A o kile wa ipotsa gore a re tshelela fela go tshameka, go bereka, go nyala, go nna le lelapa le go tsofala? (Jobe 14:1, 2) Baebele ya re tota le batho ba ba botlhale ba ne ba ipotsa potso eo.—Bala Moreri 2:11.

A go na le lebaka la go bo re tshela? Sa ntlha, re tshwanetse go ipotsa gore, Botshelo bo simologile jang? Fa batho ba le bantsi ba sena go sekaseka tsela e e gakgamatsang e boboko le mebele ya rona e dirilweng ka yone, ba ne ba swetsa ka gore go na le Mmopi yo o botlhale yo o re bopileng. (Bala Pesalema 139:14.) Fa a le teng, a ka tswa a na le lebaka la go bo a re bopile! Go itse lebaka leo go ka dira gore re itse gore re tshelela eng.

Modimo o ne a segofatsa banyalani ba ntlha a bo a ba naya tiro e e itumedisang. O ne a batla gore ba tlatse lefatshe, ba le dire paradaise le gore ba tshelele ruri.—Bala Genesise 1:28, 31.

Boikaelelo jwa Modimo bo ne jwa kgorelediwa fa batho ba nna kgatlhanong le taolo ya gagwe. Modimo ga a ka a re tlhoboga kgotsa a fetola boikaelelo jwa gagwe ka lefatshe. Baebele e re tlhomamisetsa gore Modimo o ntse a dira dithulaganyo tsa go boloka batho ba ba ikanyegang le gore o tla diragatsa boikaelelo jwa gagwe ka lefatshe! Ka jalo, Modimo o batla gore o itumelele botshelo jaaka a ne a batla! (Bala Pesalema 37:29.) Ithute mo Baebeleng gore o ka solegelwa molemo jang ke se Modimo a se ikaeletseng.