1, 2. Ka unô nahan Yehova yila ve ér ahuraior a na a sôngo sôngo?

KA UNÔ nahan ú kôr ijende a ve? Alaghga a hemba maan we iyol u yan ijende a or u mbamhen mba nanegh ve zough a mba ou, shi nan fe akaa a a gbe ú ishima shi aeren a nan kpaa a zough a a ou yô. Shi ú soo or u nan lu a inja i dedoo shi nan lu or u jighjigh, u nan eren erdoo kpaa yô.

² Aôndo ngise tsua ior mbagenev ve lu ahuraior a na a sôngo sôngo. U tesen ikyav yô, Yehova kaa ér Aberaham ka huror na. (Yesaia 41:8; Yakobu 2:23) Aôndo shi kaa wener Davidi ka ‘or u sha ishima Na vough.’ Ityôkyaa yô, Davidi doo Yehova ishima. (Aerenakaa 13:22) Shi Yehova yange kaa wener profeti Daniel kpaa “doo” un ishima “kpishi.”—Daniel 9:23.

3. Er nan ve Yehova yange tsua ior mbagenev ve lu ahuraior a na?

³ Er nan ve Yehova tsua Aberaham man Davidi man Daniel ve lu ahuraior a na? Yehova kaa a Aberaham ér: “U we imo Yam iko.” (Genese 22:18) Yehova ngu a kporom ikyua a mba ve hidi a ayol a ve ijime ve ongo imo na yô. Á kaa a Mbaiserael ér: “Ver nen ato sha imo Yam, nahan Me hingir Aôndo wen, man shi ne kpaa né hingir ior Av.” (Yeremia 7:23) Aluer we kpaa ú ngu ungwan imo i Yehova yô, ú hingir huror na!

4, 5. Yehova pasen agee a na hen mba ve civir un la nena?

⁴ Hen ase sha averen a or nana lu huror u Aôndo ve nana zua a mi la. Bibilo kaa ér Yehova wa iyol kegh a kegh “sha u Una pase agee Na hen mba asema a ve a lu jighelaa her a Na yô.” (2 Kroniku 16:9) Yehova una pase agee a na hen a we nena? Pasalmi 32:8 tese gbenda môm u una er kwagh ne yô. Ivur la kaa ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.”

⁵ Nenge mkaanem man ma tese ikyo i Yehova a we se la sha wono! Yehova una wa ú kwagh shi una wase ú u eren sha kwaghwan la. Aôndo soo ér una wase ú u wa ishima a atsan man ameen a ú tagher a mi la. (Pasalmi 55:22) Aluer ú ngu civir Yehova a ishima i môm yô, ú lu a vangertiôr er orpasalmi nahan. A kaa wener: “M ver TER sha ishigh yagh gbem; er A lum ken uwegh ku yanegh yô, me tenger ga.” (Pasalmi 16:8; 63:8) Yehova una wase ú u eren kwagh u a lu sha ishima na yô. Kpa er ú vande fan nahan, orgen ngu u a ker Aôndo ihyom, u una soo ér ú er kwagh u sha ishima i Aôndo ga yô.

6. Ka ahon a nyi Satan gba sha kwagh u uumacee?

⁶ I ôr kwagh u ahon a Satan Diabolo gba sha mtemtor u Aôndo la ken Ityough ki sha 11 ki takerada ne. Satan yange wa Aôndo kwagh iyol wener, Yehova soo mkpeyol u Adam man Ifa ga, á nyume ve ian i tsuan kwagh u ve nenge ér ka u dedoo man u bo la. Adam man Ifa gba ken kwaghbo cii ve ve hii u tseren tsombor ye. Er tsombor ve la hii u samber sha tar yô, Satan shi kaa wener uumace mba civir Aôndo ka gbilin ga. Á kaa wener. ‘Aôndo doo ior ishima ve ve civir un ga. Nam ian tsô me gema hanmaor nana de u civir Aôndo.’ Kwagh u Satan yange er a Yobu la tese ér ka kwagh u a soo ér una er a hanma or je la. Yobu lu nyi oro, man imbwase i Satan ne i wa un ker nena?

