ʻI hono ueʻi ʻe he ʻofa ki he ʻOtuá mo e ʻofa ki he kaungāʻapí ʻa e Kau Fakamoʻoni ʻa Sihová, ʻoku nau vahevahe fiefia atu ʻa e pōpoaki Fakatohitapú ki he kakai kotoa pē, kau ai mo e faʻahinga naʻa nau pehē ki muʻa “ʻOku ʻIkai Ke U Mahuʻingaʻia.” (Mātiu 22:37-​39) ʻOku ueʻi kimautolu ʻe he ʻofa ki he ʻOtuá ke talangofua ki he fekau ʻa hono ʻAló “ke fai ha fakamoʻoni fakaʻāuliliki.” (Ngāue 10:42; 1 Sione 5:3) Ke fakahoko iá, ʻoku mau ʻoatu ʻa e pōpoaki ʻa e ʻOtuá ʻo ʻikai tuʻo taha pē, kae hangē ko ia naʻe fai ʻe he kau palōfita ʻa e ʻOtuá ʻi he kuohilí. (Selemaia 25:4) Koeʻuhi ko ʻemau ʻofa ki homau kaungāʻapí, ʻoku mau feinga ai ke vahevahe atu ʻa e pōpoaki fakahaofi moʻui ʻo e “ongoongo lelei ko ʻeni ʻo e Puleʻangá” ki he kakaí kotoa, kau ai ʻa e faʻahinga naʻe ʻikai ke nau mahuʻingaʻia ki muʻá.​—Mātiu 24:14.

 ʻOku hā ʻa e mahuʻingaʻiá mei he ngaahi ʻapi naʻe ʻikai mahuʻingaʻia ki muʻá ʻi he taimi ko ia ʻoku mau toe foki ai ki aí. Ko e ngaahi ʻuhinga eni ʻe tolu:

•   Fehīkiaki ʻa e kakaí.

•   Mahuʻingaʻia ʻa e niʻihi kehe ʻi he ʻapí ʻi heʻemau pōpoakí.

•   Liliu e kakaí. ʻOku fakatupunga ʻe he ngaahi meʻa ʻoku hoko ʻi he māmaní pe ko e tuʻunga fakafoʻituituí ʻa e niʻihi ke nau ‘lāuʻilo ʻoku ʻi ai ʻenau fiemaʻu fakalaumālie’ ʻo nau mahuʻingaʻia ai ʻi he pōpoaki Fakatohitapú. (Mātiu 5:3) Naʻa mo e niʻihi naʻa nau fakafepaki ki muʻa, ʻe lava ke liliu honau lotó ʻo hangē ko ia naʻe fai ʻe he ʻapositolo ko Paulá.​—1 Tīmote 1:​13.

 Kae kehe, ʻoku ʻikai fakamālohiʻi ʻa e kakaí ke nau tali ʻemau pōpoakí. (1 Pita 3:​15) ʻOku mau ʻilo kuo pau ke fai ʻe he tokotaha taki taha ʻene fili fekauʻaki mo e lotú.​—Teutalōnome 30:19, 20.