A o Ipeetse Mekgele E o Ka e Fitlhelelang?

● O batla go fitlhelela eng mo botshelong? A o lebeletse dilo tse o ka di fitlhelelang kgotsa a o ijesa dijo tsa ditoro ka dilo tse o ka se kang wa kgona go fitlhelela? Motho mongwe yo o neng a etse tlhoko tsela e motho a tlholegileng ka yone o ne a neela kgakololo eno e e botlhale: “Go botoka go kgotsofalela se se fa pele ga matlho a gago go na le go itetla go laolwa ke keletso; seno le sone ke lefela le go lelekisa phefo.”—Moreri 6:9, The New English Bible.

“Se se fa pele ga matlho a [rona]” se kaya maemo a re leng mo go one le dilo tse e leng tsa mmatota. Ke boammaaruri gore ga go na sepe se se phoso ka go leka go tokafatsa matshelo a rona. Le fa go ntse jalo, ntlha e Baebele e e tlhalosang ke gore, batho ba ba botlhale ga ba ipeele mekgele e ba se kitlang ba kgona go e fitlhelela. Mekgele eno e ka nna ya nna go nna le botumo, dikhumo, molekane yo o tshwanelang wa lenyalo kgotsa botsogo jo bo itekanetseng.

Mo godimo ga moo, batho ba ba fitlhelelang mokgele o o rileng, o o jaaka go nna le dikhumo, ba ka nna ba tswelela ba batla mo go oketsegileng. Baebele e bolela jaana e sa fitlhe sepe: “Morati wa selefera ga a kitla a kgotsofadiwa ke selefera, le fa e le morati ope wa khumo ga a kitla a kgotsofadiwa ke madi a lotseno. Seno le sone ke lefela.” (Moreri 5:10) Ka jalo, batho ba ba botlhale semoyeng, ba leka go kgotsofalela se ba nang le sone, “se se fa pele ga matlho [a bone].” Ee, ba amogela boammaaruri jono: “Ga re a tlisa sepe mo lefatsheng, mme le gone re ka se ka ra tswa re tshotse sepe.”—1 Timotheo 6:7.

Ka tlholego fela, batho ba ba nang le boitumelo jo bogolo ke ba ba tshwenyegang ka dilo tse ba di tlhokang semoyeng. (Mathaio 5:3) Re ka dira seo jang? Jesu Keresete o ne a bolela jaana: “Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.” (Mathaio 4:4) Mafoko a a botlhokwa ao a fitlhelwa mo Baebeleng mme a ka bonwa mahala.

Mangwe a mafoko ao a fitlhelwa mo go Pesalema 37:4. E balega jaana: “Itumelele Jehofa thata, mme o tla go naya dikopo tsa pelo ya gago.” E re ka Jehofa e le Modimo Mothatayotlhe, o tla naya baobamedi ba gagwe ba ba ikanyegang dilo tse go se nang motho ope yo o ka di ba nayang: botsogo jo bo itekanetseng, go nna le dilo tse re di tlhokang le botshelo jo bo sa khutleng mo lefatsheng la Paradaise. (Luke 23:43; Tshenolo 21:3, 4) Go ikanya mafoko ano ga se go ijesa dijo tsa ditoro.