Dipesalema 60:1-12
Go mokaedi wa “Lelômô la Lesoma la Kgakololo.”* Miketame.* Pesalema ya ga Dafide. E dirisiwe fa go rutwa. Fa a ne a tlhabana le Arame-naharaime le Arame-Soba, fa Joabe a ne a boa a bo a kgemetha Baedoma ba le 12 000 kwa Mokgatšheng wa Letswai.+
60 O ne wa re latlha Modimo; o ne wa thubaganya se re itshireletsang ka sone.+
O ne o re galefetse; mme jaanong re amogele.
2 O ne wa roromisa lefatshe; o ne wa le phatlola.
Baakanya diphatlha tsa lone, ka gonne le a wa.
3 O ne wa dira gore batho ba gago ba wele mo mathateng.
O ne wa dira gore re nwe beine e e dirang gore re thetheekele.+
4 Naya* ba ba go boifang sesupoGore ba tshabe mme ba tile bora. (Selah)
5 Re boloke ka seatla sa gago sa moja mme o re arabeGore ba o ba ratang ba tle ba gololwe.+
6 Modimo o buile jaana a le mo boitshepong jwa gagwe:*
“Ke tla itumela, ke tla ntsha Shekema gore e nne boswa,+Mme ke tla lekanya Mokgatšha* wa Sukothe+ gore ke o abele batho ba me.
7 Gileade ke ya me, fela jaaka Manase+ e le ya me,Mme Eferaime ke tlhoro ya phemelo* ya tlhogo ya me;Juda ke lore lwa me lwa molaodi.+
8 Moabe ke sekotlele sa me se se tlhatswetsang.+
Ke tla latlhela setlhako* sa me mo godimo ga Edoma.+
Ke tla goa ka boitumelo ke fentse Filisitia.”+
9 Ke mang yo o tla nkisang kwa motseng o o dikologilweng ke baba?*
Ke mang yo o tla nkgogang go ya go fitlha kwa Edoma?+
10 Modimo, tota ke wena yo o ka bong o re etelela pele.
Mme jaanong o re latlhile wena Modimo wa rona, e bile ga o tlhole o tsamaya le masole a rona.+
11 Re thuse mo matshwenyegong a rona,Gonne poloko e e tlisiwang ke batho ga e na mosola.+
12 Modimo o tla re naya maatla,+E bile o tla gataka baba ba rona.+
Dintlha Tse di Kwa Tlase
^ Gongwe go tewa seletswa sa megala, mofuta wa mmino kgotsa molodi wa pina, mme gone bokao jwa yone jwa mmatota ga bo itsewe.
^ Bona Ditlhaloso Tsa Mafoko.
^ Kgotsa gongwe “O neile.”
^ Kgotsa gongwe “mo lefelong la gagwe le le boitshepo.”
^ Kgotsa “Lebala le le Kwa Tlase.”
^ Seheb., “kago e e thata.”
^ Seheb., “mpaatšhane.”
^ Kgotsa gongwe “o o sireletsegileng?”
