SETLHOGO SE SE ITHUTIWANG 8
PINA 130 Lo Itshwarelane
O ka Itshwarela ba Bangwe Jang Jaaka Jehofa?
“Lo tshwanetse go itshwarelana fela jaaka Jehofa a ne a lo itshwarela.”—BAKOL. 3:13.
SE GO BUIWANG KA SONE
Mo setlhogong seno, re tla tlotla ka dilo tse re ka di dirang gore re itshwarele mongwe yo o re kgopisitseng.
1-2. (a) Ke eng se se ka dirang gore go nne thata go itshwarela ba bangwe? (b) Denise o ile a bontsha jang gore o a itshwarela?
A O THATAFALELWA ke go itshwarela ba bangwe? Go thata gore bontsi jwa rona re dire jalo, segolobogolo fa motho a bua kgotsa a dira sengwe se se re utlwisang botlhoko thata. Le fa go ntse jalo, go na le dilo dingwe tse di ka re thusang gore re se ka ra tswelela re galefile mme re itshwarele ba bangwe. Ka sekai, kgaitsadi mongwe yo o bidiwang Denise, a o ile a itshwarela ka pelo yotlhe. Ka 2017, Denise le ba lelapa la gagwe ba ne ba etela Ntlokgolo ya Lefatshe Lotlhe ya Basupi ba ga Jehofa e e neng e sa tswa go bulwa. Fa ba boela gae, monna mongwe o ile a thula koloi ya bone. Denise o ile a idibala. Mme fa a thanya, o ile a bolelelwa gore bana ba gagwe ba gobetse thata, le gore monna wa gagwe yo o bidiwang Brian o tlhokafetse. Fa Denise a akanya ka se se mo diragaletseng a re: “Ke ne ke ngomogile pelo e bile ke utlwile botlhoko thata.” Moragonyana o ile a lemoga gore monna yo o neng a ba thudile o ne a sa dira jalo ka boomo ka gonne o ne a sa nwa bojalwa, a sa dirisa diokobatsi e bile o ne a sa itewa tsebe ke go leba founu kgotsa dilo tse dingwe. Le fa go ntse jalo, o ile a rapela Jehofa gore a mo thuse go ritibala.
2 Monna yoo o ile a tshwarwa a bo a bulelwa kgetsi ya gore o bolaile motho a sa ikaelela. Fa kgotlatshekelo e ne e ka mmona molato, o ne a tla tsenngwa mo kgolegelong. Mme gone, mongwe kwa kgotlatshekelo o ne a bolelela Denise gore bosupi jo a bo ntshang bo ne bo tla dira gore monna yoo a tsenngwe mo kgolegelong kgotsa a se ka a tsenngwa. Denise a re: “Ke ne ke utlwile botlhoko tota fa ke tshwanelwa ke go tlhalosa se se ntiragaletseng. E ne e kete ke tshelwa letswai le lentsi mo nthong.” Dibeke di se kae moragonyana, Denise o ne a ya kwa kgotlatshekelo a bo a ntsha bosupi kgatlhanong le monna yo o neng a baketse lelapa la gagwe mathata a a seng kana ka sepe. Fa a ne a newa tshono ya go bua, o ile a reng? Denise o ne a kopa moatlhodi gore a utlwele monna yoo botlhoko. b Fa a sena go bua, moatlhodi o ne a thubega ka selelo. O ne a re: “Ke na le dingwaga di feta 25 ke le moatlhodi, mme ga ke ise ke bone selo se se ntseng jaana. Ke simolola go bona batho ba bua sentle le motho yo o ba utlwisitseng botlhoko thata jaana e bile ba mo itshwarela.”
3. Ke eng se se thusitseng Denise gore a itshwarele?
3 Ke eng se se thusitseng Denise gore a itshwarele monna yo o ba thudileng? O thusitswe ke go akanyetsa kwa teng kafa Jehofa a itshwarelang ka gone. (Mik. 7:18) Go lebogela tsela e Jehofa a re itshwarelang ka yone, go tla re thusa gore re itshwarele ba bangwe.
4. Jehofa o batla gore re dire eng? (Baefeso 4:32)
4 Jehofa o batla gore re itshwarele batho ba bangwe ka pelo yotlhe fela jaaka le ene a re itshwarela. (Bala Baefeso 4:32.) O lebeletse gore re ikemisetse go itshwarela ba ba re utlwisang botlhoko. (Pes. 86:5; Luke 17:4) Mo setlhogong seno, re tlile go tlotla ka dilo di le tharo tse di ka re thusang go itshwarela ba bangwe.
