ʻIkai. ʻOku mau kau tuʻumaʻu ʻi he ngāue fakafaifekau fale-ki-he-falé, ka ʻoku ʻikai te mau tui ʻoku mau maʻu ʻa e fakamoʻuí ʻi hono fai ʻa e ngāue ko ení. (ʻEfesō 2:8) Ko e hā hono ʻuhingá?

 Fakakaukau ki he fakatātā ko ení: Sioloto atu ki ha tangata anga-ʻofa ʻokú ne palōmesi te ne foaki ha meʻaʻofa mamafa ki he tokotaha kotoa ʻe haʻu ki ha feituʻu ʻi ha ʻaho pau. Kapau ʻokú ke tui moʻoni ki he palōmesi ʻa e tangatá, te ke muimui ʻi heʻene fakahinohinó? ʻIo! Ngalingali, te ke tala foki ki ho ngaahi kaumeʻá mo e fāmilí fekauʻaki mo e faingamālié, koeʻuhí ke nau lava foki ke maʻu ʻaonga mei ai. Neongo ia, te ke maʻu ʻa e meʻaʻofá ʻo ʻikai koeʻuhí ko hoʻo muimui ki he fakahinohino ʻa e tangatá. Te ke maʻu ʻa e meʻaʻofá koeʻuhí naʻe loto ʻa e tangatá ke foaki atu kiate koe.

 Pehē foki, ʻoku tui ʻa e Kau Fakamoʻoni ʻa Sihová ki he talaʻofa ʻa e ʻOtuá fekauʻaki mo e moʻui taʻengata ki he faʻahinga kotoa ʻoku talangofua kiate iá. (Loma 6:23) ʻOku mau feinga mālohi ke vahevahe ʻemau tuí ki he niʻihi kehé, ʻo ʻamanaki te nau maʻu ʻaonga mei he talaʻofa ʻa e ʻOtuá. Ka ʻoku ʻikai te mau tui ʻoku mau maʻu ʻa e fakamoʻuí ʻi he kau ʻi heʻemau ngāue fakafaifekaú. (Loma 1:17; 3:28) Ko hono moʻoní, heʻikai ʻaupito malava ha tangata ke fai ha meʻa ʻo tuha ai mo e tāpuaki fakaofo pehē mei he ʻOtuá. ‘Naʻá ne fakahaofi kitautolu ʻo ʻikai koeʻuhí ko ha ngaahi faʻahinga ngāue māʻoniʻoni naʻa tau fai, ka koeʻuhí ko ʻene meesi ʻaʻaná.’—Taitusi 3:5.