Чага дүнйә иненде, эне-атаның икиси-де өрән бегенйәр. Элбетде, сиз эне-ата хөкмүнде көп вагтыңызы ве гүйҗүңизи чагаңызың аладасыны этмәге берерсиңиз. Укысызлык ве хер хили дуйгулар себәпли араңызда дүшүнишмезлик дөремеги мүмкин. Сиз чагаңызың аладасыны этмек ве машгалаңызы беркитмек үчин кәбир затлары үйтгетмели боларсыңыз. Мукаддес Язгыларың маслахатлары сизе шейле кынчылыклара дөз гелмәге нәдип көмек эдер?

МУКАДДЕС ЯЗГЫЛАРДА НӘМЕ ДИЙИЛЙӘР: «Сөйги сабырлыдыр, шепагатлыдыр... өз пейдасыны гөзлейән дәлдир, гахарланян дәлдир» (1 Коринтослылар 13:4, 5). Элбетде, эне хөкмүнде сиз чагаңыза көп үнс берйәнсиңиз. Шол себәпли янёлдашыңыз өзүни ташланан ялы дуймагы мүмкин. Сиз янёлдашыңыза хем үнс бермелидигиңизи унутмаң. Сиз сабырлы ве мәхирли болсаңыз, янёлдашыңызың гөвнүне дегмән, чагаңызың аладасыны эдип билерсиңиз.

«Әрлер, сиз хем өзүңизи аялыңыз билен пайхаслы алып барың» (1 Петрус 3:7, ТД). Сиз аялыңызың чагаңыза серетмек үчин көп гүйч сарп эдйәндигине дүшүниң. Ол чагаңыза середип, ядавлыкдан яңа гахарланып, хатда гөвнүчөкгүнлиге-де дүшүп билер. Кәте аялыңыз хатда сизе-де гахарланмагы мүмкин. Худайың Сөзүнде: «Гахары гич гелйән адамың дүшүнҗеси көпдүр» дийилйәр (Сүлейманың тымсаллары 16:32). Шол себәпли өзүңизи рахат алып барың. Аялыңызың ягдайына дүшүнип, оңа көмек эдиң (Сүлейманың тымсаллары 14:29).

МАСЛАХАТ

• Аталар: Аялыңыза хатда гиҗесине-де чагаңызың аладасыны этмәге көмек эдиң. Аялыңыза ве чагаңыза көпрәк үнс бермек үчин башга ишлериңизи азалдың

• Энелер: Әриңиз сизе чагаңыза середишмек ислесе, онуң көмегини кабул эдиң. Ол табшырылан иши гөвнеҗай эдип билмесе, оны язгармаң ве нәдип этмелидигини мәхирли гөркезиң

МУКАДДЕС ЯЗГЫЛАРДА НӘМЕ ДИЙИЛЙӘР: «Әр-аял бир тен болар» (Матта 19:5). Хатда чагаңыз дүнйә иненде-де, сиз янёлдашыңыз билен «бир тендигиңизи» унутмаң. Шол себәпли машгала гатнашыкларыңызы беркитмек үчин элиңизде барыны эдиң.

Аяллар, әриңизиң көмегине ве голдавына миннетдар болуң. Сизиң миннетдарлык сөзлериңиз янёлдашыңыза «шыпа» берер (Сүлейманың тымсаллары 12:18). Әрлер, аялыңызы йүрекден сөййәндигиңизи ве оны гыммат сайяндыгыңызы айдың. Оңа машгалаңызың аладасыны эдйәндиги үчин өвгүли сөзлери айдың (Сүлейманың тымсаллары 31:10, 28).

«Хич ким өз пейдасыны гөзлемесин, башганың пейдасыны гөзлесин» (1 Коринтослылар 10:24). Янёлдашыңыза хемише яраян затлары эдиң. Онуң билен геплешмәге ве оны диңләп, өвгүли сөзлери айтмага вагт тапың. Җынс гатнашык меселесинде диңе өзүңизи билмән, янёлдашыңызың хем зерурлыгыны гөз өңүнде тутуң. Мукаддес Язгыларда: «Бири-бириңизи әр-аяллык хакындан махрум этмәң» дийилйәр (1 Коринтослылар 7:3—5). Шол себәпли бу барада икичәк ачык гүрлешиң. Сиз сабырлы болуп, бири-бириңизиң ягдайыңыза дүшүнсеңиз, машгала гатнашыкларыңыз беркәр.

МАСЛАХАТ

• Янёлдашыңыз билен икичәк вагт гечирмеги унутмаң

• Янёлдашыңыза СМС иберип я-да кичирәк совгат берип, оны сөййәндигиңизи гөркезиң

МУКАДДЕС ЯЗГЫЛАРДА НӘМЕ ДИЙИЛЙӘР: «Гутулыш үчин өзүңи акылдар этмеги башарян Мукаддес Язгылары огланлыкдан бәри билйәнсиң» (2 Тимотеос 3:15). Чагаңыза нәме өвретмелидигини планлашдырың. Ол хатда догулманка, өвренмәге укыплы боляр. Чага хениз эҗесиниң гөвресиндекә, эне-атасының сесини танап билйәр. Шол себәпли ол энтек бәбеккә, оңа гызыклы бир зат окап бериң. Чагаңыз окаян задыңыза дүшүнмесе-де, бу оңа улаланда окамагы говы гөрмәге көмек эдер.

Чагаңыза кичиликден Худай барада өвредиң. Оңа Ехова дога этмеги өвредиң (Канун таглыматы 11:19). Хатда онуң билен биле ойнаныңызда-да, Худайың ярадан затлары барада гүррүң бериң (Зебур 78:3, 4). Чагаңыз улалдыгыча, сизиң Ехованы сөййәндигиңизи гөрүп, ол хем оны сөймеги өвренер.

МАСЛАХАТ

• Чагаңызы акылдарлык билен тербиеләп билер ялы, Ехова дога эдиң

• Чагаңыза өвретмек ислейән затларыңызы гайта-гайта айдың. Шонда ол иррәк өвренип башлар