Jeremia 17:1-27
17 “Boleo jwa Juda bo kwadilwe ka pene e e gabang ya tshipi.
Bo gabilwe ka teemane e e dirisediwang go kwala mo pelong ya boneLe mo dinakeng tsa dibeso tsa bone.
2 Tota le bomorwaabone ba gakologelwa dibeso tsa bone le dikota tsa bone tse di boitshepo*+Tse di bapileng le setlhare se segolo, mo dithoteng tse di goletseng kwa godimo,+
3 Le mo dithabeng tse di mo nageng.
Ke tla letla batho gore ba gape dikhumo tsa gago, e leng matlotlo otlhe a gago,+Mafelo a gago a a kwa godimo a a boitshepo ka ntlha ya boleo jwa gago jo bo tletseng mo nageng ya gago.+
4 O tla latlhegelwa ke boswa jo ke neng ke go bo neile, e leng selo se o se itirileng.+
Mme ke tla dira gore o direle baba ba gago mo lefatsheng le o sa le itseng,+Gonne lo tukisitse bogale jwa me jaaka molelo.*+
Bo tla tuka ka bosakhutleng.”
5 Seno ke se Jehofa a se buang:
“Go hutsegile motho* yo o ikanyang batho,+Yo o ikaegang ka maatla a batho,*+Le yo o tlogelang Jehofa.
6 O tla tshwana le setlhare se se emeng se le nosi mo sekakeng.
Ga a kitla a bona se se molemo fa se tla,Mme o tla nna mo mafelong a a omeletseng mo nageng,Mo nageng ya letswai e go seng motho ope yo o ka nnang mo go yone.
7 Go itumela motho* yo o ikanyang Jehofa,Yo o nnang a tshepile Jehofa.+
8 O tla nna jaaka setlhare se se jadilweng fa metsing,Se medi ya sone e namelang mo molatswaneng.
Ga a kitla a lemoga fa go nna mogote,Mme matlhare a gagwe a tla nna a le matala.+
Le mo ngwageng wa leuba ga a kitla a tlhobaela,E bile ga a kitla a tlogela go ungwa.
9 Pelo e boferefere* go gaisa sengwe le sengwe e bile e gagamalela se e se batlang.*+
Ke mang yo o ka e itseng?
10 Nna Jehofa, ke sekaseka pelo,+Ke tlhatlhoba dikakanyo tse di kwa tengteng,*Gore ke duele mongwe le mongwe go ya ka ditsela tsa gagwe,Go ya ka maungo a ditiro tsa gagwe.+
11 Motho yo o ikokoanyetsang dikhumo ka boferefere,*+O tshwana le lesogo le le phuthang mae a le sa a beelang.
O tla swa a sa ntse a le mosha a bo a di tlogela,Mme kwa bokhutlong go tla bonala gore ga a na tlhaloganyo.”
12 Setulo sa bogosi se se galalelang, se se tlotlomaditsweng go tswa kwa tshimologong,Ke lefelo la rona le le boitshepo.+
13 Jehofa, o tsholofelo ya Iseraele,Botlhe ba ba go tlogelang ba tla tlhabiwa ke ditlhong.
Ba ba go tlhanogelang* ba tla fedisiwa,*+Ka gonne ba tlogetse Jehofa, motswedi wa metsi a a tshelang.+
14 Mphodise tlhe Jehofa, mme ke tla fola.
Mpoloke, mme ke tla bolokega,+Gonne ke wena yo ke go bakang.
15 Go na le ba ba nthayang ba re:
“Lefoko la ga Jehofa le kae?+
Tsweetswee, a le diragale!”
16 Mme nna, ga ke a ka ka tlogela go go sala morago ke le modisa,E bile ga ke a ka ka nnela go kopa gore letsatsi la masetlapelo le tle.
O itse sengwe le sengwe se molomo wa me o neng o se bua;Tsotlhe di ne tsa direga mo matlhong a gago!
17 O se ka wa ntshosa.
O botshabelo jwa me mo letsatsing la matshwenyego.
18 A babogisi ba me ba tlhabiwe ke ditlhong,+Mme o se ka wa letla gore ke tlhabiwe ke ditlhong.
A ba welwe ke poifo,Mme o se ka wa letla gore ke welwe ke poifo.
