Bibilo Gem Ior

Kanyi yange i wase nomsoor ugen u yange hii u man ikya man taav iyev je u den ieren ne? Lu nyi i wase orgen u lu ken mzough u agumaior a wan tswam ve de ishimanyoon kua ihyom i kôron akuraior agene? Nenge ase kwagh u iorov mba uhar mban ve ôr shin heen ne.

FA KWAGH NA

ITI: HEINRICH MAAR

ANYOM: 38

TAR NA: KAZAKHSTAN

OR U YANGE LU YÔ: LU OR U MAN IKYA KUA TAAV KPOGHULOO

SHIGHE U M LU IYEV LA: Yange i marem hen angar ugen ken imbusutariyan i tar Kazakhstan, ikyua a gar u Tashkent er ukilomita 120 nahan. Yange á lu inyom yô, ijiir ne i tsee je i kuma udigirii 110 sha ikyaren i Fahrenheit la, kpa a lu hir yô, i ndôhôr her je i kuma udigirii 15 nahan tseegh. Nahan lu ijiir i dedoo i ior lôôn wain man ikya yô.

Mbamaren av lu ior mba ken tar u Jamani. Yange ve lu ken adua u haleluya ugen, kpa ve lu ker ken iti tseegh tsô. Nahan kpa, ve gema ve tesem u eren msen u Ter Wase la ken ityou. Shighe u m lu anyom 14 la, ngôm man anmgbian wam u kwase u vesen hen Bibilo a Mbashiada mba Yehova anshighe kpuaa. Shighe ugen la, m ta ato m ungwa er Mbashiada mba uhar mba ve va u henen kwagh a ngôm la tese un iti i Aôndo, i Yehova la ken Bibilo na i tse yô. Kwagh ne doom kpen kpen. Ayange nga kar yô, ngôm de kwaghhenen la, shi mo kpa m kera hen kwagh u Aôndo m seer ga. Nahan kpa, zum u m lu ken makeranta la, tica wase ugen er se mbaaie kpishi sha kwagh u Mbashiada mba Yehova, mba ior ve senge ér ka annongo u bo la. Kpa er m vande zan mbamkombo mba Mbashiada mba Yehova vea anngôm u kwase yô, m kaa a tica wam la mer akaa a a lu ôron la cica cii ka mimi ga.

M va kom anyom 15 yô, i tindim makeranta ken gar u Leningrad, u i yer un hegen ér St. Petersburg, u a lu ken tar u Russia la, ér mo m za hen tomavee. Yange m ôr mbayevmakeranta mba se tsaan iyou i môm la akaa a m pande m fa sha kwagh u Yehova yô. Kpa, ica gba ga tsô maa m hii u man taav. Zum u mea za memyol ken ya ken tar u Kazakhstan yô, i lum ican u yamen ikya man ga, shin er u man ikya lu kwaghbo ken tar la nahan kpaa. Shi m maan gogolo man wain kpoghuloo.

Yange m been makeranta u m za la yô, m nyôr shoja i tar u Soviet anyom ahar. Nahan cii kpa,  akaa a mimi a m hen ken Bibilo shighe u m lu iyev la hungur mo ga. Yange ian ia due yô, m ôr ushoja mbagenev kwagh u Yehova, shi mbagenev vea waan Mbashiada aie iyol nahan, m paa ve iyol.

Yange m been tom shoja yô, maa m yem ken tar u Jamani. Shighe u m lu ken afo a ushirmbaiorov la, i nam kôpi u takerada u Mbashiada ugen, u i henen Bibilo a mi yô. Yange maam iyol u ôron takerada ne kpishi, shi m nenge mer u pase mimi. Kpa gema taver mo kpishi u den taav kua ikya i man. Ayange nga kar yô, m yem m za lu ikyua a gar u Karlsruhe. Heela la, m zua a Orshiada u Yehova ugen, tsô a hii u henen Bibilo a mo.

