Ko e Kau Fakamo‘oni ‘a Sihova ‘e toko fiha ‘okú ke ‘ilo‘í? Ko e ni‘ihi ‘o kimautolu ko ho ngaahi kaungā‘api, kaungāngāue, pe kaungāako nai. Pe kuo mau fai nai ha ngaahi fetalanoa‘aki Fakatohitapu mo koe. Ko hai mo‘oni kimautolu, pea ko e hā ‘oku mau vahevahe atu ai ki he kakaí ‘a ‘emau tuí?

Ko e kakai anga-maheni pē kimautolu. Ko ‘emau ha‘ú mei he ngaahi puipuitu‘a mo e ngaahi tu‘unga fakasōsiale kehekehe. Ko e ni‘ihi ‘o kimautolu na‘a mau kau ki mu‘a ki ha lotu kehe, lolotonga ia na‘e ‘ikai tui ‘a e ni‘ihi ki he ‘Otuá. Kae kehe, ki mu‘a ke hoko ko e Kau Fakamo‘oní, ko kimautolu kotoa na‘a mau vahe‘i ha taimi ke vakai‘i fakalelei ai ‘a e ngaahi akonaki ‘a e Tohi Tapú. (Ngāue 17:11) Na‘a mau loto-tatau mo e me‘a na‘a mau akó, pea na‘a mau fai leva ha fili fakafo‘ituitui ke lotu kia Sihova ko e ‘Otuá.

‘Oku mau ma‘u ‘aonga mei hono ako ‘a e Tohi Tapú. ‘I he hangē ko e tokotaha kehe kotoa pē, kuo pau ke mau fekuki mo e ngaahi palopalema pea mo homau ngaahi vaivai‘angá tonu. Ka ‘i he feinga ke ngāue‘aki ‘a e ngaahi tefito‘i mo‘oni ‘a e Tohi Tapú ‘i he‘emau mo‘ui faka‘ahó, kuo mau hokosia ai ha laka ki mu‘a hā mahino ‘i he tu‘unga ‘o ‘emau mo‘uí. (Saame 128:1, 2) Ko e ‘uhinga ia ‘e taha ‘oku mau vahevahe atu ai ki he ni‘ihi kehé ‘a e ngaahi me‘a lelei kuo mau ako mei he Tohi Tapú.

‘Oku mau mo‘ui‘aki ‘a e ngaahi tu‘unga faka‘otuá. Ko e ngaahi tu‘unga ko ení, hangē ko ia ‘oku ako‘i ‘i he Tohi Tapú, ‘oku pouaki ai ‘a e ongo‘i lelei mo e faka‘apa‘apa ki he ni‘ihi kehé, fakataha mo e ngaahi ‘ulungaanga hangē ko e faitotonú mo e anga-leleí. ‘Oku tokoni ia ke tupulekina ai ha kau mēmipa mo‘ui lelei mo fua lahi ‘o e sōsaietí, pea ‘oku fakalototo‘a‘i ai ‘a e fā‘ūtaha mo e ‘ulungaanga lelei ‘i he fāmilí. ‘I he tuipau “‘oku ‘ikai ke filifilimānako ‘a e ‘Otuá,” ‘oku mau kau ai ki ha fetokoua‘aki fakalaumālie ‘a ia ‘oku fakavaha‘apule‘anga mo‘oni, ‘o ‘atā mei he ngaahi ‘ā vahevahe fakamatakalí mo fakapolitikalé. Neongo ko e fa‘ahinga anga-maheni pē kimautolu tāutahá, ‘i hono fakataha‘í ko e kakai makehe kimautolu.​—Ngāue 4:13; 10:34, 35.

• Ko e hā ‘oku faitatau ai ‘a e Kau Fakamo‘oni ‘a Sihová mo e kakai kehé?

• Ko e hā ‘a e ngaahi tu‘unga kuo ‘ilo ‘e he Kau Fakamo‘oní mei hono ako ‘a e Tohi Tapú?