Moreri 5:1-20
5 Disa dikgato tsa gago ka dinako tsotlhe fa o ya kwa ntlong ya Modimo wa boammaaruri;+ go botoka go atamela o tla go reetsa+ go na le go ntsha setlhabelo jaaka dimatla di dira,+ ka gonne ga di lemoge gore se di se dirang se bosula.
2 O se ka wa itlhaganelela go bua, e bile o se ka wa letla pelo ya gago ya potlakela go bua fa pele ga Modimo wa boammaaruri,+ ka gonne Modimo wa boammaaruri o kwa magodimong mme wena o mo lefatsheng. Ke gone ka moo mafoko a gago a tshwanetseng go nna mmalwa.+
3 Gonne toro e nna teng ka ntlha ya ditiro tse dintsi thata,*+ e bile sematla se bua thata ka ntlha ya mafoko a sone a mantsi thata.+
4 Nako le nako fa o direla Modimo maikano, o se ka wa diega go a diragatsa,+ ka gonne ga a itumedisiwe ke dimatla.+ Se o ikanneng gore o tla se dira, se diragatse.+
5 Go botoka gore o se ka wa ikana go na le gore o ikane o bo o sa diragatse.+
6 O se ka wa letla molomo wa gago o go leofisa,*+ e bile o se ka wa bua fa pele ga moengele* o re maikano a gago e ne e le phoso.+ Ke ka ntlha yang fa o galefisa Modimo wa boammaaruri ka se o se buang mo a tla tshwanelwang ke go senya tiro ya diatla tsa gago?+
7 Gonne fela jaaka ditiro tse dintsi thata di felela ka ditoro,+ ka tsela e e tshwanang mafoko a mantsi thata a felela ka lefela. Le fa go ntse jalo, boifa Modimo wa boammaaruri.+
8 Fa o bona bahumanegi ba gatelelwa e bile go sa diragadiwe tshiamiso le tshiamo mo kgaolong ya lona, o se ka wa gakgamadiwa ke kgang eo.+ Gonne molaodi yoo o lebilwe ke mongwe yo o kwa godimo go mo feta, e bile go sa ntse go na le ba bangwe ba ba kwa godimo go ba feta.
9 Gape, botlhe ba kgaoganyediwa thobo ya naga ya bone; tota le se kgosi e se jang se tswa mo tshimong.+
10 Motho yo o ratang selefera ga a kitla a kgotsofadiwa ke selefera, e bile motho yo o ratang dikhumo ga a kitla a kgotsofadiwa ke lotseno.+ Seno le sone ke lefela.+
11 Fa dilo tse di molemo di oketsega, ba ba di jang ba a oketsega.+ Mme mong wa tsone o solegelwa molemo ke eng, fa e se gore a di lebe fela ka matlho?+
12 Boroko jwa motlhanka bo monate, a ka tswa a ja go le gonnye kgotsa go le gontsi, mme letlotlo la mohumi ga le mo letle go robala.
13 Go na le masetlapelo ano a magolo a ke a boneng mo lefatsheng:* dikhumo tse mong wa tsone a neng a di ipeetse, tse di neng tsa felela di mo utlwisa botlhoko.
14 Dikhumo tseo di ne tsa mo latlhegela ka ntlha ya tiragalo* ya masetlapelo, mme fa a tsholelwa ngwana wa mosimane ga go na sepe se a ka se nayang ngwana yoo e le boswa.+
15 Fela jaaka motho a ne a tswa mo popelong ya ga mmaagwe a sa apara, o tla tsamaya a ntse fela jalo.+ E bile ga a ka ke a tsamaya a tshotse sepe se a se bereketseng ka natla.+
16 Seno le sone ke masetlapelo a magolo: Fela jaaka a ne a tla, o tla tsamaya a ntse fela jalo; mme motho yo o nnang a dira ka natla a direla phefo o na le poelo efe?+
17 Gape o jela mo lefifing letsatsi le letsatsi, a tshwenyegile thata, a lwala e bile a galefile.+
18 Seno ke se ke boneng se le molemo e bile se tshwanela: gore motho a je, a nwe a bo a itumelele tiro yotlhe e a e dirang ka natla mo lefatsheng,*+ mo malatsing a le mmalwa a botshelo jwa gagwe a Modimo wa boammaaruri a mo neileng one, ka gonne seo ke tuelo* ya gagwe.+
19 Gape, fa Modimo wa boammaaruri a naya motho dikhumo le dithoto,+ mmogo le bokgoni jwa go di itumelela, o tshwanetse go tsaya tuelo* ya gagwe a bo a itumelela tiro ya gagwe ya bonatla. Seno ke mpho ya Modimo.+
20 Gonne ga a kitla a lemoga* fa malatsi a botshelo jwa gagwe a feta, ka gonne Modimo wa boammaaruri o dira gore a nne a tshwaregile ka go dira gore pelo ya gagwe e itumele.+
Dintlha Tse di Kwa Tlase
^ Kgotsa “dilo tse dintsi tse di tshwanetseng go dirwa.”
^ Seheb., “o leofisa nama ya gago.”
^ Kgotsa “morongwa.”
^ Seheb., “ka fa tlase ga letsatsi.”
^ Kgotsa “tiro.”
^ Seheb., “ka fa tlase ga letsatsi.”
^ Kgotsa “kabelo.”
^ Kgotsa “kabelo.”
^ Kgotsa “gopola.”
