Yange m vese hen anjiir u gban ijime kpishi hen gar u Montreal, ken tar u Kanada. Yange i marem m lu iwer ataratar tseegh maa terem kpe, nahan ngôm lu masen nengen sha hanma kwagh hen ya. I mar se se lu anigheni, mo m lu wan-masetyô.

Shighe u m lu vesen a vesen la, uma wam cii saa sha u man mcimbim shi gbidyen do shi eren ipila shi zenden vea mbaaferev. Shighe u m lu anyom pue la, m hii u zan ityom i ukaruwa kua mbanan ior injô ngohol liba karen ikyaa inya. M lu or u eren aie kpoghuloo shi kighir ior yan ve inyaregh er m fetyô la cii. Ieren ne lu er icigh nahan hen a mo.

Shighe u mlu anyom 14 la, m fa u keren igbenda i mbien ior je zua ga. U tesen ikyav yô, yange m teen agogo a wan ken uwegh man asa kua ikyunya i sha gold, nahan m za yam akaa ne kpishi m va a mi m va cagh ikyav i gold u injaa sha a seer seer, m teen sha ugodobi kua sha ajiir a veren umato ken ityembe kasua. Kpenga u zuan a zege inyar fese a ican i yan shio ne yange u doom kpishi. Kwagen la m zua a liba kuma (inyaregh ki tar u Kanada) udola 10,000 ken iyange i môm tseegh!

Yange i zendam ken makeranta shighe u m lu anyom 15 la, nahan m kera lu a ijiir i tsan ga. Nahan m lu masen tsan sha ugodobi man sha ajiir a ior memen her yô, shi shighe ugen m za tsa vea gumor u nan senge ér nan ngu boki wam, zum u nan ze a mo hen ya u nan yô.

Er yange m mbien ior yô, udasenda ve shi tôvon mo. Kpa er m lu teen ikyav mbi mbaiv ga yô, iyange i môm kpa i wuhem ga. Nahan kpa, ashighe kpishi i yam zwajirigh sha zegeinyar sha ci u mbiri mbi mbiri wam la man aie u m wa yum la kua ikyav mbi m teen a laasen shio la. Er m cian ma or ga yô, mbanan ior injô ngohol liba karen ikyaa inya ve tindim ér m za yar or injô. Kwagh ne lu bo tom je yô, ashighe agen m za a gbuuka. Ashighe agen m za vea mbaaferev mbagenev imôngo.

Mhii u ungwan kwagh u Bibilo shighe u m lu anyom 17 tseegh la. Wankwase ugen u yange m sôôr un yô, hii u henen Bibilo vea Mbashiada mba Yehova. Nahan kpa, m venda atindi a Bibilo a sha kwagh u aeren a wang la, nahan m undu un m za kohol wankwase ugen, u m lu vanden sôôr yô.

 Ishiôr yam i sha uhar ne kpa va hiin u henen Bibilo vea Mbashiada yô, gbande gema imo! Yange de akaa agen ken uma na, nahan doom u nengen er lu seer u lun inja kundu ikundu man er ishimawan na sha akaa kpa lu seer a seer yô. Nahan m lumun u zan mkombo ken Iyou i Tartor i Mbashiada mba Yehova. M ze yô, ior mba lun tsembelee shi lun inja kundu kundu mban ngohol mo doo doo. Ieren ne kaha kposo a i ken tar, i yange m fa la! Ma shighe môm kpa yange m nenge mer sar tsombor wam u nengen a mo ga; shighe u m lu wanye la cii, m henen mer m doo ior ishima ga shi or u wan mo ikyo kpa nan ngu ga. Dooshima u Mbashiada mba Yehova tesem la lu kwagh u m lu keren yô. Yange Mbashiada mba Yehova mba kaan ér vea hen Bibilo a mo yô, m lumun fese.

