Ee, boammaaruri ke gore Modimo o kgona go fetola mogopolo ka tsela ya gore o fetola tsela e a ikutlwang ka yone fa batho ba fetola tsela e ba itshwarang ka yone. Ka sekai, fa Modimo a ne a romelela Baiseraele molaetsa wa katlholo o ne a re: “Gongwe ba tla reetsa mme ba boe, mongwe le mongwe mo tseleng ya gagwe e e bosula, mme ke tla tshwanelwa ke go ikwatlhaela masetlapelo a ke akanyang go ba a direla ka ntlha ya bosula jwa ditiro tsa bone.”​—Jeremia 26:3.

 Dithanolo tse dintsi tsa Baebele di ranotse temana eno ka go re Modimo o tla “ikwatlhaela” masetlapelo a a neng a ikaeletse go a tlisa, mme seno se ka dira gore batho ba akanye gore Modimo o ne a dirile phoso. Le fa go ntse jalo, lefoko leno la Sehebera, ‘ikwatlhaya,’ le ka kaya “go fetola mogopolo kgotsa boikaelelo.” Mokanoki mongwe o ne a re: “Go fetoga ga boitshwaro jwa motho go fetola katlholo ya Modimo.”

 Seno ga se reye gore e re ka Modimo a kgona go fetola mogopolo go raya gore o tshwanetse go dira jalo. Akanya ka maemo mangwe mo Baebeleng a mo go one Modimo a ileng a se ka a fetola mogopolo:

•   Modimo ga a ka a letlelela gore Balake a mo fetole mogopolo mme a hutse Baiseraele.​—Dipalo 23:18-20.

•   Fa Kgosi Saulo a ne a nweleletse mo bosuleng, Modimo o ne a mo tlosa mo setulong sa bogosi mme ga a ka fetola mogopolo ka tshwetso eo.—​1 Samuele 15:28, 29.

•   Modimo o tla diragatsa tsholofetso ya gagwe ya go dira Morwawe moperesite ka bosakhutleng. Ga a kitla a fetola mogopolo.​—Pesalema 110:4.

 Modimo o ne a bua jaana mo Baebeleng: “Ke nna Jehofa; ga ke a fetoga.” (Malaki 3:6) Gape Baebele ya re mo Modimong “ga go na go fetofetoga ga go menoga ga moriti.” (Jakobe 1:17) Le fa go ntse jalo, seno ga se ganetsane le ntlha ya gore Baebele ya re Modimo o kgona go fetola mogopolo. Modimo ga a fetoge ka tsela ya gore botho, lorato le tshiamiso ya gagwe ga di fetoge. (Duteronome 32:4; 1 Johane 4:8) Go ntse go le jalo, o fetola ditaelo tse a di nayang batho ba gagwe go ya ka maemo a bone le dilo tse ba di tlhokang. Akanya ka Kgosi Dafide, Modimo o ne a mo naya ditaelo tse di farologaneng malebana le dintwa tse pedi tse di neng di latelana mme ditaelo tsoopedi di ne tsa atlega.​—2 Samuele 5:18-25.

 Modimo ga a ikwatlhaele go bo a dirile batho le fa bone ba sa mmatle kgotsa ba mo itlhokomolosa. Baebele e bua jaana fa e tlhalosa maemo mo lefatsheng pele ga Morwalela wa ga Noa: “Mme Jehofa a ikutlwa a ikwatlhaya go bo a dirile batho mo lefatsheng, a utlwa botlhoko mo pelong.” (Genesise 6:6) Mo temaneng eno, lefoko “ikwatlhaya” le tswa mo lefokong la Sehebera le le ka kayang “go fetola mogopolo.” Modimo o ne a fetola mogopolo ka batho ba le bantsi ba ba neng ba tshela pele ga Morwalela ka gonne ba ne ba nnile boikepo. (Genesise 6:5, 11) Le fa a ne a utlwisitswe botlhoko ke gore batho ba dira dilo tse di bosula, ga a ka a fetola tsela e a ikutlwang ka yone ka batho botlhe. Tota e bile, o ne a boloka Noa le ba lelapa la gagwe ka nako ya Morwalela gore batho ba nne ba le teng mo lefatsheng.​—Genesise 8:21; 2 Petere 2:5, 9.