Go na le batho ba le dimilione ba ba nnang kwa Latin America mme bontsi jwa bone ba na le dipuo le ditso tsa bone. Mo palong eno go na le bakaulengwe le bokgaitsadi ba rona ba ba ratang setso sa bone. Gore bakaulengwe le bokgaitsadi bano ba kgone go thusa batho go ithuta Baebele ba ranolela dikgatiso tsa Basupi ba ga Jehofa mo dipuong di feta 130 tse di buiwang kwa Latin America. a Le fa go ntse jalo, bangwe ba bone ba a ganediwa ka gonne ba batla go direla Jehofa e bile ga ba batle go dira dilo tse di kgatlhanong le Baebele tse di dirwang ke batho ba ditso tsa bone. Meneelo ya lona e dirisitswe jang go ba thusa?

 Kwa Mexico, bakaulengwe le bokgaitsadi ba ba nnang kwa dithabeng tsa Jalisco State ba ne ba gana go tsenelela mo go sepe fela se se neng se le kgatlhanong le se ba se dumelang mo Baebeleng. b Mme go ne ga kgopisa bangwe mo setšhabeng seo. Ka December 4, 2017, ba ne ba tlhasela bangwe ba Basupi le ba bangwe ba ba neng ba na le bone. Ba ne ba ba koba mo motseng oo, ba senya dithoto tsa bone ba bo ba ba bolelela gore fa ba ka leka go boa ba tlile go ba bolaya.

 Basupi bano ba ne ba thusiwa ke bakaulengwe le bokgaitsadi ba ba mo ditoropong tse di gaufi. Mme ke eng se se neng se ka ba thusa gore ba boele gae? Mokaulengwe mongwe yo o bidiwang Agustín a re: “Re ne re se na madi a go kopa thuso kwa mmueleding, gape re ne re sa itse gore re tla botsa mang ka dilo tsa molao.”

 Bakaulengwe ba lekala la Central America ba ile ba dira dilo ka bonako ka gonne bakaulengwe ba rona ba ne ba sa kgone go obamela Jehofa ka kgololesego. Selo sa ntlha se ba neng ba se dira ke go kopa mapodise gore a dire dipatlisiso ka kgang eno. Go tswa foo, Komiti ya Barulaganyi ya Setlhopha se se Laolang sa Basupi ba ga Jehofa e ne ya ba naya tetla ya gore ba bereke le Lefapha la Molao la kwa ntlokgolo gore ba kgone go thusa bakaulengwe le bokgaitsadi ba rona ba Ba-Huichol. Kgetsi e ne ya fitlha kwa Kgotlatshekelong e Kgolo ya Makgaolakgang ya kwa Mexico.

 Babueledi ba ne ba tlhalosa gore batho ba bangwe ba tshwanetse go tlotla setso sa ditšhaba tse dingwe le gore batho ba ditšhaba tseo ba tlhoka go tlotla le go sireletsa kgololesego ya batho ba bone. Ditshwanelo tsa batho di tshwanetse go tlotliwa go sa kgathalesege gore ba nna kae.

 Ka July 8, 2020, Kgotlatshekelo ya Makgaolakgang e ile ya dumalana le Basupi ba ga Jehofa. E ile ya re mongwe le mongwe yo o kobilweng kwa motseng wa gaabo o tshwanetse go boela teng. Agustín, yo re buileng ka ene pelenyana o tlhalosa kafa ba ikutlwang ka gone, a re: “Re itumetse e bile re lebogela se bakaulengwe ba re diretseng sone. Fa ba ka bo ba sa re thusa, re ne re ka se kgone go dira sepe.”

 Fa dilo tseno di ntse di direga bakaulengwe ba rona ba kwa San Juan de Ilumán, kwa Otavalo Valley kwa Ecuador le bone ba ile ba lebana le mathata a a tshwanang a go bogisiwa. Ka 2014 ba ne ba newa tetla ya go aga Holo ya Bogosi. Fa bakaulengwe ba ntse ba aga moruti mongwe o ne a tla le batho ba feta 100 ba tla go ba emisa ka dikgoka. Go tswa foo batho ba motse oo ba ne ba raya Basupi ba ga Jehofa ba re ba se ka ba tlhola ba obamela mmogo.

