Isaia 21:1-17
21 Molaetsa wa go atlholwa ga naga e e tshwanang le lewatle:*+
Masetlapelo a tswa kwa nageng, a tswa kwa nageng e e boifisang,A tla jaaka diphefo tsa matsubutsubu tse di phepheulang kwa borwa.+
2 Ke boleletswe ponatshegelo eno e e boifisang:
Leferefere le dira boferefere,Le mosenyi o a senya.
Tlhatloga, wena Elama! Tlhasela, wena Media!+
Ke tla fedisa kutlobotlhoko yotlhe e a e baketseng batho.+
3 Ke gone ka moo ke leng mo khutsafalong e kgolo.*+
Ke tshwerwe ke ditlhabiTse di tshwanang le tsa mosadi yo o belegang.
Ke ngomogile pelo thata mo ke sa kgoneng go utlwa;Ke fuduegile thata mo ke sa kgoneng go bona.
4 Pelo ya me e iteela ka bonako; ke roromisiwa ke letshogo.
Lotlatlana lo ke sa bolong go eletsa gore lo tle, lo dira gore ke tshoge.
5 Rulaganyang tafole mme lo beye ditulo sentle!
Jang lo bo lo nwe!+
Emang lona dikgosana mme lo tlotse* thebe!
6 Gonne seno ke se Jehofa a se mpoleletseng:
“Tsamaya, o tlhome molebeledi mme o mo laele gore a bege se a se bonang.”
7 Mme o ne a bona kara ya ntwa e gogwa ke setlhopha sa dipitse,Kara ya ntwa e gogwa ke ditonki,Kara ya ntwa e gogwa ke dikamela.
O ne a di leba ka kelotlhoko, ka kelotlhoko tota.
8 Foo o ne a goa jaaka tau a re:
“Jehofa, ke nna ke eme mo toreng ya go lebelela motshegare,E bile ke eme mo lefelong le ke nnang mo go lone fa ke disa bosigo bongwe le bongwe.+
9 Bonang se se tlang:
Banna ba palame kara ya ntwa e e gogwang ke setlhopha sa dipitse!”+
Go tswa foo, o ne a goa a re:
“O ole! Babelona o ole!+
Ditshwantsho tsotlhe tse di betlilweng tsa medimo ya gagwe o di thubagantse fa fatshe!”+
10 Lona batho ba me ba lo ntseng lo phothiwa,Thobo* ya seboana sa me,+Ke lo begetse se ke se utlwileng mo go Jehofa wa masomosomo, Modimo wa Iseraele.
11 Molaetsa wa go atlholwa ga Duma:*
Mongwe o mpitsa a le kwa Seire+ a re:
“Molebeledi, bosigo bo tla sa leng?
Molebeledi, bosigo bo tla sa leng?”
12 Molebeledi o ne a re:
“Bosigo bo tloga bo sa, mme go tla nna bosigo gape.
Fa lo batla go botsa, botsang.
Tlang gape!”
13 Molaetsa wa go atlholwa ga sekaka:
Lo tla lala gaufi le ditlhare dingwe mo sekakeng,Lona ditlhopha tsa batsamai ba kwa Dedane.+
14 Tlang ka metsi lo ye go kgatlhantsha yo o nyorilweng,Lona banni ba lefatshe la Tema,+Mme motho yo o tshabang lo mo tlisetse senkgwe.
15 Gonne ba tshabile ditšhaka, ba tshabile tšhaka e e somotsweng,Ba tshabile bora jo bo obilweng e bile ba tshabile ntwa e e setlhogo.
16 Gonne seno ke se Jehofa a neng a se mpolelela: “Mo ngwageng o le mongwe fela, jaaka dingwaga tsa modiri yo o thapilweng,* kgalalelo yotlhe ya Kedare+ e tla khutla.
17 Banna ba ba tsholang bora mo batlhabaning ba Kedare, ba tla sala ba le mmalwa, ka gonne ke se Jehofa, Modimo wa Iseraele a se buileng.”
Dintlha Tse di Kwa Tlase
^ Go lebega go tewa kgaolo ya Babelonia wa bogologolo.
^ Seheb., “dinôka tsa me di tletseng ditlhabi.”
^ Kgotsa “lo tshase leokwane mo.”
^ Seheb., “Morwa.”
^ Mo go kayang “Tidimalo.”
^ Kgotsa “tse di badilweng ka kelotlhoko fela jaaka modiri yo o thapilweng a dira”; go tewa mo ngwageng o le mongwe o o feletseng.
