Genesise 39:1-23
39 Jaanong Josefa o ne a isiwa kwa Egepeto,+ mme Moegepeto yo o bidiwang Potifaro,+ modiredimogolo wa ntlo ya ga Faro e bile e le molaodi wa batlhokomedi, o ne a mo reka mo Baishemaeleng+ ba ba neng ba mo tlisitse koo.
2 Jehofa o ne a na le Josefa.+ Ka ntlha ya seo, o ne a atlega a bo a tlhomiwa go okamela ntlo ya mong wa gagwe wa Moegepeto.
3 Mme mong wa gagwe o ne a bona gore Jehofa o na le Josefa le gore Jehofa o ne a dira gore sengwe le sengwe se a se dirang se atlege.
4 Josefa o ne a itumedisa mong wa gagwe, mme a nna motlhokomedi wa mong wa gagwe. Ka jalo, o ne a mo tlhoma gore a okamele ntlo ya gagwe a bo a mo tlhoma gore a tlhokomele dilo tsotlhe tse a nang le tsone.
5 Go tloga ka nako e a neng a mo tlhoma gore a okamele ntlo ya gagwe le gore a tlhokomele dilo tsotlhe tse a nang le tsone, Jehofa o ne a nna a segofatsa ntlo ya Moegepeto yono ka ntlha ya ga Josefa, mme Jehofa a segofatsa sotlhe se a nang le sone mo ntlong le kwa tshimong.+
6 La bofelo o ne a tlogelela sengwe le sengwe sa gagwe mo go Josefa gore a se tlhokomele, mme o ne a sa tshwenyege ka sepe fa e se dijo tse a di jang fela. Mo godimo ga moo, Josefa o ne a gola a nna monna yo o bopegileng sentle e bile a le montle.
7 Jaanong morago ga dilo tseno, mosadi wa mong wa gagwe o ne a simolola go kgatlhegela Josefa a bo a re: “Tlhakanela dikobo le nna.”
8 Mme o ne a gana a bo a raya mosadi wa mong wa gagwe a re: “Mong wa me ga a tshwenyege ka dilo tse ke nang le tsone mo ntlong e bile o ntlhomile gore ke tlhokomele sengwe le sengwe se a nang le sone.
9 Ga go na ope mo ntlong eno yo o mphetang ka maemo, mme o beile sengwe le sengwe mo taolong ya me kwantle ga gago, ka gonne o mosadi wa gagwe. Ka jalo, nka dira jang bosula jo bogolo jono mme ka leofela Modimo?”+
10 Mme letsatsi le letsatsi o ne a leka go raela Josefa gore a tlhakanele dikobo le ene, le fa go ntse jalo ga a ise a ko a dumele go dira jalo kgotsa go nna le ene.
11 Letsatsi lengwe fa a tla mo ntlong go tla go dira tiro ya gagwe, go ne go se na ope wa batlhanka ba ba berekang mo ntlong.
12 Foo mosadi yono o ne a mo phamola ka seaparo a bo a re: “Tlhakanela dikobo le nna!” Mme Josefa o ne a tlogela seaparo sa gagwe mo seatleng sa mosadi yono mme a tshabela kwa ntle.
13 Fela fa mosadi a bona gore Josefa o tlogetse seaparo mo seatleng sa gagwe le gore o tshabetse kwa ntle,
14 o ne a simolola go goela kwa batlhankeng ba ba berekang mo ntlong ya gagwe mme a ba raya a re: “Bonang! O re tliseditse monna yono wa Mohebera gore re jewe ditshego. O ne a tlile kwa go nna a batla go tlhakanela dikobo le nna, mme ke ne ka goa ka lentswe le le kwa godimo.
15 Fela fa a utlwa ke goela kwa godimo, o ne a tlogela seaparo sa gagwe fa thoko ga me mme a tshabela kwa ntle.”
16 Morago ga moo, mosadi yono o ne a baya seaparo sa ga Josefa fa thoko ga gagwe go fitlha mong wa ga Josefa a tla mo ntlong ya gagwe.
17 Go tswa foo, o ne a mmolelela se se tshwanang a re: “Motlhanka wa Mohebera yo o mo tlisitseng mo go rona o ne a tla kwa go nna a dira gore ke jewe ditshego.
18 Mme fela fa ke tsholetsa lentswe ke simolola go goa, o ne a tlogela seaparo sa gagwe fa thoko ga me mme a tshabela kwa ntle.”
19 Ka yone nako eo, fa mong wa gagwe a utlwa mafoko a mosadi wa gagwe a neng a a bua a re: “Motlhanka wa gago o ntirile jaana le jaana,” o ne a galefa thata.
20 Ka jalo, mong wa ga Josefa o ne a mo tsaya a bo a mo tsenya mo kgolegelong, e leng lefelo le magolegwa a kgosi a neng a tsenngwa mo go lone fa a tshwerwe, mme o ne a tswelela a le mo kgolegelong.+
21 Mme Jehofa o ne a nna a na le Josefa e bile o ne a tswelela a mmontsha lorato lo lo sa kgaotseng a bo a dira gore modiredimogolo wa kgolegelo a mo amogele.+
22 Ka jalo, modiredimogolo wa kgolegelo o ne a tlhoma Josefa gore a okamele magolegwa otlhe a a mo kgolegelong, mme sengwe le sengwe se magolegwa a neng a se dira moo, ke ene a neng a laela gore se dirwe.+
23 Modiredimogolo wa kgolegelo o ne a sa tshwenyege ka dilo tse Josefa a neng a di tlhokometse, ka gonne Jehofa o ne a na le Josefa e bile Jehofa o ne a dira gore sengwe le sengwe se a se dirang se atlege.+
