“Pea naʻá ku sio ki ha langi foʻou mo ha māmani foʻou; he naʻe mole atu ʻa e ʻuluaki langí mo e ʻuluaki māmaní, pea ʻoku ʻikai toe ʻi ai ʻa e tahí.”​—Fakahā 21:1, Liliu Tohi Tapu Māmani Foʻoú.

 “Pea u vakai ha langi foʻou mo ha fonua foʻou: he ne mole ʻa e ʻuluaki langi mo e ʻuluaki fonua; pea ʻoku ʻikai kei tuʻu ʻa e tahi.”​—Fakahā 21:1, Paaki Foʻou

 ʻOku ngāueʻaki ʻi he veesi ko ení ʻa e lea fakaefakatātā ke fakahaaʻi ko e Puleʻanga fakahēvani ʻo e ʻOtuá te ne fetongi ʻa e kotoa ʻo e ngaahi puleʻanga fakaetangatá. Ko e Puleʻangá te ne toʻo atu ʻa e fulikivanú pea pule mai ki ha sōsaieti foʻou ʻo e kakai ʻoku nau loto-lelei ke fakamoʻulaloa ki hono mafaí.

 Ko e tohi Fakahaá ʻoku fakahaaʻi ia fakafou “ʻi ha ngaahi fakaʻilonga,” pe ngaahi fakatātā. (Fakahā 1:1) Ko ia ʻoku ʻuhinga lelei ke fakamulitukuʻaki ko e langi mo e māmani pe fonua ʻoku lave ki ai ʻi he veesi ko ení ʻoku ʻuhinga fakaefakatātā. ʻIkai ngata aí, ko e “ngaahi langi foʻou” mo e “māmani foʻou” fakaefakatātā ko ení ʻoku toe lave foki ki ai ʻi he ngaahi veesi Tohi Tapu kehe. (ʻAisea 65:17; 66:22; 2 Pita 3:13) Ko hono sivisiviʻi eni mo e ngaahi fakamatala kehe ʻi he Folofolá ʻoku tokoni ia ke tau mahinoʻi hono ʻuhingá.

 “Langi foʻou.” ʻI he taimi ʻe niʻihi, ʻoku ngāueʻaki ʻi he Tohi Tapú ʻa e foʻi lea ko e “langi” ke fakafofongaʻi ʻa e tuʻunga-pule pe ngaahi founga-pule. (ʻAisea 14:12-14; Taniela 4:25, 26) ʻI he tuʻungá ni, ʻoku pehē ʻi ha maʻuʻanga fakamatala ʻi he ngaahi vīsone fakaekikité, “ko e langí ʻokú ne fakatātaaʻi ʻa e mafai pulé pe founga-pule.” a ʻI he Fakahā 21:1, ʻoku hā mahino ko e “langi foʻou” ʻoku ʻuhinga ia ki he Puleʻanga ʻo e ʻOtuá. Ko e founga-pule fakahēvani ko ení, ʻoku ui ʻi he taimi ʻe niʻihi ko e “Puleʻanga ʻo hēvaní,” ʻoku lave ki ai ʻi he tohi Fakahaá pea ʻi he ngaahi tohi kehe ʻo e Tohi Tapú. (Mātiu 4:17; Ngāue 19:8; 2 Tīmote 4:18; Fakahā 1:9; 5:10; 11:15; 12:10) Ko e Puleʻanga ʻo e ʻOtuá, fakataha mo Sīsū ko e Tuʻí, ʻe faai atu pē ʻo ne fetongi “ʻa e ʻuluaki langí,” ʻa ia, ko e ngaahi founga-pule taʻehaohaoa kotoa ʻoku fokotuʻu ʻe he faʻahinga ʻo e tangatá.​—Taniela 2:44; Luke 1:31-33; Fakahā 19:11-18.

