Hudaý hemme zady görüp we islän ýerinde bolup bilýär (Nakyllar 15:3; Ýewreýler 4:13). Ýöne Mukaddes Kitapda Hudaý hemme ýerde, ýagny her bir zatda bar diýip öwredilmeýär. Munuň tersine, Onuň şahsyýetdigi we mesgeniniň bardygy aýdylýar.

•   Hudaýyň keşbi. «Hudaý ruhy Şahsyýet» (Ýahýa 4:24). Hiç bir adam ony görüp bilmeýär (Ýahýa 1:18). Mukaddes Kitapda käte Hudaý belli bir ýerde suratlandyrylsa-da, onuň hemme ýerde bolýandygy barada hiç zat aýdylmaýar (Işaýa 6:1, 2; Ylham 4:2, 3, 8).

•   Hudaýyň mesgeni. Hudaý adamlaryň ýaşaýan ýerinde däl-de, gökde ýaşaýar. Onuň «gökde mesgeni» bar (1 Patyşalar 8:30). Mukaddes Kitapda bir gezek perişdeleriň «Ýehowanyň a huzuryna gelendikleri» barada aýdylýar. Bu waka Hudaýyň belli bir ýerde mesgen tutýandygyny görkezýär (Eýýup 1:6, TD).

Eger Hudaý hemme ýerde bolmaýan bolsa, onda meniň aladamy edip bilermi?

 Hawa. Sebäbi Hudaý her bir adamyň aladasyny edýär. Hudaý gökde ýaşasa-da, ýer ýüzünde özüne, hakykatdan-da, ýaranmak isleýän adama üns berýär we aladasyny edýär (1 Patyşalar 8:39; 2 Taryh 16:9). Geliň, Ýehowanyň wepaly gullukçylarynyň nädip aladasyny edýändigine seredeliň:

•   Doga edenimizde: Ýehowa doga edenimizde şol bada eşidýär (2 Taryh 18:31).

•   Göwnüçökgün wagtymyz: «Reb göwni synyklara ýakyndyr we ruhy ökünçlileri gutarýandyr» (Zebur 34:18).

•   Görkezmä mätäç wagtymyz: Ýehowa öz Sözi arkaly «görkezme bererin, ýörejek ýoluňy öwrederin» diýip ynandyrýar (Zebur 32:8).

Hudaýyň hemme ýerde bolýandygy baradaky nädogry düşünjeler

 Ýalan düşünje: Hudaýyň hemme ýerde bolýandygy barada Zebur 139:8-de şeýle diýilýär: «Eger göge çyksam, Sen ol ýerdesiň; ýerimi ölüler diýarynda salsam, ine ol ýerdesiň».

 Delil: Bu aýatda Hudaýyň mesgeni barada gürrüň gitmän, gaýtam, şahyrana sözler bilen onuň bize kömek edip bilmejek ýeriniň ýokdugy göz öňüne tutulýar.