Isaia 6:1-13
6 Mo ngwageng o Kgosi Usia a suleng ka one,+ ke ne ka bona Jehofa a ntse mo setulong sa bogosi se se kwa godimo e bile se tsholetsegile,+ mme dintlha tsa seaparo sa gagwe di ne di tletse mo tempeleng.
2 Boserafe ba ne ba eme kwa godimo ga gagwe; mongwe le mongwe wa bone o ne a na le diphuka di le thataro. Mongwe le mongwe o ne a ikhurumeditse sefatlhego ka diphuka tse pedi mme a ikhurumeditse dinao ka diphuka tse pedi, e bile mongwe le mongwe wa bone o ne a fofa ka tse pedi.
3 Mme yo mongwe o ne a goa morago ga yo mongwe a re:
“O boitshepo, o boitshepo, o boitshepo Jehofa wa masomosomo.+
Lefatshe lotlhe le tletse kgalalelo ya gagwe.”
4 Mme ditshitswana tsa dikgoro di ne tsa roroma ka ntlha ya modumo wa go tlhaeletsa ga bone,* mme ntlo e ne ya tlala mosi.+
5 Foo ke ne ka re: “Ijoo! Go ile fela jalo ka nna!
Ruri ke tlile go swa!*
Ka gonne mafoko a a tswang mo molomong wa me ga a phepa,E bile ke tshela le batho ba mafoko a bone a seng phepa;+Gonne matlho a me a bone Kgosi, e bong Jehofa wa masomosomo ka boene.”
6 Ka yone nako eo, mongwe wa boserafe o ne a fofela kwa go nna, mme mo seatleng sa gagwe go ne go na le legala le le tukang+ le a neng a le ntshitse ka tang mo sebesong.+
7 O ne a kgoma molomo wa me a bo a re:
“Ke kgomile molomo wa gago ka seno.
Molato wa gago o phimotswe,Le boleo jwa gago bo itshwaretswe.”*
8 Go tswa foo, ke ne ka utlwa lentswe la ga Jehofa le re: “Ke tla roma mang, mme ke mang yo o tla re elang?”+ Ke ne ka re: “Ke fano! Roma nna!”+
9 Mme o ne a nthaya a re: “Tsamaya, mme o reye batho bano o re:
‘Lo tla utlwa gangwe le gape,Mme ga lo kitla lo tlhaloganya;Lo tla bona gangwe le gape,Mme ga lo kitla lo nna le kitso epe.’+
10 Thatafatsa pelo ya batho bano,+Thiba ditsebe tsa bone,+O bo o ngaparaganye matlho a bone,Gore ba se ka ba bonaE bile ba se ka ba utlwa,Gore pelo ya bone e se ka ya tlhaloganyaE bile ba se ka ba boela mo go nna mme ba fodisiwa.”+
11 Foo ke ne ka re: “Seno se tla tsaya lobaka lo lo kae, Jehofa?” Mme o ne a re:
“Go fitlha metse e thubagana e nna marope, e sala e se na banni,Le matlo a sala a se na batho,Le naga e senngwa e bo e kgakgabala;+
12 Go fitlha Jehofa a tlosa batho a ba isa kgakala+Le go kgakgabala ga lefatshe go nna maswe thata.
13 “Le fa go ntse jalo, go tla bo go sa ntse go na le batho ba le mmalwa* mo go lone, mme le tla fisiwa gape, jaaka setlhare se segolo le jaaka setlhare sa moakere,* tse e reng fa di sena go rengwa go sale sesana; losika lo lo boitshepo e tla nna sesana sa lone.”
Dintlha Tse di Kwa Tlase
^ Seheb., “ya lentswe la yo o tlhaeletsang.”
^ Seheb., “Ke didimaditswe.”
^ Kgotsa “bo diretswe tetlanyo.”
^ Kgotsa “go na le nngwesomeng.”
^ Mofuta mongwe wa ditlhare tse dikgolo. Ka Seesemane se bidiwa oak.