 “Māmani foʻou.” ʻOku fakahaaʻi ʻi he Tohi Tapú ko e foʻi māmaní heʻikai ʻaupito ke fakaʻauha pe fetongi. (Saame 104:5; Tangata Malanga 1:4) Ko e hā leva ʻa e māmani pe fonua fakaefakatātaá? ʻOku faʻa ngāueʻaki ʻi he Tohi Tapú ʻa e foʻi lea “māmani” ke ʻuhinga ki he faʻahinga ʻo e tangatá. (Sēnesi 11:1; 1 Kalonikali 16:31; Saame 66:4; 96:1) Ko ia ai, ko e “māmani foʻou” kuo pau ʻoku ʻuhinga ia ki ha sōsaieti foʻou ʻo e kakai ʻoku nau loto-lelei ke fakamoʻulaloa ki he founga-pule fakahēvani ʻa e ʻOtuá. Ko e “ʻuluaki māmaní,” pe sōsaieti ʻo e faʻahinga ʻo e tangatá ʻoku fakafepaki ki he Puleʻanga ʻo e ʻOtuá, ʻe mole atu.

 “ʻOku ʻikai toe ʻi ai ʻa e tahí.” ʻI he fehoanaki mo e toenga ʻo e Fakahā 21:1, ko e “tahí” ʻoku tuʻu fakaefakatātā foki. Ko e tahí ʻoku faingofua ʻene hoú pea faʻa tōtōtaufa, pea ʻokú ne fakafofongaʻi ai ʻa e fuʻu tokolahi taʻemanonga ʻo e faʻahinga ʻo e tangatá kuo nau mavahe mei he ʻOtuá. (ʻAisea 17:12, 13; 57:20; Fakahā 17:1, 15) Ko kinautolu foki te nau mole atu. ʻOku pehē ʻi he Saame 37:10: “ʻOku toe siʻi pē, pea ʻe ʻikai toe ʻi ai ʻa e kau fulikivanú; te ke fakasio ʻa e feituʻu naʻa nau ʻi aí, ka ʻe ʻikai te nau ʻi ai.”

 Ko e tohi ʻa Fakahaá ʻoku tomuʻa tala ai ʻa e meʻa ʻe hoko lolotonga ʻa e “ʻaho ʻo e ʻEikí.” (Fakahā 1:10) Fakatatau ki he kikite Fakatohitapú, ko e ʻaho ko iá naʻe kamata ʻi he 1914 ʻi he taimi naʻe kamata pule ai ʻa Sīsū ko e Tuʻi ʻo e Puleʻanga ʻo e ʻOtuá. b Ka heʻikai ke ne puleʻi kakato ʻa e māmaní ʻi he taimi pē ko iá. Ko hono moʻoní, ʻoku fakahaaʻi ʻi he ngaahi kikite kehé ko e tuʻunga ʻo e māmaní ʻe ʻalu ke toe kovi ange lolotonga ʻa e ʻuluaki konga ʻo e “ʻaho ʻe ʻEikí.” Ko e ʻuluaki vahaʻa taimi ko iá ʻoku ui ko e “ngaahi ʻaho fakaʻosí.” (2 Tīmote 3:1-5, 13; Mātiu 24:3, 7; Fakahā 6:1-8; 12:12) ʻI he ngata ʻa e ngaahi ʻaho fakalilifu mo fonu faingataʻa ko iá, ko e Puleʻanga ʻo e ʻOtuá te ne toʻo atu ʻa e langi mo e māmani fakaefakatātā motuʻá pea fakaʻilongaʻi ʻa e kamataʻanga ʻo ha kuonga foʻou ʻo e melino mo e fāʻūtaha. Ko e faʻahinga ʻi he malumalu ʻo e Puleʻangá​—ʻa e “māmani foʻou”​—te nau fiefia leva ʻi he ngaahi tuʻunga fakafiemālie ʻo e moʻuí mo e moʻui lelei haohaoa.​—Fakahā 21:3, 4.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa Fakahaá.