahan upristi mba tamen man mbangerenatindi soo u been a na kera, kpa ve lu cian ikpelaior, nahan ve lu keren ér ian i due tsembelee.
3 Tsô Satan nyôr ken Yuda, u i yilan ér Isekarioti la, un lu môm ken Mbapuekaruhar mbara.
4 Nahan a yem a za lam a upristi mba tamen kua mbavesen mba mbakuran tempel sha kwagh u una er ve una tee ve un yô.
5 Nahan doo ve, ve lumun u nan un inyaregh.*
6 Un kpa a lumun, maa a gba keren ér ian i due tsembelee una tee ve un shighe u ikpelaior i lu ga yô.
7 Ka va nyer sha iyange i hiihii i iniongo i Beredi u I We Kwa sha Mi Ga, sha shighe u gba u a na nagh ku Paseka la yô,
8 Yesu tindi Peteru man Yohane, kaa a ve ér: “Za yôr nen Paseka se va ya.”
9 Tsô ve pine un ér: “Ka han u soo wer se za sôr u ijiiri?”
10 Nahan a kaa a ve ér: “Nenge! Ne za nyôron ken gar yô, orgen u a tee ityegh ki mnger ki inyaa yô, una zua a ven. Dondo un nen ijime za nen hen ya u una nyôr her la.
11 Kaa nen orya la ner, ‘Ortesen ér se va pine u ser: “Ruumyou u mbavannya u me ya Paseka vea mbahenen av ker ngu hana?”’
12 Nahan or shon una tese ne ruumyou u vesen sha kpoyou u sha. Er nen hanma kwagh her.”
13 Nahan ve yem ve za nenge hanma kwagh lu er Yesu kaa ve nahan, maa ve wa iyol i Paseka.
14 Shighe* la va kom yô, un vea mbaapostoli ve kase kwaghyan sha tebul.
15 Nahan a kaa a ve ér: “Sarem tsung u yan Paseka ne a ven imôngo cii me mase yan ican ye;
16 sha ci u me kaa ne, me kera ya un ga zan zan saa hanma kwagh u a gbe a zough sha mi la cii una kar kuren sha mi ken Tartor u Aôndo.”
17 Tsô a ngohol kôôpu a wain shimi, a er msen,* maa a kaa ér: “Ngohol, na nen hanma wen nana ma,
18 gadia me kaa ne, hii hegen je, me kera ma zar u atam a kon u wain ga, zan zan Tartor u Aôndo ua kar van.”
19 Shi a tôô kpenberedi, a er msen,* maa a coon a gema a na mbahenen nav, a kaa ér: “Ngohol ya nen; beredi ne tile sha ityough ki iyol yam i i gbe u a na sha ci wen la. Eren nen kwagh ne sha u umbur mo.”
20 Shi wain u shin kôôpu la kpa a er nahan, zum u ve ya kwaghyan u aikighe kera yô. A kaa ér: “Wain u shin kôôpu ne tile sha ityough ki ikyuryan i he i sha awambe a am, a i gbe u a haa inya sha ci wen la.
21 “Kpa nenge! or u a teem la ngu yan kwagh vea mo sha tebul.
22 Ka mimi, akaa a i nger sha kwagh u Wan u or la cii, aa er un. Nahan cii kpa, kwagh a tser or u nan tee un la!”
23 Mba ongo nahan yô, ve gba pinen ayol a ve or u nan lu henen u eren kwagh la ken a ve yô.
24 Nahan kpa, shi ve gba anyiman ayol a ve tsung sha kwagh u or u i nenge ér nan hemba ken a ve yô.
25 Kpa a kaa a ve ér: “Utor mba tar ne ka ve eren tahav sha ior vev, shi ior mba nengen uzegembaiorov mba ve tesen mhembe sha a ve la ér ka Mbawasenior.
