Yesu yange va shin tar sha u va yôôn loho u dedoo u Tartor u Aôndo. Yehova yange na un icighan jijingi ér a er uivande, sha u tesen kwagh u Yesu una va er shighe u una lu Tor la yô. Yesu yange bee ior hanma inja i uange cii. Hanma ijiir i Yesu yange una za cii yô, ior ve va hen a na ér a wase ve, nahan a bee ve cii iangev vev. Yange bugh mbaapirashe ashe, shi bugh mbaakondoato ato, shi mbakpenalegh kpa bee ve angev vev, ve hide ve lu zenden, shi dugh ujijingi mba bov ken ior kera. Yange or a bende a ikyondo na tseegh kpa, angev mbu bee nan. Hanma ijiir i Yesu una zaan cii ior ve dondon un ijime. Yange ior vea va hen Yesu shighe u a soo u lun tswen kpa, a zenda ve ga.

Kwa gen la i va a orkpenalegh hen iyou igen i Yesu lu ker yô. Kpa ior ngee ken iyou la je i fatyô u nyôron a or shon ker ga. Nahan mba ve va a na la unde a na ve za pev haav mbu iyou la, maa ve sen a or la hen ijiir i Yesu lu la. Yesu gema kaa a or la ér: ‘Mough sha zende.’ Or la moughon zenden yô, kpiligh ior iyol kpishi.

Shi kwa gen la, Yesu za nyôron hen angeri ugen yô, a nenge mbaamandev tile ken ica lu yilan un kaan ér: ‘Yesu, wase se!’ Sha ayange la i lumun ér mbaamandev ve va ikyua a ior ga. Tsô Yesu kaa a ve ér ve yem ken tempel, sha ci u Tindi u Yehova ugen yange tese ér aluer i wanger or imande yô, nana er nahan. Mba ngur yemen yô, imande ve la maa za bee sha gbenda. Orimande ugen la nengen ér imande na bee yô, a hide a va sugh Yesu shi a wuese Aôndo. Ken  mbaamandev mba puev mbara cii, lu orimande ne tseegh sugh Yesu ye.

Kwase ugen yange lu dedoo ga je kuma anyom 12. Lu keren gbenda sha afatyô na cii ér angev nav mbura mbu bee. Yesu va nguren karen yô, kwase shon nyôr ken ikpelaior ving ving za bende uwegh sha riga i Yesu. Maa fese je angev nav bee. Tsô Yesu gba pinen ér: ‘Ka an nan bende a mo?’ Yange cier kwase la iyol tsung, kpa a za due ken atô u ikpelaior la, a va ôr Yesu kwagh sha mimi. Yesu gema ôr kwagh u kundun kwase la iyol, a kaa a na ér: ‘Wankwase, za dedoo.’

Torshoja ugen, iti na ér Yairu, yange zamber a Yesu kaa ér: ‘Wea lumun yô, va hen ya wam! Wan wam u kwase u kiriki ngu dedoo ga.’ Kpa Yesu lu a za nyôr hen ya u Yairu ga tsô wankwase la kpe. Yesu za nyôron yô, a nenge ior kpishi zua her lu zungwen ku a tsombor u Yairu. Tsô Yesu kaa a ve ér: ‘De vaan nen ga; ngu yaven a yav.’ Yesu maa za uwegh kôr wankwase la, kaa ér: ‘Wana, mough sha!’ Her ave ave je maa wankwase la mough tema sha. Yesu kaa a mbamaren nav ér ve na un kwaghyan, a ya. Hen ase er yange a lu mbamaren mba wankwase la ken ishima yô!