7, 8. (a) Kanyi yange i na ve Yobu lu inja kposo a ior mba sha ayange na laa? (b) Satan yange laha awashima u Yobu lu a mi u civir Aôndo la nena?

 ⁷ Shighe u Yobu lu uma la, anyom kar hegen kuma er 3,600 nahan. Yobu lu or u mimi, gadia Yehova ôr kwagh na ér: “Ma or kuma sha a na shin tar ga, ka or u mimi, u perapera, u cian Aôndo, palegh kwaghbo.” (Yobu 1:8) Yobu eren ishima i Aôndo.

⁸ Satan kaa wener Yobu gbe civir Aôndo tsô ga. Diabolo kaa a Yehova ér: “U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar. Kpa naregh ase uwegh Ough, bende akaa a a lu a mi la cii, tsô una venda U sha ishigh Yough je!”—Yobu 1:10, 11.

9. Yehova yange er nan sha imbwase i Satan kaa laa, man er nan ve er nahana?

⁹ Satan yange kaa wener, Yobu civir Aôndo sha ci u akaa a dedoo a á ne un la. Diabolo shi kaa wener, aluer i kar Yobu yô, una de u civir Aôndo. Yehova yange er nan sha imbwase i Satan nee? Er Satan kaa wener Yobu ngu civir Aôndo sha er una zua a mtsera yô, Yehova na un ian ér á kar Yobu. Ian i í na Satan la lu u fan aluer mimi je Aôndo doo Yobu ishima shin a doo un ishima ga kpaa.

10. Ka atsan a nyi nahan yange tser Yobu, man á er nena?

¹⁰ Satan yange kar Yobu sha igbenda kposo kposo. Ikyaren i Yobu hii tagher a mi yô, í pande í ii un uzendenya, shi i wua mbatomov nav mbagenev kpaa. Kwagh ne na yô, Yobu gba ican. Kwagh ugen u shi er Yobu yô, uraahumbe wua un ônov pue. Akaakpilighyol a a er Yobu ne cii, á er “kwaghbo ga, a na Aôndo ibo er A er kwagh u kpeegh kpaa ga.”—Yobu 1:22.

11. (a) Kanyi kwagh igen Satan va a mi sha iyol i Yobu, man Yehova er nan sha kwagh nee? (b) Yobu er nan sha angev mbu nyoon mbu Satan ta un laa?

¹¹ Satan de ga. Alaghga lu henen wener shin er Yobu wa  ishima a akaa a á saa un ishe man ku u ônov nav kua mbatomov nav nahan kpa, aluer á gba angev yô una de u civir Aôndo. Yehova yange na Satan ian ta Yobu bouange u nyoon tsung. Kpa mayange je, Yobu de u nan Aôndo jighjigh ga. Yobu gema kaa wener: “Zan zan me kpe je kpaa, me gbihi mimi wam ga.”—Yobu 27:5.

12. Mtil u Yobu tile sha mimi la tese ér imbwase i Diabolo kaa la lu aie nena?

¹² Yobu fa ér ka Satan a lu nan un ican ga. Er fa kwagh u ilyahan i Diabolo laha mtemtor u Yehova la vighe vighe ga yô, yange hen wener ka Aôndo jighilii je a lu nan un ican ye. (Yobu 6:4; 16:11-14) Er hen nahan kpa, tile sha mimi sha ishigh ki Yehova. Mtil u Yobu tile sha mimi la tese ér Satan er aie. Gadia kwagh u a wa Yobu iyol ér ngu civir Aôndo sha ci u akaa a dedoo a Aôndo a ne un la, lu mimi ga.

13. Mtil u Yobu tile sha mimi la gema va a nyi?

¹³ Mtil u Yobu tile sha mimi la yange na Yehova kaa Satan imo gbar gbar sha imbwase na i kôron iyol la. Yobu lu huror u Yehova u mimi, nahan Aôndo na un iveren sha jighjigh na u nan la.—Yobu 42:12-17.

14, 15. Se fatyô u kaan ser imbwase i Satan kaa Yobu la i kua uumace ker cii nena?