O SE KA WA ITLHOKOMOLOSA TSELA E O IKUTLWANG KA YONE
5. Go ya ka Diane 12:18, re ka ikutlwa jang fa mongwe a re kgopisa?
5 Sengwe se mongwe a se dirang kgotsa a se buang se ka re utlwisa botlhoko thata, segolobogolo fa re atamalane thata le motho yoo kgotsa e le mongwe mo lelapeng. (Pes. 55:12-14) Ka dinako dingwe re ka nna ra galefa kgotsa ra kgopisega thata jaana mo re ikutlwang e kete re tlhabilwe ka thipa. (Bala Diane 12:18.) Re ka nna ra leka go itlhokomolosa tsela e re ikutlwang ka yone, mme go dira jalo go tshwana le fa mongwe a tlhabilwe ka thipa a bo a e tlogela fela a sa dire sepe ka yone. Ka tsela e e tshwanang, go ka nna thata gore re itshwarele mongwe fa re itlhokomolosa tsela e re ikutlwang ka yone.
6. Re ka nna ra itshwara jang fa mongwe a re kgopisitse?
6 Gantsi re a galefa fa mongwe a re kgopisa. Baebele e a re go ka direga gore re galefa. Le fa go ntse jalo, e re tlhagisa gore re se ka ra tswelela re galefile. (Pes. 4:4; Baef. 4:26) Ka ntlha ya eng? Ka gonne gantsi tsela e re ikutlwang ka yone e ka dira gore re itshware ka tsela nngwe e e rileng, e bile ke ka sewelo re ka dirang dilo sentle fa re galefile. (Jak. 1:20) Nna o gopotse gore ka dinako dingwe o ka galefa fa mongwe a go kgopisitse. Mme gone, o ka itlhophela gore a o tla tswelela o galefile kgotsa nnyaa.
Ka dinako dingwe o ka galefa fa mongwe a go kgopisitse. Mme gone, o ka itlhophela gore a o tla tswelela o galefile kgotsa nnyaa
7. Fa mongwe a sa re tshware sentle, seo se ka re ama jang?
7 Fa re sa tshwarwe sentle, re ka nna ra utlwa botlhoko fela thata. Ka sekai, kgaitsadi mongwe yo o bidiwang Ann a re: “Fa ke sa le ngwana, Papa o ile a tlogela Mama a bo a nyala mosadi yo o neng a re thusa mo lapeng. Seo se ile sa dira gore ke ikutlwe ke latlhilwe. Fa ba sena go nna le bana, ke ne ke ikutlwa ke sa ratiwe. Fa ke ntse ke gola, ke ne ke itsaya ke se motho wa sepe.” Kgaitsadi mongwe yo o bidiwang Georgette, o tlhalosa kafa a neng a ikutlwa ka gone fa monna wa gagwe a sena go dira boaka. A re: “Ke ne ke utlwile botlhoko thata ka gonne re nnile ditsala re sa le bana, e bile re ne re le babulatsela mmogo.” Kgaitsadi mongwe yo o bidiwang Naomi ene a re: “Ke ne ke sa akanye gore monna wa me a ka nkutlwisa botlhoko jaana. Ka jalo, fa a sena go mpolelela gore o ntse a lebelela dibidio tsa tlhakanelodikobo ke sa itse, ke ne ke ikutlwa e kete o ntsieditse.”
8. (a) Goreng re tshwanetse go itshwarela batho ba bangwe? (b) Go itshwarela batho ba bangwe go ka re tswela mosola jang? (Bona lebokoso le le reng, “ Go Tweng fa Mongwe a re Dirile Dilo Tse di re Utlwisang Botlhoko?”)
8 Ga re ka ke ra kgona go laola se batho ba bangwe ba se buang kgotsa se ba bangwe ba se dirang, mme re ka kgona go laola tsela e re itshwarang ka yone. Tshwetso e e botlhale e re ka e dirang, ke go itshwarela batho ba ba re kgopisitseng. Goreng re rialo? Ka gonne re rata Jehofa e bile o batla gore re itshwarele ba bangwe. Fa re tswelela re galefile e bile re sa itshwarele ba bangwe, re ka nna ra dira dilo tse di ka re tsenyang mo mathateng, kgotsa tse di ka dirang gore re lwale. (Diane 14:17, 29, 30) Kgaitsadi mongwe yo o bidiwang Christine a re: “Fa ke utlwile botlhoko, ga ke smaele thata. Ke ja dijo tse di sa siamang, ga ke robale sentle e bile go thata gore ke dirisane sentle le monna wa me le batho ba bangwe.”
