VEGHER U SHA 9
Civir Nen Yehova Imôngo hen Tsombor
“Civir nen Un u A er Sha man tar” la.
Er u hen ken antakerada ne nahan, Bibilo ngi a akaawan kpishi a aa wase u kua tsombor wou yô. Yehova soo ér i saan ne iyol. A tôndo zwa ér aluer ne ver mcivir na hiihii yô, “akaa ne cii á seer ne a.” (Mateu 6:33) Mimi je, a soo ér u lu ijende na. Nahan nôngo sha afatyô wou cii ya ijende a Aôndo. Aluer or ya ijende a Aôndo yô, nan ngu sha ian i icivirigh i hemban cii.
1 TAVER NEN IKYAR I NE YE VEA YEHOVA LA
KWAGH U BIBILO I KAA YÔ: “Me lu Ter wen, ne di né lum ônov mba nomso man ônov mba kasev, kape Ter Uhembanagee, A kaa la.” (2 Mbakorinte 6:18) Aôndo soo ér we u ya ijende a na kôôsôô. Gbenda môm u eren kwagh ne yô, ka u lamen a na ken msen. Yehova ngu kaan a we ér we u ‘eren msen gbem.’ (1 Mbatesalonika 5:17) Sar un u ma u pasen un mbamhen ou kua mbamzeyol ou. (Mbafilipi 4:6) Aluer u ngu eren msen vea tsombor wou yô, vea kav er u nenge wer Yehova ka or kpôô kpôô yô.
Gba u ú lamen a Aôndo ken msen tseegh ga, gba u ú keghen ato a na kpaa. U fatyô u eren kwagh ne sha u henen Mkaanem nam kua ityakerada i pasen Bibilo. (Pasalmi 1:
Gbenda môm u ú taver ikyar i u ye vea Yehova la yô, ka u ôron mbagenev kwagh na. Aluer u ngu eren kwagh ne seer a seer yô, Yehova una lu hemban doon we ishima cii.
KWAGH U NE FATYÔ U EREN YÔ:
-
Ver nen shighe u ôron Bibilo ayange ayange shi eren msen
-
Akaa a ken jijingi a hemba lun tsombor wen kwagh u vesen, a iemberyolough
2 EREN NEN MCIVIR U HEN TSOMBOR *
KWAGH U BIBILO I KAA YÔ: “Kporom nen hen Aôndo, Un kpaa, Una kporom her a ven.” (Yakobu 4:8) Gba u ne ver shighe u eren mcivir u hen tsombor, shi ne dondon shighe shon kpaa. (Genese 18:19) Kpa ka cii la ga. Gba u ne umbur Aôndo ken akaa a ne eren ayange ayange la. Wase tsombor wou u ya ijende a Yehova taveraa sha u ôron u kwagh na “zum u wea tema hen ya wou man zum u wea zenden sha gbenda man zum u wea yav inya man zum u wea moughon sha” kpaa. (Duteronomi 6:6, 7) Er kwagh er Yosua nahan. Yange kaa ér: “Mo a ya wam cii yô, ka TER sé civir Un ye.”—Yosua 24:15.
KWAGH U NE FATYÔ U EREN YÔ:
-
Henen nen kwagh hen tsombor wen sha ashighe a ne ver la vough vough, sha gbenda u a wase hanmô wen yô
^ par. 12 Hanma tsombor u Mbashiada mba Yehova yô, u ver shighe u kohol imôngo civir Yehova ken hanma kasua. Ka u lam sha akaa a ken jijingi kundu kundu.