ER BIBILO YANGE I GEMA UMA WAM YÔ: Yange m na jighjigh mer Bibilo ka Mkaanem ma Aôndo ica i gba. Shi er m ôr takerada u yange i nam u henen Bibilo a mi la m bee yô, m mase nengen mer Bibilo na mbamlumun sha mbampin mba hange hange mba sha akaa a a bende a uuma asev yô. Nahan cii kpa, gema tôôm shighe u den aeren am a dedoo ga la. Kpa ken masejime yô, kwaghwan u Bibilo, u a lu ken 2 Mbakorinte 7:1 la bende a mo kpishi, nahan m kange ishima mer me wanger iyol yam sha “hanma kwagh u hôngorough u ken iyol kua ken jijingi cii,” tsô m de u man ikya kua taav.

Yange m de u man ikya ave ave la je. Kpa gema tôôm iwer ataratar u den taav. Iyange igen yô, Orshiada u henen Bibilo a mo la pinem ér, “Kanyi jim u we ishima u eren a uma wouwe?” Mpin ne na yô, m hii u henen er i hii ve i lu taver mo u den taav u man yum yô. M vande nôngon acin imôngo mer me de kpa hembam. Nahan m kaa a ishima yam mer, hanma shighe u i lu saren mo u man taav cii yô, me er msen hen Aôndo, me kera ma cii man me hide me gba zamber mer a̱ dem a isholibo yam ga. Ken inyom i 1993 la, m ver iyange i me de taav yô. Man sha iwasen i Yehova yô, hii shighe la je zan zan nyian m ngu a bende taav ave ga.

IWASEN I M ZOUGH A MI YÔ: Hegen u m de u vihin inyaregh shi m de u nzughul a iyol yam sha u man ikya kua taav ne, taver mo iyol kpen kpen. M ngu eren tom ken afishi a branci a Mbashiada mba Yehova ken tar u Jamani hegen. Doom kpishi er yange m hen u dondon kwaghwan u Bibilo ken uma wam nahan! Er m fe kwagh u Bibilo i tese yô, kwagh ne wasem u eren kwagh u injaa a uma wam.

FA KWAGH NA

ITI: TITUS SHANGADI

Anyom: 43

TAR NA: NAMIBIA

OR U YANGE LU YÔ: YANGE LU KEN MZOUGH U AGUMAIOR A WAN TSWAM

SHIGHE U M LU IYEV LA: Yange m vese ken angar ugen hen haregh u Ohangwena, ken imbusutarimese i tar u Namibia la. Shighe u i lu nôngon ityav hen haregh ne ken kwavanyom u 1980 la, i gbidye ior mba hen angar wase ne kpishi shi i wua mbagenev kpaa. Hen angar wase yô, yange wanye nana via iyol, nana gbidyen mbayev mbagenev yô, i nenge nan ér ka nomsoor je la. Nahan m hen num u nôngon!

Yange m been makeranta yô, m za lu vea anmgbian u ngôm u nomso ugen ken geri u Swakopmund, u a lu shin kpe ityeku la. Yange m za  nyer hen geri la je maa m nyôr nongo a mzough u agumaior agen a taver ityough. Yange se due geri se zende se za sha ajiir a i soon ior-il her ga yô, er hen uhôtel man ajiir a man kwagh nahan, sha u i zenda se her kera yô se gbidye iyol yô. Ashighe kpishi se nôngo num a mbakangen iyav. Hanma tugh yô, m due zende a ihô i gôgônan i esen akur tsor tsor kua ishôm, sha er or a hiim iyôngo yô, me kpe a nan yô.

Iyange igen tugh, i war wuan mo shighe u se lu nôngon num a nongo u agumaior agen yô. Gumor ugen ken nongo la, vam ken ijime a ishôm m fa ga, kenden ér una gberem ityough a ta kera yô, maa boki wam u se nôngon num imôngo yô gbidye un ityumugh sha ityou gba inya hume. Shin er m kar a ku kôôr nahan kpa, m de ipila i eren ga. Yange mea hii ayôôso a or, a̱ lu nomsoor shin kwase kpa, i lu mo i hii tan nan iju ye.