9. Goreng re tshwanetse go itshwarela ba bangwe?
9 Tota le fa motho yo o re utlwisitseng botlhoko a sa amogele phoso ya gagwe, re ka dira dilo tse di ka re thusang go fokotsa kutlobotlhoko eo. Re ka dira seo jang? Georgette yo re buileng ka ene mo dirapeng tse di fetileng a re: “Go ntsere lobaka gore ke itshwarele monna wa me, mme ke ile ka mo itshwarela. Seo se ne sa dira gore ke imologe.” Go itshwarela batho ba bangwe go dira gore re se ka ra akanya ka se ba se dirileng, e bile go dira jalo go re tswela mosola. (Diane 11:17) Mme gone, go tweng fa e le gore ga o kgone go itshwarela motho yo o go kgopisitseng?
KE ENG SE SE KA GO THUSANG GO ITSHWARELA
10. Goreng re tshwanetse go ipha nako ya go wela makgwafo gore re kgone go itshwarela mongwe yo o re kgopisitseng? (Bona le ditshwantsho.)
10 Ke eng se se ka go thusang gore o se ka wa nna o galefile fa mongwe a go kgopisitse? Iphe nako ya go wela makgwafo. Fa motho a gobetse, go ka tsaya nako gore a fole, tota le fa a bone thuso ya dingaka. Ka tsela e e tshwanang, le rona re ka nna ra tlhoka nako ya go wela makgwafo gore re kgone go itshwarela motho yo o re kgopisitseng.—Mor. 3:3; 1 Pet. 1:22.
Fa re gobetse, re tlhoka nako gore re fole. Ka tsela e e tshwanang, fa mongwe a re kgopisitse, re tlhoka nako gore re wele makgwafo (Bona serapa 10)
11. Thapelo e ka go thusa jang gore o itshwarele?
11 Kopa Jehofa gore a go thuse go itshwarela. c Ann yo re buileng ka ene mo dirapeng tse di fetileng, o tlhalosa kafa thapelo e mo thusitseng ka gone. A re: “Ke ile ka kopa Jehofa gore a itshwarele mongwe le mongwe wa rona mo lapeng ka gonne re sa buisana sentle e bile re sa dira dilo sentle. Go tswa foo, ke ile ka kwalela Papa le mosadi wa gagwe lekwalo ke ba bolelela gore ke ba itshwaretse.” Ann a re go dira jalo go ne go se motlhofo. Le fa go ntse jalo, a re: “Ke solofela gore Papa le mosadi wa gagwe ba tla ithuta ka Jehofa ka gonne ba lemoga gore ke leka go itshwarela fela jaaka ene.”
12. Goreng re tshwanetse go tshepa Jehofa go na le go tsaya gore tsela e re ikutlwang ka yone e siame? (Diane 3:5, 6)
12 Tshepa Jehofa. O se ka wa tsaya gore tsela e o ikutlwang ka yone e siame. (Bala Diane 3:5, 6.) Ka metlha Jehofa o itse se se re siametseng. (Isa. 55:8, 9) Ga a kitla a re kopa gore re dire sengwe se se tla re utlwisang botlhoko. Ka jalo, fa a re re itshwarele batho ba bangwe, ga re belaele gore go dira jalo go tla re tswela mosola. (Pes. 40:4; Isa. 48:17, 18) Mme gone, fa re tsaya gore tsela e re ikutlwang ka yone e siame, re ka nna ra se ka ra kgona go itshwarela batho ba bangwe. (Diane 14:12; Jer. 17:9) Naomi yo re buileng ka ene mo dirapeng tse di fetileng a re: “Kwa tshimologong, ke ne ke tsaya gore ke na le lebaka le le utlwalang la go sa itshwarele monna wa me ka gonne a lebelela ditshwantsho le dibidio tsa tlhakanelodikobo. Ke ne ke boifa gore o tlile go nkutlwisa botlhoko gape kgotsa gore o tla lebala gore se a se dirileng se nkutlwisitse botlhoko go le kana kang. Ke ne ke ipolelela gore Jehofa o tlhaloganya kafa ke ikutlwang ka gone. Mme gone, ke ne ka simolola go lemoga gore le fa Jehofa a tlhaloganya tsela e ke ikutlwang ka yone, seo ga se reye gore o dumalana le yone. O a itse gore ke ikutlwa jang le gore ke tlhoka nako gore ke wele makgwafo. Le fa go ntse jalo, o batla gore ke itshwarele.” d
LEBA DILO SENTLE
13. Go ya ka Baroma 12:18-21, re tshwanetse go dira eng?
13 Fa re itshwarela mongwe yo o re utlwisitseng botlhoko, ga re batle go tswa fela mo kgannyeng eo. Fa e le gore motho yoo ke mokaulengwe kgotsa kgaitsadi, re batla go dira kagiso le ene. (Math. 5:23, 24) Go na le gore re tswelele re galefile, re tla tlhopha go mo utlwela botlhoko le go mo itshwarela. (Bala Baroma 12:18-21; 1 Pet. 3:9) Ke eng se se ka re thusang go dira jalo?