 Mafapha a mabedi, lefapha la molao la kwa lekaleng la Ecuador le la kwa ntlokgolo ya lefatshe lotlhe, a ne a kopana mmogo gore a kgone go thusa phuthego ka kgololesego ya bone ya go obamela. Bakaulengwe ba rona ba ne ba isa kgang eno kwa kgotlatshekelong. Seno se ne sa dira gore batho ba motse oo ba tlogele go kgoreletsa tiro ya bakaulengwe ya go aga Holo ya Bogosi le gore ba tswelele ba kopane mmogo. Mme Holo ya Bogosi e ne ya fediwa. Baemedi ba rona ba ne ba tlhatlhela kgetsi kwa dikgotlatshekelo tse di kwa godimo gore ba kgone go sireletse ditshwanelo tsa bakaulengwe ba rona le mo nakong e e tlang. Mme ba batla gore go arabiwe kgang ya botlhokwa: A batho ba setšhaba sengwe ba tshwanetse go tlotla ditshwanelo tsa batho tse di tlhomilwe mo lefatsheng lotlhe?

 Ka July 16, 2020 Kgotlatshekelo e Kgolo ya Molaotheo ya Ecuador, e ile ya reetsa kgetsi eno. Bakaulengwe ba e leng babueledi kwa Ecuador ba ile ba emela phuthego eno. Gape go ile ga bua bakaulengwe ba le banê ba e leng babueledi kwa dinageng tse dingwe. Ka ntlha ya dithibelo tsa COVID-19 ba ile ba bua ba dirisa videoconference ba le kwa dinageng tse dingwe. E ne e le lantlha kgotlatshekelo epe fela mo lefatsheng lotlhe e letla Basupi ba ga Jehofa gore ba kgone go tlhalosa dintlha tsa bone ka tsela eno. c Baemedi bano ba ile ba tlhalosa gore mekgatlho mengwe e e mo lefatsheng lotlhe e bontsha gore fa motho a tswa mo setšhabeng kgotsa mo motseng mongwe o sa ntse a tlhoka go tlotla ditshwanelo tsa batho tse di tlhomilweng mo lefatsheng lotlhe.

 Bakaulengwe ba rona ba ba kwa Otavalo Valley ba sa ntse ba emetse tshwetso ya Kgotlatshekelo ya Molaotheo. Mme ba amilwe pelo ke tsela e ba ileng ba thusiwa ka yone. Mogolwane mongwe yo o direlang kwa Phuthegong ya Ilumán Quichua yo o bidiwang César a re: “Jehofa ke ene fela yo o ka dirisang phuthego ya gagwe go thusa batho ba se kae, mme a dira go tlala seatla.”

 Babueledi botlhe ba ba mo kgetsing eno ke Basupi ba ga Jehofa, mme ba itumelela go thusa ka maitemogelo a ba nang le one ba sa duedise ope. Le fa go ntse jalo go tlhatlhela dikgetsi tseno, go di baakanyetsa le go ya kgotlatshekelong ke madi e bile go tsaya nako. Babueledi ba rona le bakaulengwe ba bangwe ba feditse diura di le 380 ba baakanyetsa dintlha tse ba tlileng go bua ka tsone kwa kgotlatshekelong le diura di le 240 ba ranola dilo tse ba tlileng go di dirisa kwa kgotlatshekelong ya Mexico. Babueledi ba ka nna 40 mo dikarolong tse di farologaneng tsa lefatshe ba feditse diura di le dintsi mo kgetsing ya kwa Ecuador. Madi a re a dirisang go sireletsa bakaulengwe ba rona a tswa kae? Ke meneelo e lo e ntshang ka ditsela tse di farologaneng tse di tlhalosiwang mo donate.pr2711.com. Re lebogela meneelo e lo e ntshang ka bopelotshweu.