Isaia 20:1-6
-
Sesupo ka se se tla diragalelang Egepeto le Ethiopia (1-6)
20 Ka ngwaga o Kgosi Saragone wa Asiria a neng a roma Taretane* kwa Ashedoda+ ka one, Taretane o ne a lwa le Ashedoda a bo a e gapa.+
2 Ka nako eo, Jehofa o ne a raya Isaia+ morwa Amosi a re: “Tsamaya, o tlose letsela la kgetsi mo dinôkeng tsa gago o bo o role ditlhako* tsa gago.” Mme o ne a dira jalo, a tsamayatsamaya a sa apara* e bile a sa rwala sepe mo dinaong.
3 Go tswa foo, Jehofa o ne a re: “Fela jaaka motlhanka wa me Isaia a ile a tsamayatsamaya a sa apara e bile a sa rwala sepe mo dinaong dingwaga di le tharo e le sesupo+ le kgakgamatso kgatlhanong le Egepeto+ le Ethiopia,+
4 kgosi ya Asiria le yone e tla etelela pele batshwarwa ba Egepeto+ le batshwara ba Ethiopia, basimane le bannabagolo, ba sa apara e bile ba sa rwala sepe mo dinaong, marago a bone a le kwa ntle, e le go tlhabisa Egepeto ditlhong.*
5 Mme ba tla tshoga e bile ba tla tlhabiwa ke ditlhong ka ntlha ya Ethiopia e ba neng ba solofetse mo go yone le Egepeto e ba neng ba ikgantsha ka yone.*
6 Mo letsatsing leo, batho ba ba agileng fa losing lwa lewatle ba tla bua ba re, ‘Bonang se se diragaletseng ba re neng re solofetse mo go bone, ba re neng ra tshabela kwa go bone re kopa thuso le gore re gololwe mo kgosing ya Asiria! Jaanong re tla falola jang?’”
Dintlha Tse di Kwa Tlase
^ Kgotsa “molaodi wa masole.”
^ Seheb., “bompaatšhane.”
^ Kgotsa “a apere diaparo tse di lotsatsa.”
^ Kgotsa “e leng bosaikategang jwa Egepeto.”
^ Kgotsa “e ba neng ba rata bontle jwa yone.”
