1. Re ka ipeela mekgele efe mo phuthegong?

 E RE ka re le Bakeresete ba boammaaruri, re rata Jehofa fela thata. Re batla go dira sotlhe se re ka se kgonang mo tirelong ya gagwe. Mme gone, gore re kgone go dira jalo re tshwanetse go ipeela mekgele mo phuthegong, e e jaaka go nna le dinonofo tse Jehofa a batlang gore re nne le tsone, go nna le bokgoni jwa go dira dilo dingwe le go batla ditsela tsa go thusa ba bangwe. *

2. Goreng re tshwanetse go ipeela mekgele mo phuthegong le go dira ka natla gore re e fitlhelele?

² Goreng re tshwanetse go nna le keletso ya go gatela pele mo phuthegong? Lebaka la botlhokwa ke gore re batla go itumedisa Rraarona yo o lorato yo o kwa legodimong. Jehofa o a itumela fa a bona re dirisa bokgoni jwa rona ka botlalo mo tirelong ya gagwe. Mo godimo ga moo, re batla go gatela pele gore re kgone go thusa bakaulengwe le bokgaitsadi ba rona. (1 Bathes. 4:9, 10) Le fa re ka tswa re na le dingwaga di le dintsi re itse boammaaruri, rotlhe re ka kgona go gatela pele mo phuthegong. A re boneng gore re ka dira seo jang.

3. Ke eng se moaposetoloi Paulo a ileng a kgothaletsa Timotheo gore a se dire mo go 1 Timotheo 4:12-16?

³ Le fa gone Timotheo a ne a sa ntse a le mosha fa moaposetoloi Paulo a ne a mo kwalela lekwalo la ntlha, o ne a setse a na le lobakanyana e le mogolwane. Le fa go ntse jalo, Paulo o ile a mo kgothaletsa gore a nne a gatela pele mo tirelong ya ga Jehofa. (Bala 1 Timotheo 4:12-16.) Fa o bala mafoko a ga Paulo, o  tla lemoga gore o ne a batla gore Timotheo a gatele pele ka ditsela tseno tse pedi: a nne le dinonofo tse Jehofa a batlang gore re nne le tsone tse di jaaka lorato, tumelo le boitsheko le gore a tokafatse bokgoni jo bo jaaka go balela ba bangwe, go ba rotloetsa le go ba ruta. Re tla tlotla ka sekao sa ga Timotheo gore re bone kafa go ipeela mekgele e re ka kgonang go e fitlhelela, go ka re thusang ka gone go gatela pele mo tirelong ya ga Jehofa. Gape re tla bona gore re ka dira eng gore re oketse bodiredi jwa rona.

4. Go ya ka Bafilipi 2:19-22, ke ka ntlha ya eng fa Jehofa a ne a dirisa Timotheo?

⁴ Ke ka ntlha ya eng fa Jehofa a ne a dirisa Timotheo? Ka gonne o ne a na le dinonofo tse Jehofa a batlang gore re nne le tsone. (Bala Bafilipi 2:19-22.) Tsela e Paulo a tlhalosang Timotheo ka yone, e bontsha gore Timotheo o ne a ikokobeditse, a ikanyega, a dira ka natla e bile a ka ikanngwa. O ne a rata bakaulengwe ba gagwe e bile o ne a amega ka bone. Seo se ne sa dira gore Paulo a rate Timotheo a bo a mo neye dikabelo tse di thata. (1 Bakor. 4:17) Ka tsela e e tshwanang, Jehofa o tla re rata e bile o tla re dirisa mo phuthegong ya gagwe fa re leka ka natla go nna le dinonofo tse a batlang gore re nne le tsone.—Pes. 25:9; 138:6.

5. (a) O ka tlhopha jang nonofo e o batlang go e tokafatsa? (b) Jaaka re bona mo setshwantshong, kgaitsadi yo mosha o dira eng gore a fitlhelele mokgele wa gagwe wa go utlwela batho ba bangwe botlhoko?