¹⁴ Ikyaa i Satan due a mi ér or môm nana fatyô u tilen sha mimi ga la saa sha Yobu tseegh ga. Í bende a we kpaa. Yehova kaa ken Anzaakaa 27:11 ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.” I nger mkaanem man zum u Yobu kpe anyom kar uderi imôngo yô. Sha shighe la je kpa Satan lu lahan Aôndo kua mbacivir Un her tsô. Nahan zum u se er kwagh sha ishima i Yehova yô, ka se na un ityôkyaa jighilii i una kaa Satan imo sha imbwase na i aiegh la yô. Shi ka se na i saan Aôndo iyol kpaa. U nenge nan sha kwagh ne? A lu kwagh u dedoo u nan Aôndo ityôkyaa i una na Diabolo ikyar sha mbaaie nav, aluer gba u ú gema uma wou je kpaa ga he?

 ¹⁵ Kwagh ugen yô, Satan kaa wener: ‘Hanma kwagh u or nan lu a mi cii, nana na sha ci u uma u nan.’ (Yobu 2:4) Kwagh u Satan kaa ér “or” la tese wang ér ka Yobu tseegh lu ôron ga, kpa ka uumace cii. Kwagh ne ka kwagh u hange hange u i gbe u se fa yô. Ka we jighilii Satan a kaa ér we ú fatyô u tilen sha mimi hen Aôndo ga ye. Diabolo soo wener shighe u kwagh a tsule ú yô, u hemba Aôndo ato shi u de u eren kwagh u perapera. Satan ngu a er kwagh ne nena?

16. (a) Ka igbenda i nyi Satan a lu kôron ave sha mi sha u una yange ior ve de u civir Aôndo? (b) Satan una fatyô u meen we sha igbenda ne nena?

¹⁶ Se vande timen sha igbenda wue wue i Satan a lu yaren tom a mi u yangen ior u civir Aôndo ken Ityough ki sha 10 ki takerada ne. Shi te num sha ior er ‘begha u tan kume, keren or u una ya nahan.’ (1 Peteru 5:8) Ú nenge num tan u Satan ne zum u azende a ou man mba hen tsombor wou shin mbagenev ve mough ahendan a we ér ú de u henen Bibilo shi ú de u eren sha kwagh u ú lu henen la yô. * (Yohane 15:19, 20) Heela tseegh ga, Satan “ka a gema iyol na er ka ortyom u iwanger nahan.” (2 Mbakorinte 11:14) Diabolo una fatyô u kôron ave sha igbenda i ken myer sha u nzughul a we shi meen we ér ú de u civir Aôndo. Shi una na iyol ia kpe ú ker, alaghga una na ú hen wer ú kuma u kuran atindi a Aôndo ga. (Anzaakaa 24:10) Satan una taan num sha ior er “begha u tan kume nahan,” shin una geman “iyol na er ka ortyom u iwanger nahan” kpa, kwagh gema sha imbwase na la ga. Á kaa wener: Aluer ú ya ican yô, ú de u civir Aôndo. Nahan ú tese wer Satan er aie, shi ú fatyô u tilen sha mimi hen Aôndo er Yobu nahan nena?

17. Ka ityôkyaa i vesen i nyi i ne ve i gbe u se kuran atindi a Yehova?

¹⁷ Ú fatyô u nan ikyar sha imbwase i Satan la sha u eren kwagh u sha ishima i Aôndo. Ú er kwagh ne nena? Bibilo kaa ér: “TER Aôndo A̱ doo u ishima a ishima you cii man a uma wou cii man a agee ou cii.” (Duteronomi 6:5) Aluer Aôndo za hemen u doon we ishima yô, a sar ú u eren ishima na. Apostoli Paulu nger wener: “Ka dooshima u Aôndo ne, ka u se̱ kuran atindi a Na.” Aluer Yehova doo ú ishima a ishima you cii yô, “atindi a Na” aa “yuhwa” ú ga.—1 Yohane 5:3.

18, 19. (a) Atindi a Yehova agen ka nyi man nyi? (Nenge akwati u a lu sha peeji 122 la.) (b) Er nan ve se fe ser Aôndo kighir se ér se er kwagh u a hembe se agee ga?

