Steven a re: “Fa re sena go kgaogana, ke ne ke utlwile botlhoko tota. E ne e le la ntlha ke utlwa botlhoko jaana.”

 A o kile wa kgaogana le motho yo o mo ratang? Fa go le jalo, setlhogo seno se ka go thusa.

•  Kafa go utlwalang ka teng

•  Se o ka se dirang

 Batho ba ba kgaoganang ba utlwa botlhoko boobabedi.

•  Fa e le gore ke wena o neng o batla gore lo kgaogane, gongwe le wena o ikutlwa jaaka Jasmine fa a re: “Ke a itse gore ke utlwisitse motho yo mongwe botlhoko mme ga ke batle go tlhola ke iphitlhela ke le mo seemong seo gape.”

•  Fa e le gore ga se wena o neng o batla gore lo kgaogane, gongwe o tlhaloganya gore goreng batho ba bangwe ba re go ntse jaaka e kete mongwe o go tlhabile ka tšhaka mo pelong. Lekgarebe lengwe le le bidiwang Janet a re: “Go ntsere lobaka, sa ntlha ke ne ke sa dumele, ke ne ke galefile, ke ipotsa gore go diragatseng, ke utlwile botlhoko thata mme kwa bofelong ke ile ka amogela.”

 Sa botlhokwa: Go utlwisa botlhoko go kgaogana le motho yo o mo ratang. Temana nngwe ya Baebele ya re: “Moya o o hutsafetseng o omisa marapo.”​—Diane 17:22.

•  Bua le mongwe yo o mo tshepang. Baebele ya re: “Molekane wa boammaaruri o lorato ka dinako tsotlhe, mme ke morwarramotho yo o tsholetsweng nako ya fa go na le matshwenyego.” (Diane 17:17) Fa o bua le motsadi kgotsa tsala e o e tshepang, e tla go thusa go akanya sentle.

   “Go ile ga feta dikgwedi ke sa bue le ope ka kgang eno. Mme ditsala di ile tsa nthusa. Fa ke sena go ba bolelela, ke ile ka ikutlwa botoka.”​—Janet.

•  Ithute mo go se se go diragaletseng. Seane sengwe sa Baebele se a re: “Bapala botlhale, bapala tlhaloganyo.” (Diane 4:5) Dilo tse di re diragalelang di ka senola botho jwa rona le go re ruta gore re itshware jang fa re swabisitswe ke mongwe.

   “Fa ke sena go kgaogana le motho yo ke mo ratang, tsala ya me e ne ya re, ‘O ithutile eng mo kgannyeng eno se o tla se dirisanang fa o ratana gape?’”​—Steven.

•  Rapela. Baebele ya re: “Latlhela mokgweleo wa gago mo go Jehofa, mme ene o tla go tshegetsa.” (Pesalema 55:22) Go rapela go ka go thusa gore o itshoke fa o utlwile botlhoko e bile go ka go thusa go akanyetsa dilo sentle.

   “Rapela o sa kgaotse. Jehofa o tlhaloganya se se diragetseng e bile o se itse botoka go go gaisa.”​—Marcia.

•  Thusa ba bangwe. Baebele ya re: “Lo tlhokomela, e seng go kgatlhegela dilo tse di amang lona fela, mme gape go kgatlhegela le dilo tse di amang ba bangwe.” (Bafilipi 2:4) Fa o ntse o thusa batho ba bangwe, o tla kgona go tlhaloganya seemo sa gago botoka.

   “Go kgaogana le motho yo o mo ratang go utlwisa botlhoko tota. Mme gone fa nako e ntse e ya, go a siama. Ke ne ke tlhoka go ipha nako ya gore ke fole.”​—Evelyn.