Tsela e ntle ya go buisana ke fa batsadi le bana ba tlhalosa maikutlo a bone ba gololesegile.

Go ka nna thata go buisana le bana segolobogolo fa ba fitlha mo dingwageng tsa bosha. Buka nngwe e e buang ka go godisa bana ya re fa bana ba le bannye ba bua le batsadi ka sengwe le sengwe. Mme fa ba ntse ba gola, go nna thata gore ba bue le batsadi, ka jalo, batsadi ba feleletsa ba sa itse gore go diragalang mo matshelong a bana ba bone. Fa seo se direga, eo ke yone nako e ba tlhokang gore batsadi ba buisane le bone ka yone!

Bua le ngwana ka nako e ene a eletsang go bua ka yone. Dira jalo le fa go ka direga gore lo tlotle go fitlha mo gare ga mpa ya bosigo.

“O ka raelesega go raya ngwana o re: ‘Kgale ke na le wena letsatsi lotlhe o sa bue sepe, jaanong o batla go bua ka nako e!’ A tota o ka ngongoregela gore ngwana wa gago o batla go bua le wena? A seo ga se sone se batsadi botlhe ba se batlang?”—Lisa.

“Ke rata go robala ka nako mme metlotlo e e monate e ke nnileng le yone le bana ba me, ke fa gare ga mpa ya bosigo.”—Herbert.

BAEBELE YA RE: “A mongwe le mongwe a nne a batle, e seng molemo wa gagwe, fa e se wa motho yo mongwe.”—1 Bakorintha 10:24.

Reetsa ka kelotlhoko: Rre mongwe a re: “Ke na le go akanya ka dilo tse dingwe fa bana ba ntse ba bua le nna. Bana ga se dimatla, ba kgona go bona fa ke sa ba reetsa!”

Fa e le gore o a tle o dire jalo, tima thelebishene le didirisiwa tsa eleketeroniki o bo o ba reetsa. Reetsa ka kelotlhoko fa ngwana wa gago a bua le wena le fa o ka tswa o tsaya gore dilo tse a di buang ga di botlhokwa thata.

“Bana ba tshwanetse go lemoga gore re tsaya dilo tse ba di buang di le botlhokwa. Fa ba ka lemoga gore ga re ba reetse, ga ba kitla ba bua le rona kgotsa ba tla bua le mongwe o sele.”—Maranda.

“O se ka wa galefa le fa ngwana a bua dilo tse di ikelang go sele.”—Anthony.

BAEBELE YA RE: “Tlhokomelang kafa lo reetsang ka gone.”—Luke 8:18.

Dirisa ditshono tse dingwe go buisana le bana. Gantsi fa motsadi a ka tsaya ngwana a bo a mmaya fa fatshe a re ba bue, go nna thata gore ngwana a bue mme fa ba iketlile fela, go nna motlhofo gore ngwana a bue.

“Re a tle re tlotle fa re le mo koloing. Fa re bapile go nna motlhofo gore a tlotle go na le fa re ntse fa fatshe re lebane difatlhego.”—Nicole.

Nako e nngwe e lo ka e dirisang, ke fa lo dutse mmogo lo ja.

“Fa re ntse mmogo re ja, mongwe le mongwe o tlotla ka se se mo diragaletseng mo letsatsing leo. Go dira jalo go re thusitse gore re nne seoposengwe le go itse gore go na le mongwe yo o tla re thusang fa re na le mathata.”—Robin.

BAEBELE YA RE: “Nna bonako go utlwa, bonya go bua.”—Jakobe 1:19.