⁵ Ipeele mokgele wa go tokafatsa nonofo nngwe e e rileng. Rapela Jehofa mme o mo kope gore a go thuse go lemoga nonofo e o tlhokang go e tokafatsa. Tlhopha nonofo e le nngwe e o ka e tokafatsang. Ka sekai, o ka nna wa dira tshwetso ya go tokafatsa tsela e o utlwelang batho ba bangwe botlhoko ka yone kgotsa e o thusang bakaulengwe le bokgaitsadi ka yone. Kgotsa gongwe o ka dira ka natla gore o dire kagiso le batho ba bangwe le go ba itshwarela. Gongwe o ka kopa tsala ya gago e o e tshepang thata gore e go bolelele ditsela tse o ka tokafatsang ka tsone.—Diane 27:6.

6. Re ka dira eng gore re tokafatse nonofo nngwe?

⁶ Dira ka natla gore o fitlhelele mokgele wa gago. O ka dira seo jang? O ka ithuta ka kelotlhoko ka nonofo nngwe e o batlang go e tokafatsa. A re re o batla go dira ka natla gore o itshwarele batho ba bangwe. O ka nna wa simolola ka go bala le go akanyetsa kwa teng ka batho ba go buiwang ka bone mo Baebeleng ba ba  ileng ba itshwarela batho ba bangwe ka pelo yotlhe le ba ba neng ba se ka ba dira jalo. Akanya ka sekao sa ga Jesu. O ne a ikemiseditse go itshwarela ba bangwe. (Luke 7:47, 48) Gape o ne a sa nnele go akanya ka diphoso tsa bone, go na le moo o ne a leba dilo tse di molemo mo go bone. Bafarasai ba motlha wa ga Jesu bone, ba ne “ba tsaya batho ba bangwe e se ba sepe.” (Luke 18:9) Fa o sena go akanyetsa kwa teng ka dikao tseno, ipotse jaana: ‘A ke leka go bona dinonofo tse di molemo mo bathong ba bangwe?’ Fa go se motlhofo go itshwarela mongwe, kwala dinonofo tsotlhe tse di molemo tse motho yoo a nang le tsone. Go tswa foo, ipotse jaana: ‘Jesu o leba motho yono jang? A o ne a ka mo itshwarela?’ Go dira jalo go ka fetola tsela e re akanyang ka yone. Kwa tshimologong, go ka nna thata gore re itshwarele motho yo o re kgopisitseng. Mme fa re ntse re leka go tokafatsa, re tla kgona go itshwarela ba bangwe fa nako e ntse e tsamaya.

7. Diane 22:29 e bontsha jang gore Jehofa o dirisa badiri ba ba nang le bokgoni gompieno?

⁷ Mokgele mongwe o o ka ipeelang one ke go ithuta go nna le bokgoni bongwe. Akanya gore go tlhokega badiri ba le kana kang go aga dikago tsa Bethele, Diholo Tsa Dikopano le Diholo Tsa Bogosi. Bontsi jwa badiri bano ba nnile le bokgoni bongwe ka gonne ba ne ba bereka le bakaulengwe ba ba nang le bokgoni. Jaaka re bona mo setshwantshong, bakaulengwe le bokgaitsadi ba ithuta go nna le bokgoni bongwe jo bo thusang gore Diholo Tsa Dikopano le Diholo Tsa Bogosi di nne di le mo maemong a a siameng. Jehofa Modimo e leng “Kgosi ya bosakhutleng” le Jesu Keresete e leng “Kgosi ya . . . dikgosi” ba dirisa ditsela tseno le tse dingwe tse dintsi go thusa badiri ba ba nang le bokgoni gore ba fitlhelele dilo di le dintsi. (1 Tim. 1:17; 6:15; bala Diane 22:29.) Re batla go dira ka natla go dirisa bokgoni jwa rona go galaletsa Jehofa, e seng go ikgalaletsa.—Joh. 8:54.