¹⁸ Kanyi i lu atindi a Yehova? Atindi ne agen kua aeren a i gbe u se nyagh yô. U tesen ikyav yô, nenge akwati u a kaa ér “Palegh Kwagh u Yehova Á Ker Un Ihyom Cii,” u a lu sha peeji 122 la. Í nger aeren a Bibilo i soo ér se palegh la ken akwati ne kpeher kpeher. Aluer ú ôr aeren ne, ú gbidye kwar sha mi ga yô, alaghga ú hen wer ka a bo ga. Kpa aluer ú ôr avur a Bibilo a í tese ér i̱ ôr a la shi ú gbidye kwar sha a yô, ú nenge er atindi a Yehova a lu a inja yô. Alaghga a taver we kpishi u den aeren a ú eren la. Nahan kpa, aluer ú de á ú gema eren ishima i Aôndo yô, ú zua a mkom u vesen man msaanyol u hemban cii. (Yesaia 48:17, 18) Man ka kwagh u ú fatyô u eren yô. Er nan ve se fe ser ú fatyô?

¹⁹ Mayange je, Yehova kighir se ér se er kwagh u a gande se agee ga. (Duteronomi 30:11-14) Á fa tahav asev man mbamyen asev hemba se iyol yase. (Pasalmi 103:14) Heela tseegh ga, Yehova shi una fatyô u taver se ishima sha er se fatyô u ungwan imo na yô. Apostoli Paulu nger wener: “Aôndo yô, ka u jighjigh, Una rumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.” (1 Mbakorinte 10:13) Paulu yange wa ishima a atsan kpishi nahan á kaa wener: “M ngu  a agee a eren akaa cii je ken Un u A taver mo ne.”—Mbafilipi 4:13.

20. Ka aeren a Aôndo a nyi i gbe u ú lu a mini, man er nan ve i gbe hange hange u ú lu a aeren nee?

²⁰ Nahan kpa kwagh ngu hemba di u eren kwagh u a lu sha ishima i Aôndo shi kôron akaa a á ker a ihyom la. Gba u hanma kwagh u a doo Aôndo ishima cii yô, se kpa a doo se ishima. (Mbaromanu 12:9) Ka i hemba maan we iyol u kôron  ijende a ior mba mbamhen vev ve zough a mba ou, shi ve fe akaa a a gbe ú ishima shi aeren a ve kpaa a zough a a ou la ga he? Yehova kpa, ka hembe maan un iyol a amba a ior la. Nahan nôngo hen akaa a a doo Yehova ishima tsung la. Pasalmi 15:1-5 pase ambaaior a Aôndo a soo yô. Mba ve lu ahuraior a Yehova yô, mba a ieren i Bibilo i yer ér “ityamegh ki Jijingi” la. Aeren a ityamegh kin yô, ka “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.”—Mbagalatia 5:22, 23.

21. Kanyi ia wase ú u lun a aeren a Aôndo a soo laa?

 ²¹ Aluer ú ngu ôron Bibilo shi henen i̱ nduuruu yô, ia wase ú u lun a aeren a Aôndo a soo la. Shi u henen akaa a Aôndo a soo ér u eren la kpaa una wase ú sha er mbamhen ou vea zua a mbamhen mba Aôndo yô. (Yesaia 30:20, 21) Aluer m doo u Yehova a doo ú ishima la seer taver a taver yô, a lu hemban saren we u eren akaa sha ishima i Aôndo kpaa.

22. Aluer ú ngu eren kwagh u Aôndo a soo yô, kwagh la una wase ú nena?

²² Aluer or soo u eren kwagh u doon Yehova ishima yô, gba u nana tema a tema ga. Bibilo tôô mgem u geman uma wou la kar sha m-er u eren aeren a ou a tse la haan kera geman huan aeren a he iyol. (Mbakolose 3:9, 10) Orpasalmi ôr kwagh u atindi a Yehova wener: “U wan a iko yô, ka zegeinjar.” (Pasalmi 19:11) Aluer we kpaa ú er kwagh u Aôndo á soo yô, ú zua a injar i vesen. Kwagh ne una wase ú u nan Yehova ityôkyaa i una kaa Satan imo sha imbwase na la, nahan a saan un iyol!