Kwagh u m lu henen ken Bibilo la yange war uma wam je lu ashe tugh ga. Yange m lu wan iyol vea iorov mbagenev uhar ser se za num gbenda sha er me zua a inyaregh me kimbi anzô a m gba sha do u gbidyen kohol kuma (inyaregh ki tar u Kanada) udola 50,000 la yô. Kpa doom kpishi er yange m sula m hile ijime yô! Ior av mba se zaan iv imôngo la za iv mbu shon. Maa i za kôr u môm, ugen la di i wua un.

M gbe henen Bibilo yemen yô, m va mase nengen a akaa kpishi a yange gba u me de ken uma wam yô. U tesen ikyav yô, m hen kwagh sha kwagh u i nger ken 1 Mbakorinte 6:10 ér: “Mbaiv shin mbahuav shin mbahundenmsôrom shin mbauityuhwanev shin mbanumungbenda kpaa, vea ya dyako u tartor u Aôndo je ga” la. Er m ôr ivur Bibilo ne yô, m nenge er kwaghbo wam a kehe yô, nahan m vaa. Yange m nenge mer gba u me gema uma wam vindi vindi. (Mbaromanu 12:2) M lu or u eren ipila shi m ngôôr nôngon num ga, shi aie u eren ya tor ken a mo.

Nahan kpa, m henen Bibilo yô, shi m kav er Yehova a zungwen mhôônom shi a den or kwaghbo yô. (Yesaia 1:18) Nahan m er msen dông, m zamber a Yehova mer a wasem me de akaa a yange m eren la. Sha iwasen na yô, tegh tegh tsô m va de akaa shon. Kwagh u vesen ugen u yange m er yô, lu ivese i yange m er vea shiôr yam sha tindi la.

Shighe u m lu anyom 24 la, m lu a kwase man mbayev utar. Hen shighe la, gba u me lu a tom u sha tindi. Kpa m lu a mfetakerada cuku tseegh shi m lu a ma takerada u tesen ér m vande eren tom hen ijiir igen ga. Kwa ne kpa m er msen hen Yehova kpoghuloo. Maa m mough m gba za keren tom. M kaa a ior mba ve lu a ityom i tôôm mo la mer m soo u geman uma wam shi eren tom hanma iyange sha mimi. Ashighe agen je yô m kaa a ve mer m ngu henen Bibilo shi sarem u hingir or u injaa ken tar wam. Kpa mbavesen mbara kpishi venda u tôôn mo tom. Ken masejime, m va ze mtaviu m za pasen orvesen ugen er yange m ya ican ken uma wam kpishi yô, a kaa a mo ér: “M fa ityôkyaa jighilii ga, kpa m nenge mer gba u me tôô u tom.” M na jighjigh mer lu msen wam la je Aôndo ungwa ye. Shighe kar yô, m er batisema vea kwase wam se hingir Mbashiada mba Yehova.

Nyian ne, m ngu uma sha ci u m ngu dondon akaawan a Bibilo shi eren kwagh ken uma wam er i gbe u Orkristu nana eren la. M ngu a tsombor wam kpôô kpôô shi u doo kpaa. M na jighjigh vangertiôr mer Yehova dem kwaghbo wam, nahan imoshima yam ngi wang.

Ken anyom 14 a a kar ne, m ngu eren tom u pasen kwagh hanma shighe, wasen mbagenev u henen kwagh u Bibilo i tese yô, shi semberee ne, kwase wam kohol mo se mba eren tom u pasen kwagh hanma shighe ne imôngo. Ken anyom 30 a a kar ne, saan mo iyol kpishi er m wase kasev man nomso 22 mba se yaren tom ijiir i môm ve hii u civir Yehova yô. Hegen kpa m ze sha ityembe kasua, kpa ka i lu sha u za mbien ior er yange m eren la ga. Hegen ne ka mea za yô, m za pasen ior akaa a m ne jighjigh a mi la. Ka m soo u nan ve kwagh u m lu a mi yô: ka ishimaverenkeghen i va lun uma ken tar u he u mba mbien ior vea lu ker ga la.—Pasalmi 37:10, 11.