Setlhopha sengwe sa baitsesaense se dumela gore dilo tse di dirilweng ke batho di ka tswa di bakile thoromo ya lefatshe ya 2011 kwa Lorca, kwa borwa jwa Spain, e e bolaileng batho ba le robongwe mme ya gobatsa ba le bantsintsi. Batho ba ba ithutang ka maje ba fitlhetse gore go na le go tsamaisana fa gare ga thoromo eo e e kotsi le mafelo a go neng go tserwe metsi a mantsi mo go one ka fa tlase ga lefatshe gore go nosediwe ka one.

Bajanala ba ba tswang kwa China ba dirisitse dibilione di le 918 tsa diranta mo mesepeleng ya go etela dinaga tse dingwe ka 2012. Go ya ka World Tourism Organization ya Lekgotla la Ditšhaba Tse di Kopaneng, palo eno e dira gore e nne lekgetlo la ntlha China e di goga kwa pele mo ditšhabeng tse di dirisang madi mo mesepeleng ya go jela dinaga di sele nala—e fetile Jeremane le United States. Bajanala ba ba etelang dinaga di sele go tswa mo go nngwe le nngwe ya dinaga tseno tse pedi ba dirisitse mo e ka nnang dibilione di le 756 tsa diranta.

Patlisiso e e begilweng mo BMJ, lokwalopaka lwa tsa kalafi lwa kwa Boritane, e ne ya baya batho ba ka nna 68 000 ba kwa Japane leitlho ka palogare ya dingwaga di le 23. Babatlisisi ba lemogile gore basadi ba ba tshotsweng fa gare ga dingwaga tsa 1920 le 1945 ba ba simolotseng go goga motsoko pele ba tshwara dingwaga tse 20 ba tshetse dingwaga tse di kwa tlase ka palogare ya dingwaga di le lesome fa ba bapisiwa le basadi ba ba iseng ba ko ba tsamaye ba goge motsoko; banna bone ba tshetse dingwaga di le robedi kwa tlase ga tsone.

Go romelwa ga dikgetsana tsa polasetiki mo nageng eno, go dirwa ga tsone le go dirisiwa ga tsone go ileditswe e le go sireletsa botshelo jwa diphologolo tsa mo lewatleng le tsa mo lefatsheng tse di ka swang fa di sena go di ja. Puso e buelela gore mo boemong jwa tsone go dirisiwe dikgetsana tse di dirilweng ka dilo tsa tlholego tse di sa senyeng tikologo fa di latlhiwa.

Dikhampani tsa diinshorense di ntsha mo e ka nnang dibilione di le 450 tsa diranta ngwaga le ngwaga go duelela ditshenyegelo tse di bakilweng ke masetlapelo a maemo a bosa. Ditshenyegelo tseo, tse di nnang di fetolwa go ya ka selekanyo sa go tlhatloga ga ditlhwatlhwa, di oketsegile go feta go menagane gabedi dingwaga dingwe le dingwe di le lesome fa e sa le ka bo1980.