Isaia 33:1-24
33 Ruri o tla tlelwa ke masetlapelo wena mosenyi yo o iseng o senngwe!+
Wena motsietsi yo o iseng o tsiediwe.
Fa o sena go senya, o tla senngwa.+
Fa o sena go tsietsa, o tla tsiediwa.
2 Ao tlhe Jehofa, re utlwele botlhoko.+
Re solofetse mo go wena.
Re tshegetse ka lebogo* la gago+ moso mongwe le mongwe,Re boloke ka dinako tsa matshwenyego.+
3 Ditšhaba di a tshaba fa di utlwa modumo wa pheretlhego.
Fa o dira sengwe, merafe e a phatlalala.+
4 Fela jaaka tsie e e senyang e phutha, dilo tse o di gapileng di tla phuthiwa jalo;Batho ba tla thologela kwa go tsone jaaka lesogodi la tsie.
5 Jehofa o tla tlotlomadiwa,Gonne o agile kwa mafelong a a kwa godimo.
O tla tlatsa Siona ka tshiamiso le tshiamo.
6 Ke ene yo o go sireletsang;Tseno ke dikhumo tsa gagwe:
Letlotlo la poloko,+ botlhale, kitso le go boifa Jehofa.+
7 Bagaka ba bone ba goa mo mmileng;Barongwa ba kagiso ba lela mo go botlhoko.
8 Ditsela tse dikgolo di kgakgabetse;Ga go na ope yo o tsamayang mo ditselaneng.
O* tlodile kgolagano;O ganne metse;Ga a kgathalele motho ope.+
9 Lefatshe le a hutsafala* e bile le a swaba.
Lebanona e tlhabilwe ke ditlhong;+ e bodile.
Sharona e fetogile sekaka,E bile Bashana le Karemele di tlhotlhora matlhare a tsone.+
10 Jehofa a re, “Jaanong ke tla dira sengwe,Jaanong ke tla itlotlomatsa;+Jaanong ke tla ikgodisa.
11 Lo ima bojang jo bo omeletseng lo bo lo belega lotlhaka.
Moya o o maswe o lo nang le one o tla lo laila jaaka molelo.+
12 Mme ditšhaba di tla nna jaaka melora ya kalaka e e sheleng.
Di tla tshubiwa ka molelo jaaka mmitlwa e e kgaotsweng.+
13 Lona ba lo kgakala, reetsang se ke tla se dirang.
Le lona ba lo nnang gaufi, lemogang maatla a me.
14 Baleofi ba ba kwa Siona ba tshogile;+Batlhanogi ba a roroma ba re:
‘Ke mang wa rona yo o ka tshelang mo go nang le molelo o o lailang gone?+
Ke mang wa rona yo o ka tshelang le malakabe a molelo a a ka se timiweng?’
15 Motho yo o tsamayang ka tshiamo ka metlha,+Yo o buang se se siameng,+Yo o ganang go huma ka boferefere,Yo o ganang gore diatla tsa gagwe di amogele pipamolomo,+Yo o ithibang ditsebe gore a se ka a utlwa fa go logiwa maano a go bolaya,Le yo o tswalang matlho gore a se ka a bona se se bosula,
16 O tla nna kwa mafelong a a kwa godimo;Lefelo la gagwe la botshabelo le le sireletsegileng* le tla nna mo dikagong tse di thata tsa mafika,O tla tlamelwa ka senkgwe,E bile ga a kitla a tlhoka metsi.”+
17 Matlho a gago a tla bona kgosi e le mo bontlentleng jwa yone;A tla bona lefatshe le le kgakala.
18 Mo pelong ya gago o tla gakologelwa* selo seno se se tshosang:
“Mokwaledi o kae?
Yo o neng a lekanya sehuba* o kae?+
Yo o neng a bala ditora o kae?”
19 Ga o kitla o tlhola o bona setšhaba se se se nang maitseo,Setšhaba se puo ya sone e raraaneng thata* gore e ka tlhaloganngwa,Se o ka se tlhaloganyeng loleme lwa sone lo lo kwakwaetsang.+
20 Bonang Siona, motse wa meletlo ya rona!+
Matlho a gago a tla bona Jerusalema e le lefelo la bonno le le ritibetseng,Tente e e se kitlang e sutisiwa.+
Dipekere tsa yone ga di kitla di somolwa,E bile ga go na megala epe ya yone e e tla kgaoganngwang.
21 Mme gone koo Yo o Tlotlometseng e bong Jehofa,O tla nna kgaolo ya dinoka mo go rona, ya mesele e e atlhameng,Kwa go se kitlang go tsamaya setlhopha sa dikepe gone,E bile go se kitla go kgabaganya dikepe tse dikgolo gone.
22 Gonne Jehofa ke Moatlhodi wa rona,+Jehofa ke Moneimolao wa rona,+Jehofa ke Kgosi ya rona;+Ke Ene yo o tla re bolokang.+
23 Megala ya gago e tla repa;Ga e ka ke ya kgona go tshegetsa pilara ya sekepe kgotsa go tsharolola saile.
Ka nako eo dilo tse dintsi tse di gapilweng di tla kgaoganngwa;Tota le ba ba tlhotsang ba tla ikgapela go le gontsi.+
24 E bile ga go na motho ope yo o nnang* mo lefatsheng leo yo o tla reng: “Ke a lwala.”+
Batho ba ba nnang gone ba tla bo ba itshwaretswe melato ya bone.+
Dintlha Tse di Kwa Tlase
^ Kgotsa “nonofo.”
^ Go tewa mmaba.
^ Kgotsa gongwe “omelela.”
^ Kgotsa “Kago ya gagwe e e sireletsegileng.”
^ Kgotsa “akanyetsa kwa teng ka.”
^ Bona Ditlhaloso Tsa Mafoko.
^ Seheb., “e leng boteng.”
^ Kgotsa “yo o agileng.”
