Isaia 7:1-25
7 Mo motlheng wa ga Ahase+ morwa Jothame morwa Usia, kgosi ya Juda, Kgosi Resine wa Siria le Peka+ morwa Remalia, kgosi ya Iseraele, ba ne ba tla go tlhabana le Jerusalema, mme o* ne a se ka a kgona go e gapa.+
2 Ba losika lwa segosi lwa ga Dafide ba ne ba begelwa jaana: “Masole a Siria le masole a Eferaime a ipopile ngatana e le nngwe.”
Mme pelo ya ga Ahase le dipelo tsa batho ba gagwe di ne tsa simolola go roroma, jaaka ditlhare tsa sekgwa di tshikinngwa ke phefo.
3 Foo Jehofa o ne a raya Isaia a re: “Tsweetswee, tsamaya o ye go kgatlhantsha Ahase, wena le morwao e bong Sheare-jashube,*+ kwa bofelelong jwa mosele o o tswang mo mogobeng o o kwa godimo+ o o fa tseleng e kgolo e e yang kwa tshimong ya motlhatswi wa matsela.
4 O mo reye o re, ‘Leka go ritibala. O se ka wa boifa, e bile o se ka wa kgobega marapo ka ntlha ya disana tseno tse pedi tse di kuang mosi, ka ntlha ya bogale jo bo tukang jwa ga Resine le Siria le morwa Remalia.+
5 Gonne Siria le Eferaime le morwa Remalia ba logile leano la go go tlhasela, ba re:
6 “A re yeng go tlhasela Juda, re e thubaganye* re bo re e ikgapela,* mme a re tlhomeng morwa Tabeele gore a nne kgosi ya yone.”+
7 “‘Seno ke se Morena Molaodimogolo Jehofa a se buang:
“Leano la bone ga le kitla le atlega,E bile ga le kitla le diragala.
8 Gonne tlhogo ya Siria ke Damaseko,Mme tlhogo ya Damaseko ke Resine.
Mo dingwageng di le 65 felaEferaime o tla bo a tšhwetlakantswe gotlhelele mo a tla bong a sa tlhole a le setšhaba.+
9 Tlhogo ya Eferaime ke Samarea,+Mme tlhogo ya Samarea ke morwa Remalia.+
Fa lo se na tumelo e e nonofileng,Ga lo kitla lo sirelediwa.”’”
10 Jehofa o ne a tswelela a bua le Ahase a re:
11 “Kopa sesupo mo go nna Jehofa Modimo wa gago;+ o ka nna wa kopa se se boteng jaaka Lebitla* kgotsa se se kwa godimo jaaka loapi.”
12 Mme Ahase o ne a re: “Ga nkitla ke se kopa e bile ga nkitla ke go leka Jehofa.”
13 Foo Isaia o ne a re: “Tsweetswee, reetsang lona ditlogolwana tsa ga Dafide. A ga go a lekana go bo lo leka bopelotelele jwa batho? A gape lo tshwanetse go leka bopelotelele jwa Modimo?+
14 Ka jalo, Jehofa ka boene o tla lo naya sesupo: Lekgarebe* le tla ima, mme le tla tshola ngwana wa mosimane,+ mme le tla mmitsa Imanuele.*+
15 O tla bo a setse a ja botoro le tswina ya dinotshe ka nako ya fa a itse go gana bosula le go tlhopha molemo.
16 Gonne pele ga mosimane a itse go gana bosula le go tlhopha molemo, lefatshe la dikgosi tse pedi tse lo di boifang le tla bo le tlogetswe gotlhelele.+
17 Jehofa o tla tlisetsa wena le batho ba gago le ba lelapa la ga rrago nako e e thata e e iseng e ko e nne teng fa e sa le ka motlha o Eferaime a neng a kgaogana le Juda ka one,+ ka gonne o tla tlisa kgosi ya Asiria.+
18 “Mo letsatsing leo, Jehofa o tla leletsa dintsi tse di kwa meseleng e e kgakala ya noka ya Nile e e kwa Egepeto molodi le dinotshe tsa naga ya Asiria,
19 mme tsotlhe di tla tla di bo di nna mo mekgatšheng* e e kgokologang, mo diphatlheng tsa mafika, le mo ditlhatshaneng tsotlhe tsa mmitlwa le mo mafelong otlhe a diphologolo di nwang metsi mo go one.
20 “Mo letsatsing leo, Jehofa o tla dirisa legare le le thapilweng go tswa kwa kgaolong ya Noka,* o tla dirisa kgosi ya Asiria+ go lo beola tlhogo le moriri wa maoto le go tlosa le ditedu.
21 “Mo letsatsing leo, motho o tla sala ka kgongwana ya motlhape le dinku tse pedi.
22 Mme ka ntlha ya mashi a mantsi, o tla ja botoro, ka gonne mongwe le mongwe yo o tla bong a setse mo lefatsheng o tla ja botoro le tswina ya dinotshe.
23 “Mo letsatsing leo, gongwe le gongwe kwa go kileng ga bo go na le ditlhare tsa morara* di le 1 000 tse di jang dishekele tsa selefera di le 1 000, go tla nna le ditlhatshana tsa mmitlwa le mefero fela.
24 Batho ba tla ya teng ba tshwere motswi le bora, ka gonne lefatshe lotlhe le tla bo le tletse ditlhatshana tsa mmitlwa le mefero.
25 Mme dithaba tsotlhe tse di kileng tsa bo di tlhagolwa ka mogoma, ga o kitla o di atamela ka gonne o boifa ditlhatshana tsa mmitlwa le mefero; di tla fetoga lefelo le dipoo le dinku di fulang mo go lone.”
Dintlha Tse di Kwa Tlase
^ Kgotsa gongwe “ba.”
^ Mo go kayang “Go Tla Boa Masalela Fela.”
^ Kgotsa gongwe “re e tsenye tsebetsebe.”
^ Kgotsa “re dira phatlha mo maboteng a yone.” Seheb., “phatlola.”
^ Kgotsa “Sheole.” Bona Ditlhaloso Tsa Mafoko.
^ Kgotsa “Morweetsana.”
^ Mo go kayang “Modimo O na Le Rona.”
^ Kgotsa “melapong.”
^ Go tewa Euferatese.
^ Kgotsa “diterebe; moretlwa.”