ER BIBILO YANGE I GEMA UMA WAM YÔ: Kwa wam u hiihii u m zua a Kwaseshiada u Yehova ugen la, a ôrom avur ken Pasalmi 37 shi kaa a mo ér takerada u Mpase ngu a uityendezwa mbagenev mba injaa mba Aôndo una kure ve ken hemen yô. Kpa er kwase ne ôrom ajiir a uityendezwa mban ve lu ken takerada u Mpase la ga yô, m tôô Bibilo yam, m ôr takerada u Mpase jimin cii tugh mbura. Ityendezwa i m ôr ken Mpase 21:​3, 4 la doom kpishi, ijiir la kaa ér, “ku ua kera lu ga, shin ijungwen shin mliam shin ican kpaa ia kera lu je ga.” Iyange igen, Kwaseshiada la vem inya yô, m lumun mer a hii Bibilo i henen a mo.

Yange taver mo kpishi u geman mbamhen av man aeren a am kpaa. Kpa i tesem kwagh u i nger ken Aerenakaa 10:​34, 35 la. I kaa her ér, “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una rumun nan.” Shi m nôngo tsung mer me er kwagh u i ôr ken Mbaromanu 12:18 la, ér: “Aluer a fatyô yô, lu nen bem a ior cii ape kwagh wen a lu sha mi la.”

Yange m nôngo tsung m de ishimanyoon, kpa lu ishimanyoon tseegh ga, lu u me de taav u man kpaa. Ashighe kpishi yange m er msen hen Yehova mer a̱ wasem, je m vaa a vaa kpaa. Sha hiihii la, m lu nôngon mer me de taav, kpa m gema m lu eren shami ga. Yange m kaa a iyol yam mer, ka taav wam u masetyô je m lu man ne, kpa m ôr i lu zwa tsô, mea maan mea been cii yô m er msen. Kpa Kwaseshiada u lu henen Bibilo a mo la wasem u fan ér shighe u i sarem u man taav cii yô, hemba doon u me er msen hen shighe la. Shi gba u me de u lun imôngo a mba man taav kpaa. Shi yange m dondo kwaghwan u i wam ér m pase mba m eren tom a ve imôngo la er taav u man i lu kwaghbo yô. Kwagh ne yange wasem kpishi, gadia m de u ngohol taav hen a ve gbilin​—⁠mba man taav mbagenev mba se eren tom imôngo la kera naan mo taav ga.

Kure kure tsô m de taav u man shi m de aeren am agen a dedoo ga la kpaa. Yange m hen akaawan a Bibilo shi m hii u eren tom sha a, iwer ngi kar ataratar yô, m kuma u a eren batisema, nahan i erem batisema m hingir Orshiada u Yehova.

IWASEN I M ZOUGH A MI YÔ: Yange m nenge dooshima u Mbashiada mba Yehova, ior-il man abuter lu a mi sha ayol a ve yô, nahan m nenge mer ka ve ve lu eren kwaghaôndo u mimi ye. Nenge ase yô, zum u m lu a er batisema m hingir Orshiada ga la je tsô, orbuter ugen ken nongo u Kristu lôhôm hen ya na ér m va ya kwaghyan a na imôngo. Lum er ka mnyamciem nahan. Er ngôm maren je m lu vande teman imôngo a orbuter ken bem ga, u yan kwagh hen ya u orbuter je yô lu kwagh u me er ga. Kpa hegen ne, m lu ken mzough u mimi u anmgbianev, u a lu sha tar jimin cii la.

Ngise la, mbakangen iyav kposo kposo nôngo ér vea gema mhen wam man aeren a am kpa ve kan shio. Lu Bibilo tseegh nam agee a geman aeren a am ye, shi lu Bibilo wasem u zuan a msaanyol kpaa ye.

[Mkaanem ma sha peeji 31]

“Ashighe kpishi yange m er msen hen Yehova mer a̱ wasem, je m vaa a vaa kpaa”