Yehova, Aôndo u sar sar, u a soo ér icombor i lu saan saan la ôr se loho u dedoo. (1 Timoteu 1:11, NW) Ka un yange hii kwagh u ivesegh ye. U eren ivaa sha tindi la ka kwagh u vesen u van a msaanyol hen tsombor, sha ci u ivaa i sha tindi ka i na mbamaren man mbayev ve lu saan saan shi ve soo ayol a ve. Gba u Mbakristu vea dondo atindi a hen ijiir ve a sha kwagh u ngeren ivaa.—Ôr Luka 2:1, 4, 5

Aôndo nengen ivaa nena? A soo ér ivaa i lu mzough u nom man kwase u lun igbekeke. Yehova soo ér noov man kasev ve eren kwagh a ayol a ve sha mimi. (Mbaheberu 13:4) A kôr ivaapaven ihyom. (Malaki 2:16) Kpa a na ian ér Orkristu nana fatyô u paven ivaa, hiden eren igen, aluer ikyar u nan a er idya yô.—Ôr Mateu 19:3-6, 9.

Yehova yange gba nomso man kasev ér ve wasen ayol a ve ken ivaa ve. (Genese 2:18) Er nom a lu ityough ki tsombor na yô, gba u una nengen sha ugbayol mba tsombor na, shi una tesen ve kwagh u Aôndo kpaa. Gba u una lu a dooshima u tangen iyol ga la sha kwase na. Noov man kasev ve̱ soo ayol a ve shi ve̱ naan ayol a ve icivir. Er noov man kasev cii ve yen yô, ka hange hange u vea hen ieren i den orgen a kwaghbo la, gadia kwagh ne una wase u van a msaanyol ken ivaa ve.—Ôr Mbaefese 4:31, 32; 5:22-25, 33; 1 Peteru 3:7.

Aluer we man orya wou shin kwase wou ne mba lun a mbamzeyol yô, hen nen u eren kwagh a ayol a en sha dooshima. (1 Mbakorinte 13:4, 5) Mkaanem ma Aôndo na se ian  i undun or u se vese nan la sha u nôngon ser se sôr mbamzeyol mba avese kpishi a tagher a mi la ga.—Ôr 1 Mbakorinte 7:10-13.

Yehova soo ér i saan ne iyol. A na ne kwaghwan u hemban doon cii, u tesen ne er ne ember shighe u ne lu iyev ne yô. A soo ér ne zua a mtsera ken kwaghfan man mkav u mbamaren enev ve lu a mi la. (Mbakolose 3:20) Yehova soo ér ne zua a iember ken akaa a ne eren sha ci u Orgban wen man Wan na kpaa la.—Ôr Orpasenkwagh 11:9–12:1; Mateu 19:13-15; 21:15, 16.

Gba u ne eren tom taveraa sha er ne naan ônov enev kwaghyan shi vea lu a ijiir i tsan man akondo yô. (1 Timoteu 5:8) Kpa u mbayev enev ve zua a msaanyol yô, gba u ne tese ve u soon Aôndo shi henen kwagh sha ikyev na. (Mbaefese 6:4) Aluer u ngu eren akaa a tesen ér Aôndo doo u ishima yô, ikyav you la ia kôr wan wou ken ishima tsung je. Aluer kwaghwan wou har sha Mkaanem ma Aôndo yô, una fatyô u maan mhen u wan wou la sha gbenda u dedoo.—Ôr Duteronomi 6:4-7; Anzaakaa 22:6.

Ka wea taver mbayev ishima shi wea wuese ve yô, kwagh ne a wase ve. Shi gba u a kôôm ve shi a tsaha ve. Ka a yesen ônov nahan yô, ityesen i i lu nan ve la i kura ve sha aeren a ma a yange ve u zuan a msaanyol la. (Anzaakaa 22:15) Nahan cii kpa, gba u a tsahan mbayev sha ishimanyoon shin sha tswam ga.—Ôr Mbakolose 3:21.

Mbashiada mba Yehova gber ityakerada kpishi sha ci u wasen mbamaren man mbayev. Ityakerada ne cii har sha Bibilo.—Ôr Pasalmi 19:7, 11.