8. O ka itse jang gore o ka tokafatsa bokgoni bofe?

⁸ Ipeele mokgele wa go tokafatsa bokgoni jo bo rileng. Ke bokgoni bofe jo o ka ithutang go nna le jone? Botsa bagolwane ba phuthego ya lona kgotsa molebedi wa potologo gore ba akanya gore ke bokgoni bofe jo o ka bo tokafatsang. Ka sekai, fa e le gore ba go akantsha gore o tokafatse bokgoni jwa go bua le go ruta, ba botse gore ke eng se tota o tlhokang go berekela mo go sone mo karolong eo. Go tswa foo, dira ka natla go tokafatsa. O ka dira seo jang?

9. O ka dira eng gore o fitlhelele mokgele wa gago wa go tokafatsa bokgoni bongwe?

⁹ Dira ka natla gore o fitlhelele mokgele wa gago. A re re o batla go tokafatsa bokgoni jwa gago jwa go ruta. O ka ithuta boroutšhara jwa Dira Bojotlhe go Bala le go Ruta ka kelotlhoko. Fa o neilwe puo mo dipokanong tsa mo gare ga beke, o ka kopa mokaulengwe yo o tshwanelegang gore a reetse puo ya gago pele o e neela kwa dipokanong le gore a go neye dikakantsho tsa gore o ka tokafatsa kae. Fa o baakanyetsa puo ya gago nako e sa le teng, batho ba tla lemoga gore o dirile ka natla le gore o ka ikanngwa.—Diane 21:5; 2 Bakor. 8:22.

10. Naya sekai se se bontshang gore o ka tokafatsa jang bokgoni bongwe.

¹⁰ Go tweng fa e le gore o ipeetse mokgele wa go nna le bokgoni jwa go dira sengwe se o sa se kgoneng? O se ka wa itlhoboga! Mokaulengwe mongwe yo o bidiwang Garry o ne a sa kgone go bala sentle. O gopola kafa a neng a tlhabiwa ke ditlhong ka gone fa a ne a leka go bala kwa dipokanong. Le fa go ntse jalo, o ne a nna a dira ka natla gore a tokafatse. A re tsela e bakaulengwe ba ba tshwanelegang ba neng ba mo katisa ka yone le e dikgatiso di neng tsa mo thusa ka yone, e ile ya dira gore a kgone go neela dipuo kwa Diholong Tsa Bogosi, kwa dikopanong  tsa potologo le kwa dikopanong tse dikgolo.

11. Fela jaaka Timotheo, ke eng se se ka re thusang gore re dire mo go oketsegileng mo tirelong ya ga Jehofa?

¹¹ A Timotheo o ne a neela dipuo ka tsela e e tlhomologileng kgotsa o ne a nna morutisi yo o setswerere? Baebele ga e re bolelele. Mme ga go pelaelo gore Timotheo o ne a kgona go dira kabelo ya gagwe botoka ka gonne o ne a reetsa kgakololo ya ga Paulo. (2 Tim. 3:10) Ka tsela e e tshwanang, fa le rona re tokafatsa bokgoni jwa rona re tla kgona go dira mo go oketsegileng mo tirelong ya ga Jehofa.

12. Batho ba bangwe ba go thusitse jang?

¹² Rotlhe re solegelwa molemo ke go thusiwa ke batho ba bangwe. Fa re le kwa sepetlele, re a itumela fa bagolwane ba ba mo Dikomiting Tsa Puisano le Dikokelo kgotsa ba ba mo Ditlhopheng Tse di Etelang Balwetse ba tla go re tlhola. Fa re na le mathata mangwe, re a itumela fa mogolwane yo o amegang ka rona a ipha nako ya go re reetsa a bo a re gomotsa. E bile fa re tlhoka thuso ka go tshwara thuto ya Baebele, re a itumela fa mmulatsela yo o nang le maitemogelo a dumela go tsamaya le rona kwa thutong eo a bo a re naya dikakantsho. Bakaulengwe le bokgaitsadi bano ba itumelela go re thusa. Le rona re ka itumela fela jalo fa re ipha nako ya go thusa bakaulengwe ba rona. Jesu o ne a re: “Go aba go itumedisa thata go feta go amogela.” (Dit. 20:35) Fa e le gore o batla go dira mo go oketsegileng mo tirelong ya ga Jehofa ka ditsela tseno le tse dingwe, ke eng se se ka go thusang gore o dire jalo?