26 Kpa ne yô, de lu nen nahala ga. Or u nan hembe gban kwagh ken a ven la, nana̱ lu er nan hemba ngun wanye ken a ven nahan, shi or u nan lu hemen la kpaa, nana̱ lu er or u eren mbagenev tom nahan.
27 Ka an nan hembe? Ka or u nan lu yan iwer la shin ka or u nan lu duen a iwer laa? Kera ka or u nan lu yan iwer la gaa? Kpa m ngu hen atô wen er or u duen a iwer nahan.
28 “Nahan kpa, ne yô, ne mba a mo ken atsan a am her,
29 nahan m ngu yan ikyur i tartor a ven, vough er Terem a ye ikyur i tartor a mo nahan,
30 sha er ne ya kwagh shi ne ma kwagh sha tebul wam ken Tartor wam, shi ne tema sha mkônom ma torom ne ôr uipyaven mba Iserael mba 12 la ijir yô.
31 “Shimon, Shimon, nenge! Satan soo u yegher ne cii er alakema nahan.
32 Kpa m er msen m zamber sha ci wou, sha u jighjigh u nan wou a de ndôhôr ga yô; nahan we, zum u u hide* yô, taver anmgbianev ou asema.”
33 Tsô a kaa a na ér: “Tere, a̱ lu ken purusu shin ken ku je kpa, me za a we imôngo!”
34 Kpa a kaa ér: “Peteru, me kaa u, ikyegh ia lu a tôngo nyian ga je tsô, u tuna kwa tar wer u fam ga.”
35 Shi a kaa a ve ér: “Shighe u m tindi ne la, ne za a ikpa i wan inyaregh shin ikpa i wan kwaghyan ga, shin akôv agen* kpaa ga, kpa kwagh ban ne ga, shin yange ban ne?” Ve kaa ér: “Ei!”
36 Maa a kaa a ve ér: “Kpa hegen yô, or a̱ lu a ikpa i wan inyaregh shin ikpa i wan kwaghyan kpaa, nana tôô, shi or u nan lu a sanker ga yô, nana tee ikyondo i nan i haan iyol, nana yam môm.
37 Me kaa ne, gba u kwagh u i nger la una kure sha a mo keng, ér, ‘I wa un ken mbaperenatindi.’ Kwagh ne ngu kuren sha mo hegen.”
38 Tsô ve kaa ér: “Tere, nenge, usanker uhar mba heen.” Maa a gema a kaa a ve ér: “Kuma nahan.”
39 Moughon yô, a gba yemen sha Uwo u Olev, er vanden eren nahan; mbahenen nav dondo un ijime.
40 Za nyer hen ijiir la yô, a kaa a ve ér: “Eren nen msen sha er ne gba ken imeen ga yô.”
41 Maa a undu ve a yem kuma er ka i ker iwen i za gba nahan, a za gure inya, a gba eren msen
42 kaan ér: “Tere, wea lumun yô, karem a kôôpu ne sha. Nahan kpa, i de eren sha ishima yam ga, kpa i er sha ishima you.”
43 Tsô ortyom u sha va ande hen a na, gba taver un ishima.
44 Kpa ishima za un iyol tsung, nahan a za hemen u eren msen kpoghuloo, je yô, iusa na hingir er ka aberawambe nahan, lu nôndon haan inya.
45 Va moughon ape lu eren msen la ze hen mbahenen yô, a kohol ve ve lu yaven, sha ci u ve zungwe je tume ve iyol.
46 Maa a kaa a ve ér: “Er nan ne lu yavena? Mough nen sha za nen hemen u eren msen, sha er ne gba ken imeen ga yô.”
47 Er lu lamen zan a mi ave la je, ikpelaior va nyôr, man lu or u i yilan ér Yuda, u lu môm ken Mbapuekaruhar la, lu hemen ve ye. Nahan a kar a za kohol Yesu, a suse un zwa.
