Jobe 33:1-33
33 “Mme jaanong Jobe, tsweetswee utlwa mafoko a me;Reetsa sengwe le sengwe se ke se buang.
2 Tsweetswee, ntheetse;Ke tshwanetse go bua.
3 Mafoko a me a bontsha gore pelo+ ya me e siame,Le se ke se buang se boammaaruri.
4 Moya wa Modimo o ne wa ntira,+Le mohemo wa Mothatayotlhe o ne wa ntshedisa.+
5 Fa o kgona, nkarabe;Iphemele fa pele ga me; ema mo maemong a gago.
6 Ke tshwana fela le wena fa pele ga Modimo wa boammaaruri;Le nna ke ne ka bopiwa ka letsopa.+
7 Ka jalo, ga o a tshwanela go mpoifa,E bile se ke tla se go bolelelang ga se kitla se go imela.
8 Mme o ne wa bua jaana ke reeditse,Ruri ke ne ka nna ka utlwa mafoko ano,
9 ‘Ke itshekile, ga ke na molato ope;+Ke phepa, ga ke na phoso epe.+
10 Le fa go ntse jalo, Modimo o nna le mabaka a go nkganetsa;O ntsaya ke le mmaba wa gagwe.+
11 O bofelela dinao tsa me mo dikoteng tsa go golega;*O sekaseka ditselana tsa me tsotlhe.’+
12 Mme gone ga o bue boammaaruri fa o rialo, ka jalo ke tla go araba:
Modimo o mogolo thata go feta motho.+
13 Goreng o ngongorega ka Modimo?+
A ke ka gonne a sa araba mafoko otlhe a gago?+
14 Gonne Modimo o bua gangwe le gape,Mme ga go motho ope yo o reetsang,
15 O bua ka toro, ponatshegelo ya bosigo,+Fa batho ba welwa ke boroko jo bogolo,Fa ba ntse ba robetse mo malaong a bone.
16 Foo o kabolola ditsebe tsa bone+A bo a gatelela* ditaelo tsa gagwe mo go bone,
17 Gore a fapose motho mo go direng bosula+Le gore a thibele motho go nna boikgogomoso.+
18 Modimo o a mmoloka gore a se ka a tsena mo lebitleng,+O boloka botshelo jwa gagwe gore bo se ka jwa nyelediwa ka tšhaka.*
19 Motho o ithuta sengwe fa a le mo bolaong ka ntlha ya ditlhabiLe fa marapo a gagwe a le botlhoko ka dinako tsotlhe,
20 Mo e leng gore o* ila senkgwe,E bile o gana le dijo tse di monate.+
21 O simolola go bopama thata,Mme marapo a gagwe a a neng a fitlhegile jaanong a a tlhaga.*
22 O* atamela lebitla;Botshelo jwa gagwe bo atamela ba ba batlang go mmolaya.
23 Fa e le gore go na le morongwa* yo a mo tlhometsweng,Mmueledi a le mongwe mo go ba le sekete,Gore a bolelele motho se se siameng,
24 Foo Modimo o tla mo utlwela botlhoko a bo a re,‘Mo golole gore a se ka a fologela mo lebitleng!+
Ke bone thekololo ya botshelo jwa gagwe!+
25 A nama ya gagwe e ntšhafale* go gaisa fa a ne a le mosha,+A a boele kwa malatsing a bosha jwa gagwe a go nna matlhagatlhaga.’+
26 O tla rapela Modimo,+ mme o tla mo amogela,Mme o tla goa ka boitumelo fa a bona sefatlhego sa Modimo,Mme Modimo o tla busetsa tshiamo ya Gagwe mo mothong.
27 Motho yoo o tla raya* batho a re,‘Ke leofile+ e bile ke sokamisitse se se siameng,Mme ga ke a ka ka amogela se se neng se ntshwanetse.*
28 O nkgolotse gore ke se ka ka tsena mo lebitleng,+Mme ke tla tswelela ke tshela.’
29 Eleruri, Modimo o dira dilo tseno tsotlheA di direla motho gangwe le gape,
30 Gore a mo ntshe mo lebitleng,E le gore a phatsimelwe ke lesedi la botshelo.+
31 Tlhwaya tsebe, Jobe! Ntheetse!
Didimala, mme nna ke tla tswelela ke bua.
32 Fa e le gore go na le sengwe se o batlang go se bua, nkarabe.
Bua, ka gonne nka rata go bontsha gore ga o na molato.
33 Fa go se na sepe se o ka se buang, ntheetse;Didimala, mme ke tla go ruta botlhale.”
Dintlha Tse di Kwa Tlase
^ Bona Ditlhaloso Tsa Mafoko.
^ Seheb., “a baya letshwao mo.”
^ Kgotsa “ka sebetsa (mmisaele).”
^ Seheb., “botshelo jwa gagwe bo.”
^ Kgotsa “bonala.”
^ Kgotsa “Botshelo jwa gagwe bo.”
^ Kgotsa “moengele.”
^ Kgotsa “e nne ntle.”
^ Seheb., “opelela.”
^ Kgotsa gongwe “Mme seo ga se a ntsholegela molemo.”
