Efangele ya ga Johane 2:1-25
2 Mme mo letsatsing la boraro go ne ga nna le mokete wa lenyalo kwa Kana wa Galalea, mme mmaagwe Jesu o ne a le teng koo.
2 Jesu le barutwa ba gagwe le bone ba ne ba laleditswe kwa moketeng oo wa lenyalo.
3 Fa beine e tloga e fela, mmaagwe Jesu o ne a mo raya a re: “Ga ba na beine.”
4 Le fa go ntse jalo, Jesu o ne a mo raya a re: “Mosadi, seo se ama nna le wena jang?* Nako ya me ga e ise e tle.”
5 Mmaagwe o ne a raya ba ba abelang batho beine a re: “Lo dire sengwe le sengwe fela se a se lo bolelelang.”
6 Go ne go na le dinkgo tsa metsi tsa leje di le thataro jaaka go ne go tlhokega go ya ka melao ya Bajuda, gore ba tle ba tlhape diatla pele ga ba ja.+ Nkgo nngwe le nngwe e ne e kgona go tshola dilitara di ka nna 44 kgotsa 66.*
7 Jesu o ne a ba raya a re: “Tlatsang dinkgo tseno ka metsi.” Ka jalo, ba ne ba di tlatsa.
8 Go tswa foo, o ne a ba raya a re: “Jaanong gelelang mangwe a one mme lo a ise kwa morulaganying wa mokete.” Ka jalo, ba ne ba a isa.
9 E rile mokaedi wa mokete a utlwa metsi a jaanong a neng a fetotswe beine, mme a sa itse gore e ne e tswa kae (le fa gone batlhanka ba ba neng ba gile metsi ba ne ba itse), mokaedi wa mokete o ne a bitsa monyadi
10 mme o ne a mo raya a re: “Batho ba bangwe botlhe ba ntsha beine e e monate pele, mme fa batho ba tagilwe, ba ntsha ya maemo a a kwa tlase. Wena o ntse o beile beine e e monate go fitlha jaanong.”
11 Jesu o ne a dira seno kwa Kana wa Galalea e le kgakgamatso ya gagwe ya ntlha, ka tsela eo, o ne a bonatsa kgalalelo ya gagwe,+ mme barutwa ba gagwe ba ne ba dumela mo go ene.
12 Morago ga seno ene le mmaagwe le bomonnawe*+ le barutwa ba gagwe ba ne ba ya kwa Kaperenama,+ mme ga ba a ka ba nna koo malatsi a le mantsi.
13 Jaanong Tlolaganyo+ ya Bajuda e ne e le gaufi, mme Jesu o ne a ya kwa Jerusalema.
14 O ne a fitlhela ba ba rekisang dikgomo, dinku le maphoi,+ le baananyi ba madi* ba le mo ditulong tsa bone mo tempeleng.
15 Ka jalo, fa a sena go loga seme sa megala, o ne a kobela batho botlhe ba ba tshotseng dinku le dikgomo kwa ntle ga tempele, e bile o ne a tsholola madi a tshipi a baananyi ba madi a bo a pitikolola ditafole tsa bone.+
16 Mme o ne a raya ba ba rekisang maphoi a re: “Ntshang dilo tseno fano! Tlogelang go dira ntlo ya ga Rre ntlo ya kgwebo!”*+
17 Barutwa ba gagwe ba ne ba gakologelwa gore go kwadilwe jaana: “Tsela e ke ratang ntlo ya gago ka yone e tla nna jaaka molelo mo pelong ya me.”*+
18 Ka jalo, Bajuda ba ne ba mo raya ba re: “O ka re bontsha sesupo sefe+ sa gore o na le tshwanelo ya go dira dilo tseno?”
19 Jesu o ne a ba araba a re: “Digang tempele eno, mme mo malatsing a le mararo ke tla e tsosa.”+
20 Foo Bajuda ba ne ba re: “Tempele eno e ne ya agiwa mo dingwageng di le 46, mme wena o a re o tla e tsosa mo malatsing a le mararo?”
21 Mme fa a bua ka tempele, o ne a raya mmele wa gagwe.+
22 E rile a tsosiwa mo baswing, barutwa ba gagwe ba ne ba gakologelwa gore o ne a tle a bue seo,+ mme ba ne ba dumela se Dikwalo di se buang le se Jesu a neng a se buile.
23 Le fa go ntse jalo, e rile a le kwa Jerusalema kwa moletlong wa Tlolaganyo, batho ba le bantsi ba ne ba dumela mo leineng la gagwe fa ba bona dikgakgamatso tse a neng a di dira.
24 Mme Jesu o ne a sa ba tshepe ka ntlha ya gore o ne a ba itse botlhe
25 le ka ntlha ya gore o ne a sa tlhoke go bolelelwa sepe ka batho, ka gonne o ne a itse se se mo pelong ya motho.+
Dintlha Tse di Kwa Tlase
^ Ke sekapuo sa Ba-Semite se se dirisiwang fa motho a gana. Go dirisiwa ga lefoko “mosadi” ga go bontshe go tlhoka tlotlo.
^ Kgotsa “dilekanyo tsa bata di le pedi kgotsa di le tharo.” Bata e lekana le 22 L. Bona Dintlha B14.
^ Seger., “bomorwarraagwe.”
^ Go tewa batho ba ba tšhentšhang madi ba batla morokotso.
^ Kgotsa “marekisetso.”
^ Seger., “Tlhoafalo ya ntlo ya gago e tla nja.”