13. Fa re ipeela mokgele mongwe, ke eng se re tshwanetseng go nna re se gopotse?

¹³ Ikele tlhoko gore o se ka wa bua fela o re o batla go fitlhelela mokgele mongwe. Ka sekai, o ka akanya jaana, ‘Ke batla go dira mo go oketsegileng mo phuthegong.’ Mme gone, go ka nna thata gore o fitlhelele mokgele oo e bile ga o kitla o kgona go lemoga gore o o fitlheletse. Ka jalo, ipeele mokgele o o rileng o o batlang go o fitlhelela. Tota e bile, o ka kwala mokgele oo le gore o tla o fitlhelela jang.

14. Goreng re tshwanetse go fetofetoga le maemo fa re ipeela mekgele?

¹⁴ Goreng re tshwanetse go fetofetoga le maemo fa re ipeela mekgele? Ka gonne ga re kgone go laola dilo tse di ka re diragalelang mo botshelong. Ka sekai, moaposetoloi Paulo o ne a thusitse gore go tlhomiwe phuthego kwa motseng wa Thesalonika. Ga go pelaelo gore o ne a na le mokgele wa go nna koo le go  thusa batho bao ba ba neng ba sa tswa go nna Bakeresete. Le fa go ntse jalo, baganetsi ba ne ba dira gore Paulo a tswe mo motseng oo. (Dit. 17:1-5, 10) Fa Paulo a ne a sa tswa mo motseng, a ka bo a ile a tsenya matshelo a bakaulengwe ba gagwe mo kotsing. Mme gone, Paulo ga a ka a tlogela go ba thusa. Go na le moo, o ne a fetofetoga le maemo. Moragonyana, o ne a romela Timotheo gore a ye go thusa Bakeresete bao ba kwa Thesalonika gore ba nne le tumelo e e nonofileng. (1 Bathes. 3:1-3) Bakeresete bao ba tshwanetse ba bo ba ne ba itumeletse gore Timotheo o ne a ikemiseditse go ya gongwe le gongwe kwa a neng a tlhokega gone.

15. Maemo a re sa kgoneng go a laola a ka fetola mekgele ya rona jang? Dira sekai.

¹⁵ Re ka ithuta go le gontsi mo go se se neng sa diragalela Paulo kwa Thesalonika. Re ka tswa re ipeetse mokgele mongwe mme maemo a re sa kgoneng go a laola a bo a re thibela go fitlhelela mokgele oo. (Mor. 9:11) Fa e le gore le wena o diragalelwa ke seo, ipeele mokgele o mongwe o o ka kgonang go o fitlhelela. Seo ke se banyalani bangwe ba ba bidiwang Ted le Hiedi ba ileng ba se dira. Ba ile ba tshwanelwa ke go tswa mo Bethele ka ntlha ya bolwetse. Mme e re ka ba rata Jehofa, ba ne ba batla ditsela tse dingwe tsa go oketsa bodiredi jwa bone. Ba ile ba simolola ka go nna babulatsela ba ka metlha. Fa nako e ntse e tsamaya, ba ile ba newa kabelo ya go nna babulatsela ba ba kgethegileng, Ted ene o ne a katisediwa go nna molebedi wa potologo wa nakwana. Mme dingwaga tse balebedi ba potologo ba di beetsweng gore ba tlogele kabelo ya bone ka tsone, di ne tsa fetoga. Ted le Hiedi ba ne ba lemoga gore dingwaga tsa bone ga di tlhole di ba letla go direla Jehofa mo kabelong eo. Le fa gone ba ne ba utlwile botlhoko thata, ba ne ba lemoga gore go na le ditsela tse dingwe tse ba ka direlang Jehofa ka tsone. Ted a re: “Re ithutile gore re ka kgona go direla Jehofa ka ditsela di le dintsi.”

