Kāfai e tupu he puapuagā, i te taimi lava tēnā e fakamaopoopo e Molimau a Ieova he fehoahoani ke kavatu he mapuhaga mo latou uho kua puapuagā. E fakaalia e nā taumafaiga iēnei te moni o to matou alofa o tētahi ki tētahi. (Ioane 13:​34, 35; 1 Ioane 3:​17, 18) Ni ā nā auala e fehoahoani atu ai ki matou?

E fai a matou meaalofa tupe. I te tupuga o te oge lahi i Iutea, na lafo atu e nā Kelihiano muamua i Anitioka he fehoahoani tautupe ki o latou uho fakateagaga. (Galuega 11:​27-​30) E vēia, kāfai kua iloa e ki matou e i ei ni uho o ki matou i he tahi pito o te lalolagi e fakafeagai ma ni fakalavelave, e lafo atu ni a matou meaalofa e kui atu i a matou fakapotopotoga e pili mai ma kavatu he fehoahoani fakatetino mo ki latou e matuā manakomia he fehoahoani.​—2 Kolinito 8:​13-​15.

E fōki atu e ki matou ni fehoahoani aogā. Ko nā toeaina e i te nofoaga o te puapuagā e fehokotaki ma nā tino uma o te fakapotopotoga ke mautinoa e haogalēmū ma malolohi ki latou uma. E i ei he komiti fehoahoani e fakamaopoopo te kavatu o nā meakai, vai inu mamā, kofu, nofoaga, ma nā fehoahoani fakafomai. E tokalahi nā Molimau ei te ki latou te poto e manakomia e ofo atu ke olo oi fehoahoani kae totogi lava e ki latou o latou pahehe ke fakafou na fale ma Fale o Hauniga kua fakakino. E fiafia ki matou ki te kautahi o te fakalāpotopotoga ma te poto mahani kua matou maua mai te galue fakatahi ke potopoto fakavave te fehoahoani ki nā tino e manakomia. E kui lava e foki atu te fehoahoani e matou ki te ki “lātou i loto o te tātou kāiga Kelihiano,” e fehoahoani atu foki ki matou ki iē tahi tino kāfai e mafai, e tuha lava pe ko he ā te latou lotu e lolotu ai.​—Kalatia 6:​10.

E ofo atu e ki matou te fakamafanafanaga mai te Tuhituhiga Paia. E manakomia e nā tino kua lavevea mai nā puapuagā ni fakamafanafanaga. I nā taimi vēnā, e maua e ki tatou te malohi mai ia Ieova, “te Atua e ala mai ai ia fehoahoani uma,” pe ko nā fakamafanafanaga. (2 Kolinito 1:​3, 4) E fiafia ki matou oi tufatufa atu nā folafolaga mai te Tuhi Paia mo ki latou kua hēai he fakamoemoe, ma fakamautinoa ka toeitiiti kaumai e te Mālō o te Atua te ikuga o nā puapuagā uma e fakatupu ai nā tigā ma māfatiaga.​—Fakaaliga 21:4.

• Aiheā e mafai ai oi tali vave atu nā Molimau i nā vaitaimi o puapuagā?

• He ā te fakamafanafanaga fakateagaga e tufa atu e ki matou ma nā tino e hao mai i nā puapuagā?