48 Kpa Yesu kaa a na ér: “Yuda, u ngu teen Wan u or sha u susen un zwaa?”
49 Mba ve lu a na la mba nengen kwagh u i soo u eren la yô, ve pine ér: “Tere, se gber ve sankere?”
50 Ugen ken a ve je yô, gber kpan u pristi u vesen sanker, bugh un tough ku yanegh.
51 Kpa Yesu kaa ér: “De nen nahan.” Maa a bende uwegh sha tough ku shon, a er ku hide ku lu her dedoo.
52 Yesu maa kaa a upristi mba tamen man mbavesen mba mbakuran tempel kua mbatamen mba ve va u va kôron un la ér: “Ne va u va kôron mo a usanker man igbough er ka ormbaiv yôô?
53 Shighe u m luun vea ven ken tempel ayange ayange la, ne kôrom ga. Kpa ka shighe wen man shighe u tahav mbu imegh mbua tema tor je ne.”
54 Tsô ve kôr un ve gba yemen a na hen ya u pristi u vesen, kpa Peteru dondo ve ijime lu van ken ica.
55 Mba keer usu hen tembeya, mba tem her imôngo mba ngur ôson yô, Peteru tema her vea ve.
56 Er Peteru tema hen iwanger i usu la yô, wankwase ugen u shiren tom hen ya la nenge a na, hide sôr kenger un, maa kaa ér: “Or ne kpa yange zenden vea na.”
57 Kpa a tuna, a kaa ér: “Kwase, m fa un ga.”
58 Shighe kar kpuaa yô, orgen shi nenge a na, maa kaa ér: “We kpa u ngu môm ken a ve.” Kpa Peteru kaa ér: “Nomsoor, ka mo ga.”
59 Shighe kar ka kom er ihwa nahan yô, orgen gba sendegh ôron ér: “Mimi je, or ne kpa yange zenden vea na, sha ci u ngu Orgalilia je ka ilian ga!”
60 Kpa Peteru kaa ér: “Nomsoor, m fa kwagh u u lu ôron la ga.” Er lu lamen zan a mi ave la je, ikyegh maa tôngo.
61 Tsô Ter gema kenger sha Peteru jighilii, maa Peteru umbur kwagh u Ter kaa a na ér: “Ikyegh ia lu a tôngo nyian ga je tsô, u vendam kwa tar” la.
62 Tsô a due ken won a za vaa tsung.
63 Tsô ior mba ve kôr Yesu mbara, gba nahan un tar shi tan un azu;
64 mba yisan un ishigh yô, ve gba kaan ér: “Wea lu profeti yô, ôr se or u nan gbidye u la.”
65 Shi ve ôr akaa agen kpishi sha a na, sha ilyahan.
66 Sev mbu va aven yô, mbavesen mba nongoior la cii kohol imôngo, ka upristi mbatamen man mbangerenatindi je la. Tsô ve yem a na hen atejir ve u Sanhederin* la, ve za kaa ér:
67 “Wea lu Kristu yô, ôr se.” Kpa a kaa a ve ér: “Luun er m ôr ne je kpa, mayange ma ne ne jighjigh ga.
68 Shi luun er m pine ne mpin kpaa, ma ne ne mlumun ga.
69 Kpa hii hegen je Wan u or una tema ken uwegh ku yanegh ku ageegh ku Aôndo.”
70 Maa ve cii ve pine ér: “Nahan u ngu Wan u Aôndo zee?” A gema a kaa a ve ér: “Ne ayol a en ne mba ôron ner m ngu Wan na.”
71 Tsô ve kaa ér: “Shi ka nyi i gbe se a mbashiadaa? Gadia se ayol a ase se ungwa kwagh ne sha zwa na.”
Ngeren mba shin kpe
^ Zwa Grika, “azurfa.”
^ Zwa Grika, “ihwa.”
^ Shin “a sugh Aôndo.”
^ Shin “a sugh Aôndo.”
^ Shin “zum u jighjigh u nan wou una hide a tsee.”
^ Shin “usanda mbagen.”
^ Shin “Mkohol u Mbaajiriv.”