16. Re ithuta eng mo go Bagalatia 6:4?

¹⁶ Ga re kgone go laola sengwe le sengwe se se diragalang mo matshelong a rona. Ka jalo, ga re a tshwanela go akanya gore go nna le ditshiamelo dingwe ke gone mo go dirang gore re nne botlhokwa mo go Jehofa, e bile ga re a tshwanela go ipapisa le batho ba bangwe ba ba nang le ditshiamelo tse rona re se nang tsone. Hiedi a re: “Ga o kitla o itumela fa o ipapisa le batho ba bangwe.” (Bala Bagalatia 6:4.) Sa botlhokwa ke go batla ditsela tsa go thusa ba bangwe le go direla Jehofa. *

17. Ke eng se o ka se dirang gore o nne le ditshiamelo mo phuthegong?

¹⁷ O ka kgona go dira mo go oketsegileng mo tirelong ya ga Jehofa fa o sa raraanye botshelo  jwa gago e bile o sa itsenye mo dikolotong. Ipeele mekgele e mennye e e tla go thusang go fitlhelela mekgele e megolo e o ipeetseng yone. Ka sekai, fa e le gore o batla go nna mmulatsela wa ka metlha, a o ka simolola ka go nna mmulatsela yo o thusang yo o sa kgaotseng? Fa e le gore mokgele wa gago ke go nna motlhanka wa bodiredi, goreng o sa dirise nako ya gago e ntsi mo bodireding le go etela ba ba lwalang kgotsa ba ba godileng mo phuthegong ya lona? Maitemogelo a o nang le one gone jaanong, a ka go thusa gore o nne le ditshiamelo tse di oketsegileng mo nakong e e tlang. Ikemisetse go dira ka natla mo kabelong nngwe le nngwe e o e newang.—Baroma 12:11.

18. Jaaka re bona mo setshwantshong, re ithuta eng mo sekaong sa ga Beverley?

¹⁸ Le fa re ka tswa re godile, re ka kgona go ipeela mekgele mo phuthegong ya ga Jehofa le go e fitlhelela. Akanya ka sekai sa kgaitsadi mongwe yo o nang le dingwaga di le 75 yo o bidiwang Beverley. O ne a na le bolwetse bongwe jo bo neng bo dira gore a se ka a kgona go tsamaya sentle. Mme gone, o ne a batla go dira mo go oketsegileng kwa bodireding gore a kgone go tshegetsa letsholo la Segopotso. Ka jalo, o ne a ipeela mekgele. Beverley o ne a itumela tota fa a ne a fitlhelela mekgele e a neng a ipeetse yone ya gore a nne le seabe mo letsholong leo. Seo se ne sa kgothatsa ba bangwe gore ba dire ka natla mo bodireding. Jehofa o itumelela tiro e bakaulengwe le bokgaitsadi ba ba godileng ba mo direlang ka yone le fa maemo a bone a sa ba letle go dira mo go oketsegileng.—Pes. 71:17, 18.

19. Ke mekgele efe e re ka ipeelang yone mo phuthegong?

¹⁹ Ipeele mekgele e o ka kgonang go e fitlhelela. Lwela go nna le dinonofo tse di tla itumedisang Jehofa. Ithute go nna le bokgoni jo o ka bo dirisang go direla Modimo le jo o ka bo dirisang mo phuthegong ya gagwe. Batla ditsela tse o ka di dirisang go thusa bakaulengwe le bokgaitsadi ba gago. * Fela jaaka Timotheo, batho botlhe ba tla bona tsela e “o gatelang pele ka yone” fa Jehofa a ntse a go segofatsa.—1 Tim. 4:15.