14. Ke eng se re tshwanetseng go leka go se dira, mme ka ntlha ya eng?
14 Jehofa o tlhopha go leba dilo tse dintle mo bathong. Le rona re tshwanetse go leka go mo etsa ka go leba dilo tse dintle tse batho ba ba re kgopisitseng ba di dirang. (2 Ditir. 16:9; Pes. 130:3) Gantsi fa re batla dilo tse di siameng kgotsa tse di sa siamang mo bathong, re feleletsa re di bona. Ka jalo, fa re batla dilo tse di siameng tse batho ba bangwe ba di dirang, go tla nna motlhofo gore re ba itshwarele. Ka sekai, mokaulengwe mongwe yo o bidiwang Jarrod a re: “Go motlhofo gore ke itshwarele mokaulengwe fa ke akanya ka dilo tse dintle tse ke di ratang ka ene, go na le go akanya ka phoso e a e dirileng.”
15. Goreng go le botlhokwa gore re bolelele motho yo o re kgopisitseng gore re mo itshwaretse?
15 Sengwe sa botlhokwa se re ka se dirang fa mongwe a re kgopisitse, ke go mmolelela gore re mo itshwaretse. Goreng re rialo? Naomi yo re buileng ka ene mo dirapeng tse di fetileng a re: “Monna wa me o ne a mpotsa gore a ke mo itshwaretse. Go ne go le thata gore ke mo arabe. Ke ile ka lemoga gore ke ne ke sa mo itshwarela ka pelo yotlhe. Mme gone, fa nako e ntse e tsamaya ke ile ka mo itshwarela, ke bo ke mmolelela gore ke mo itshwaretse. Fa a utlwa seo, o ile a lela. Ke ile ka itumela tota fa ke mmona a imologile, le nna ke ile ka ikutlwa ke imologile. Fa e sa le go tloga ka nako eo, ke ile ka tshepa monna wa me gape e bile re ditsala.”
16. O ithutile eng ka go itshwarela?
16 Jehofa o batla gore re itshwarele batho ba bangwe. (Bakol. 3:13) Ke boammaaruri gore go ka nna thata gore re dire jalo. Mme gone, re ka kgona fa re sa itlhokomolose tsela e re ikutlwang ka yone, e bile re dira sotlhe se re ka se kgonang gore re se ka ra tswelela re galefile. Go tswa foo, re bo re batla dilo tse dintle mo bathong ba ba re kgopisitseng.—Bona lebokoso le reng, “ Dilo Tse Tharo Tse Di ka Go Thusang go Itshwarela.”
AKANYA KA MOSOLA WA GO ITSHWARELA
17. Go itshwarela go re tswela mosola jang?
17 Re na le mabaka a le mantsi a go itshwarela batho ba bangwe. Re tla umaka a le mmalwa fela. Sa ntlha, re etsa Rraarona yo o kutlwelobotlhoko e bile re a mo itumedisa. (Luke 6:36) Sa bobedi, re bontsha gore re lebogela go bo Jehofa a re itshwarela. (Math. 6:12) Sa boraro, re nna le botsogo jo bo itumedisang le ditsala tse re atamalaneng thata le tsone.
18-19. Go ka direga eng fa re itshwarela mongwe?
18 Fa re itshwarela batho ba bangwe, go ka nna ga direga dilo dingwe tse di itumedisang re sa lebelela. Ka sekai, Denise yo re buileng ka ene mo dirapeng tse di fetileng, o ne a sa itse gore monna yo o neng a ba thudile o ne a dirile tshwetso ya gore o tlile go ipolaya morago ga tsheko ya gagwe. Le fa go ntse jalo, fa a sena go lemoga gore Denise o mo itshwaretse, o ne a simolola go ithuta Baebele le Basupi ba ga Jehofa.
19 Re ka nna ra tsaya gore go thata tota go itshwarela motho yo o re utlwisitseng botlhoko, mme go dira jalo go ka re tswela mosola. (Math. 5:7) Ka jalo, a re direng sotlhe se re ka se kgonang gore re itshwarele ba bangwe jaaka Jehofa.
PINA 125 “Go Itumela ba ba Kutlwelobotlhoko!”
a Maina mangwe a fetotswe.
b Mo maemong ao, Mokeresete mongwe le mongwe o tshwanetse go itirela tshwetso ya gore o tla dira eng.
c Bona pina ya setlhogo se se reng, “Ke Itshwarele,” le se se reng “A re Agisane Tsala ya Me” tse di mo jw.org.
d Le fa gone go lebelela ditshwantsho le dibidio tsa tlhakanelodikobo e le boleo e bile go utlwisa ba bangwe botlhoko, seno ga se neye molekane yo o se nang molato lebaka la go tlhala.
