Ko e ʻū vitiō ʻi heʻetau fakataha-lahí ʻoku ueʻi ai hotau lotó pea tokoniʻi kitautolu ke mahinoʻi lelei ange ʻa e meʻa ʻoku akoʻi ʻe he Tohi Tapú. ʻI he fakataha-lahi “Fiefia Maʻu Ai Pē”! 2020 ʻoku ʻi ai ha ʻū vitioó ʻe 114. ʻOku kau ki ai ʻa e ngaahi malanga ʻe 43 naʻe fakahoko ʻe he Kulupu Pulé mo honau kau tokoní. Kuó ke fifili ki he lahi ʻo e ngāue kuo fakahokó mo e lahi ʻo e paʻanga ʻoku fiemaʻu ke faʻu ʻaki ʻa e ʻū vitioó ko ení?

 Naʻe feʻunga mo e fanga tokoua mo e fanga tuofāfine ʻe 900 nai ʻi māmani lahi, naʻa nau pole ke tokoni ki hono faʻu ʻa e polokalama ʻo e fakataha-lahí. ʻI he taʻu ʻe ua, naʻa nau fakamoleki ʻa e houa ʻe 100,000 nai ʻi he ngāue ko ení. Naʻe kau ki heni ʻa e houa ʻe 70,000 ke fakakakato ʻa e tulama miniti ʻe 76 Nehemaia: “Ko e Fiefia meia Sihová ʻa Homou Maluʻangá.”

 Ko hono moʻoní, naʻe lahi ʻa e paʻanga naʻe fiemaʻu ke tokangaʻi ʻaki ʻa e kau ngāue feilaulauʻi-kita ko ení, pehē ki hono ʻoange kia kinautolu ʻa e tokoni fakatekinikale, meʻangāue mo e feituʻu ke fakahoko ai ʻa e ngāué.

 “ʻOku loto ʻa e Kōmiti Faiako ʻo e Kulupu Pulé ke fakakau ʻa e ngaahi anga-fakafonua mo e ngaahi feituʻu kehekehe ʻi heʻetau ʻū vitioó. ʻOku fai ení koeʻuhi ko ʻetau fetokouaʻaki ʻi māmani lahí pea ʻoku tau loto ke fakahaaʻi ia ʻi heʻetau ʻū vitioó,” ko e lau ia ʻa Jared Gossman, ʻoku ngāue ʻi he Potungāue Vitiō. “Ke fakahoko ení naʻe fengāueʻaki fakataha ʻa e ngaahi timi ʻe 24 ʻi he ngaahi fonua kehekehe ʻe 11 ʻi he ngāue ko ení. Naʻa tau fiemaʻu ʻa e paʻanga lahi, teuteu lelei mo e fokotuʻutuʻu lahi ke ngāue fakataha ʻa e kakaí takatakai ʻi he māmaní.”

 Ke malava ʻo faʻu ʻetau ʻū vitioó naʻe fiemaʻu ki ai ha ʻū meʻangāue lahi kehekehe. Ko e fakatātaá ko e ngaahi naunau ki he tulama Nehemaia: “Ko e Fiefia meia Sihová ʻa Homou Maluʻangá” naʻe langa ia ʻi loto ʻi he Mt. Ebo ko e fale ʻeti faiva ofi ki Patterson, Niu ʻIoke, ʻAmelika. Ke ngāue lelei taha ʻaki ʻa e paʻanga tokoní naʻe langa ai ʻe he fanga tokouá ha meʻa meimei tatau mo e ʻā ʻo Selusalema ʻo e kuonga muʻá. Naʻa nau fokotuʻu ha ngaahi papa naʻe feʻunga hono loloa mo e mita ʻe 6 (fute 20) pea kofuʻaki ia ʻa e vavae pea naʻe teuteuʻi ia ʻo hangē ha maká. Ko e ngaahi “ʻā” ko ení naʻe faʻu ia ke feʻungamālie mo e ngaahi konga kehekehe ʻo e faivá. ʻI hono fai ení, naʻe ʻikai toe fiemaʻu ai ke nau langa ha meʻa foʻou. Neongo iá naʻe fiemaʻu ha paʻanga ʻe $100,000 ʻAmelika nai ki hono faʻu ʻa e ʻū meʻa ki he tulamá ʻataʻatā pē. a

 ʻI hono ʻiloʻi ʻa e ngaahi fakaikiiki ko ení, ʻokú ne fakalahi ai ʻetau houngaʻia ki he fakataha-lahi ʻo e taʻu ní. ʻOku tau maʻu ʻa e loto-pau ko e ngāue ki hono faʻu ʻo e fakataha-lahí, ʻe taki atu ia ki he fakahīkihikiʻi ʻa Sihova ʻi māmani lahi. Mālō ʻaupito ki hoʻo ngaahi foaki nima-homo ki he ngāue ʻi māmani lahí fakafou ʻi he donate.pr2711.com mo e ngaahi founga kehe pē.