Ba tlisetse letsatsi la masetlapelo,+Mme o ba thubaganye o bo o ba senye.*
19 Jehofa o ne a nthaya a re: “Tsamaya, mme o eme mo kgorong e kgolo* e dikgosi tsa Juda di tsenang ka yone le e di tswang ka yone, le mo dikgorong tsotlhe tsa Jerusalema.+
20 O ba reye o re, ‘Utlwang lefoko la ga Jehofa, lona dikgosi tsa Juda, batho botlhe ba Juda le banni botlhe ba Jerusalema, ba lo tsenang ka dikgoro tseno.
21 Seno ke se Jehofa a se buang: “Ikeleng tlhoko, mme lo se ka lwa rwala morwalo ope ka letsatsi la Sabata kgotsa lwa tsena ka one mo dikgorong tsa Jerusalema.+
22 Ga lo a tshwanela go ntsha morwalo ope mo magaeng a lona ka letsatsi la Sabata; e bile ga lo a tshwanela go dira tiro epe.+ Bolokang letsatsi la Sabata le le boitshepo, fela jaaka ke ne ka laela borraalonamogolo.+
23 Mme ga ba a ka ba reetsa kgotsa ba tlhwaya tsebe, mme ka botlhogoethata ba ne ba gana* go ikoba le go amogela kotlhao.”’+
24 “‘“Le fa go ntse jalo, fa lo inkobela ka botlalo,” go bua Jehofa, “mme lo sa tsene ka morwalo ope mo dikgorong tsa motse ono ka letsatsi la Sabata, e bile lo boloka letsatsi la Sabata le le boitshepo ka go se dire tiro epe ka lone,+
25 foo dikgosi le dikgosana tse di nnang mo setulong sa bogosi sa ga Dafide+ le tsone di tla tsena ka dikgoro tsa motse ono, di palame kara le dipitse, tsone le dikgosana tsa tsone, batho ba Juda le banni ba Jerusalema;+ mme motse ono o tla nniwa ka bosakhutleng.
26 Mme batho ba tla tla ba tswa kwa metseng ya Juda, kwa mafelong a a dikologileng Jerusalema, kwa lefatsheng la Benjamine,+ kwa nageng e e kwa tlase,+ kwa kgaolong e e dithaba le kwa Negebe,* ba tlisitse ditlhabelo tse di fisiwang di feletse,+ ditlhabelo tse dingwe,+ ditlhabelo tsa dijo tsa ditlhaka,+ borekhu jo bo nkgang monate* le ditlhabelo tsa go leboga mo ntlong ya ga Jehofa.+
27 “‘“Mme fa lo sa inkobele, lo sa boloke letsatsi la Sabata le le boitshepo e bile lo rwala merwalo lo bo lo tsena ka yone mo dikgorong tsa Jerusalema ka letsatsi la Sabata, ke tla tshuba dikgoro tsa gagwe ka molelo, mme ruri o tla laila ditora tsa Jerusalema+ tse di sireletsegileng mme ga o kitla o tingwa.”’”+
Dintlha Tse di Kwa Tlase
^ Bona polelwana “Kota e e boitshepo” mo Ditlhaloso Tsa Mafoko.
^ Kgotsa gongwe “Gonne lo tlhoseditswe mo bogaleng jwa me fela jaaka molelo.”
^ Kgotsa “monna yo o nonofileng.”
^ Seheb., “yo o dirang nama lebogo la gagwe.”
^ Kgotsa “monna yo o nonofileng.”
^ Kgotsa “e tsietsa.”
^ Kgotsa gongwe “ga e alafesege.”
^ Kgotsa “maikutlo a a kwa teng thata.” Seheb., “diphilo.”
^ Kgotsa “tshiamololo.”
^ Seheb., “ba tla kwalwa mo loroleng.”
^ Seheb., “ntlhanogelang,” go lebega go tewa Jehofa.
^ Kgotsa “ba senye go menagane gabedi.”
^ Seheb., “mo kgorong ya bomorwa batho.”
^ Seheb., “mme ba ne ba thatafatsa thamo ya bone.”
^ Kgotsa “borwa.”
^ Seheb., “lebano.”
